佳佳甜品：有影佳雙

佳佳甜品連續兩年獲得米芝蓮街嘅推介頭小食殊榮（2016、2017），理論上都差唔得去邊，有唔少人專登去「朝聖」，不過，失禮咁講，小弟舊鋪未去過，新鋪都喺第一次光顧。同老婆有點事要辦先過嚟佐敦，路經見無乜人先坐低食碗糖水。

小小嘅糖水店做出如此成績，實在值得支持。店內裝修簡單，仿木地板嘅地磚，配以啡色牆磚，帶中式深啡嘅木枱圓櫈，叫做有種傳統格調。但較為意想不到喺，以佳佳個名氣，尖峰時段應該幾旺場，但眼見鋪內並無用盡每吋地方，相比起好多糖水店環境闊落好多。

唔少人寫過佳佳，所以，有啲咩選擇就唔多寫，總之就喺主打傳統中式糖水。貼上兩頁餐牌，目的只喺話俾大家知價錢已經略作調整咗，非常溫和，而最低消費亦升為每位$19。

百合綠豆沙 $19

海帶綠豆沙食得較多，配百合都喺頭一趟，效果唔錯，此外，綠豆沙內仲加有少少西米，但最緊要喺煮到起沙，否則就只可以叫綠豆粥。唔知邊個發明，紅豆沙配陳皮，綠豆沙就配臭草，佳佳落臭草唔算重手，所以，出嚟嘅臭草味幽香咁散發，唔太好臭草嘅人都應該接受到，老婆就鍾意佢少甜。

芋茸蓮子西米露 $19

芋頭西米露食過，但搵芋茸嚟做就未試過。碗西米露淡紫色，滔起幾羹，質感好綿柔，落芋蓉嘅比例幾好，而芋頭味唔叫得澎湃，但亦都唔弱，再者啲蓮子清香鬆化，西米多添點點口感，整體配搭上又確喺幾好。

一向都唔太信米芝蓮或啲乜乜乜食家推介，就算有朋友叫小弟做食家，問有咩好介紹，我都自謔食棍一名，始終人人口味唔同，我只會講依家餐廳喺點點點嚟俾你參考。佳佳，佢啲糖水唔喺話好味都嘩嘩聲，但喺間用心製作嘅中式糖水店，味道紮實，想新奇古靈精怪，佳佳唔喺你杯茶。

個人評分
味道：8/10
環境：7/10
服務：7/10
抵食：8/10
平均每人消費：HK$19

餐廳資料：
佳佳甜品
佐敦寧波街29號地舖
2384 3862