Tokyo Milk Cheese Factory：好友狂嚐曲（57）

晌舊年年底先落戶香港嘅日本過江龍超人氣伴手禮Tokyo Milk Cheese Factory，產品當中嘅牛奶芝士餅、艾登芝士蛋糕、海鹽芝士曲奇及蜂蜜芝士曲奇喺店家主打，試過嗰兩款曲奇又的確幾好食，又幾特別。今次食友送上此店嘅曲奇，原以為又喺曾試過嘅口味其中一款，點知喺有驚喜嘅新口味！

喺咩口味？小弟譯佢為羅勒蕃茄芝士曲奇（Basil-Tomato Mozzarella Cookie）。

包裝嘅外觀跟其他曲奇產品一樣，所以，都喺靠盒底嘅標貼；不過，內裡獨立嘅包裝紙就有啲分別，我仲記得海鹽芝士曲奇嘅「牛牛」招紙貼喺藍色，蜂蜜芝士曲奇則用上橙色，而手中嘅羅勒蕃茄芝士曲奇卻用上紅色。全部獨立包裝，食用衛生方便。

外層曲奇以北海道牛奶及羅勒製成，所以，入口帶有點點既香草香，而中間夾住一片莫沙里拉芝士，應喺加入蕃茄成份，所以，芝士嘅色澤偏橙紅，芝士味中又嗒出微微蕃茄味。此外，正如上次食評咁講，外形有種好似食緊「菠蘿油」嘅感覺，當然，無咩油膩感啦。

晌個悠閒嘅星期六晏晝，沖杯咖啡，配番幾件羅勒蕃茄芝士曲奇，想返起好友嘅不時送贈，就想記起好多感恩嘅事。

個人評分
味道：8 /10
環境：- /10
服務：- /10
抵食：- /10
平均每人消費：HK$0（好友送贈）

餐廳資料：
Tokyo Milk Cheese Factory
上環德輔道中323號西港城地下4-6號舖
6010 9635