除咗幾款基本沾麵及拉麵、小食外，重點就落晌兩款季節限定新出嘅沾麵身上：「鵝肝牛魔塔沾麵」及「雙色海膽沾麵」， 雖然定價感覺上唔便宜，但睇見友人嘅相，份量之多真喺不得了。
未食過沾麵嘅朋友唔使擔心，牆上貼有「溫馨提示」教你點樣品嚐正宗日本沾麵，晌度就唔多講嘞，自行按圖索驥，一睇就明！
鵝肝牛魔塔沾麵 $168
份量方面，有150g（$168）、300g（$198） 及 800g（$398），我哋所點嘅喺150g嘅份量，睇見啲牛肉已經唔少，不愧為牛魔塔，所以，800g就更難以想象，真實嚟講唔知有幾多客會點依個份量。而沾汁底有黑松露或蕃茄味供選擇，感覺配牛就似喺黑松露襯啲，但蕃茄味似乎又可以平衡番吓鵝肝及牛肉嘅重口味，相信兩款沾汁都各有捧場客。
滔少少個沾汁一試，質感帶黏，但黑松露味超濃郁，襯鵝肝及牛肉真喺感覺重口味到不得了，而麵條粗身有咬口，條條掛滿汁，充滿黑松露嘅幽香。至於鵝肝唔單止有一大件，煎得焦香，外脆內嫩而富油潤，牛肉聽店員介紹喺以西冷入饌，做到好似生牛肉咁，柔軟而富咬口，所以，兩個主角都好好味。此外，色澤閃亮嘅溏心蛋，蛋黃流心盪漾，格外誘人，味濃柔滑，正呀！
日式芝士雜坎 $20
個沾汁咁正，食剩當然有啲嘥，不妨好似我哋咗，加20蚊變為雜坎，即喺加入一碗白飯同芝士碎連湯汁同煮而成嘅「意大利飯」，輕易拉起一絲絲芝士絲，超好食。
特濃雙色海膽沾麵 $298
其實，海膽沾麵共有兩款，一款喺基本嘅海膽沾麵（$188），另一款喺特濃雙色海膽沾麵（$298），兩者分別在於前者只用上一款海膽，後者除用上兩款海膽，海膽份量更喺加倍。所以，純粹想試試海膽沾麵可揀前者，如喺海膽死粉就當然要試後者。
聽店員介紹，麵上嘅海膽分別嚟自韓國及加拿大，而個沾汁更喺以海膽加入豬骨湯嚟做，所以，當麵條掛上沾汁，再伴一小片海膽，嗰份海膽味真喺幾澎湃。為咗襯番個海膽沾麵，個沾汁亦只有一款選擇。而啲魚子靚就靚喇，晶瑩剔透，不過齋食會頗鹹，伴麵又比較難啲。
煎餃子 $32
一客有5隻，純粹過吓口癮而已，餃子內餡料好足，不過，底位煎得唔夠香脆，不過不失。
雞軟骨棒（燒芝士味）$32
一客有兩支，備有3款口味：燒汁沙律醬、日式芥末沙律醬及燒芝士味。啲免治雞肉打得好幼滑，咬落有啲雞軟骨，口感過癮；唔單止灑上芝士粉，其實仲有落咗莫沙里拉芝士，令個雞棒變得更惹味，比起煎餃子，雞軟骨棒值得推薦。
試咗兩款新出嘅沾麵，小弟屬於食肉獸型，所以，個人偏好鵝肝牛魔塔沾麵，不過，整體而言，「肝」、「膽」雙雄都真喺各有特色。
個人評分
味道：8/10
環境：7/10
服務：7/10
抵食：7/10
平均每人消費：HK$185
味道：8/10
環境：7/10
服務：7/10
抵食：7/10
平均每人消費：HK$185
餐廳資料：
富士山55 Fujiyama 55
銅鑼灣伊榮街9號欣榮商業大廈地下1號舖
2363 3334
富士山55 Fujiyama 55
銅鑼灣伊榮街9號欣榮商業大廈地下1號舖
2363 3334
沒有留言:
發佈留言