講到地方大，單睇門面真喺睇唔出，入到去確喺夠深夠闊落；一室光亮，潔白雅致，一邊窗口卡位更喺大多數人嘅揀位之選，當然，我哋都揀個窗口位，充足嘅自然光透射入嚟，仲要揀入少少，感覺醒神又少騷擾。
午餐有兩組餐牌，第一組我估喺基本午餐，底面所見共有8款選擇，定價唔貴，都喺$48-$58。
另一組佢稱之為廚師推介，睇落似喺照燒汁系列，5款選擇都喺照燒汁乜乜乜，兼且配上健康嘅紅米飯，同樣定價便宜，都喺$42-$45，我哋大家都覺得抵食。
而所有午餐都配汽水，或較具特色嘅波蘭三角果茶包，加$20更可轉主餐牌上嘅特飲或特色咖啡；此外，加$30更可配甜品，午市更唔收加一，但招呼一樣咁好，讚！
法式紅酒燴雞配紅米飯 $48
雖然只喺午餐一道，但賣相絕無求其迤做，個紅酒燴雞好入味，啲雞肉又唔嚡，汁底幾香；紅米飯嘅紅米佔嘅比例唔多，所以，食落唔會好巉口，伴菜再添啲燴雜菜，其實幾好食，不過唔明點解仲加上白烚嘅椰菜上去！
鮮茄焗鴨胸飯 $48
蕃茄焗飯一向大有市場，朋友揀依個焗飯亦都好對辦，飯底炒過，配個飯面濃郁嘅蕃茄醬及柔軟嘅芝士，淨飯都好滋味；再者，鴨胸軟腍，有份煙燻嘅鹹香，同埋咪睇佢細細兜，鴨胸都落得唔少。
卡邦尼銅模意大利粉 $56
小弟早前試咗一份卡邦尼，感覺麻麻，所以，見依度又有，就想點一客嚟比較吓。睇樣唔錯喎，如打隻蛋就更錦上添花，意粉煮得恰到好處，有咬口，每炷意粉亦掛滿醬汁，煙肉落得無手緊，而且，喺甚少肥肉嘅煙肉，鹹香而不膩。
波蘭三角果茶包
果茶包有3款口味供選擇，朋友揀咗無花果布冧口味，色澤紫紅透徹，味道就不得而知，但朋友概括一句：清甜蜜潤。
荔枝柚子沙冰 +$20（正價$38）
朋友話之前行山行到一身汗，點都要飲杯凍嘢先夠爽。佢話個沙冰好得，沙冰打得幼細，柚子味十足，裡面混有唔少荔枝肉，雖然都知喺罐頭貨，但夠清甜就懶理啦。
鮮奶咖啡 +$20（正價$46）
一心期待佢哋杯咖啡，不過就失望而回，奶泡得層泡，喺咖啡機沖調嘅水平，加$20真喺蝕俾佢，都喺為配甜品先點杯鮮奶咖啡咋。
焦糖燉蛋 +$30
估唔到啲甜品又幾正喎，好似依道法式焦糖燉蛋咁，焦糖做得既薄且脆，而燉蛋部分好有蛋香，柔滑好食。
芒果撻 +$30
件芒果撻就更得我心，因為，如手掌大嘅芒果撻鋪滿大大件芒果肉，清甜，而撻殼極之鬆化，內裡塗上一層朱古力漿，所以，撻殼保持鬆脆度，唯一挑剔喺中間嘅吉士漿稍為削身。
想食得有啲質素，又要坐得舒服，「小蟻人」確喺唔錯嘅地方，食到飽飽，喺時候讓個位俾人，出發去逛荃灣三楝屋。
個人評分
味道：8/10
環境：8/10
服務：8/10
抵食：8/10
平均每人消費：HK$84
味道：8/10
環境：8/10
服務：8/10
抵食：8/10
平均每人消費：HK$84
餐廳資料：
小蟻人 甜品西餐 Mr. Ant
荃灣眾安街55號大鴻輝(荃灣)中心1樓103店
2441 3099
小蟻人 甜品西餐 Mr. Ant
荃灣眾安街55號大鴻輝(荃灣)中心1樓103店
2441 3099
沒有留言:
發佈留言