The Chop House：為食牙斬斬

上次到訪過Prost by King Ludwig之後，見隔離The Chop House頗有氣氛，所以，搞手已約定話搵晚嚟一試，加上佢話銅鑼灣店已做得有聲有色，又有大集團背後支援，實在喺信心嘅保證，睇番銅鑼灣店嘅食評，又確喺既吸引。

從門面開始，已感覺到一股工業風嘅型格，再配以柔和昏暗嘅燈光，地方夠闊落，讓人可悠閒用餐。

侍應見小弟周圍影，介紹我到後面露天位置一看，果然叫人豁然開朗，因為唔單止地方大，而且做到成個城市花園咁，坐晌度食飯感覺更休閒、更無拘無束。

Cucumber Cooler $50

雖然喺初夏，但已感到熱浪慢慢引伸嘅張力，所以，友人杯特飲份外清爽，以青瓜、羅勒葉、檸汁及雪碧組合而成，的確味道清新怡人，令人暑氣盡消。 

Chocolate Lover $65

奶昔類有3款選擇，小弟較鍾意以朱古力為重點嘅「朱古力愛人」，朋友話望見面層啲忌廉就怕怕，哈哈！不過，攪勻之後，奶昔嘅味道香濃就不在話下，而且，幼滑非常，再凍啲就一流嘞。

菜嘅責任就落晌友人身上，雖則如此，都八一八餐牌裡有咩選擇。睇開小弟食評嘅朋友都知，老實講，肚內半點墨水都無，更無令人感動嘅詞藻，但就資訊搭夠，希望俾到睇食評嘅人有多啲參考。

Chop Chop Salad with Grilled Prawns $138

一向都喜歡以沙律作頭盤，開開胃之餘，又夠健康。Chop Chop Salad你可以睇為店家嘅田園沙律，可配蝦，亦可配烤雞（$128）或牛（$148），最得意喺除一般常見嘅沙律菜外，竟然加入西洋菜，效果又唔錯喎，仲伴有紅菜頭、紅椒、白菌、羊奶芝士、牛油果……等等， 配蜜糖芥末醬，輕怡味美。

Crispy Calamari $90
小食一向都喺香口嘢、唔健康嘅較受歡迎，哈哈，酥炸魷魚入口酥香軟腍，唧點檸汁，沾點沙律醬，可能令你內心無咁罪惡，其實，間中放肆吓都問題不大嘅。

Slow Roasted Chicken & Smoked U.S. Baby Back Ribs $295
人少少想試多啲，依道主菜就啱喇，有烤雞，又有豬肋骨。烤雞先慢煮再烤香，所以，色澤金黃嘅外皮十分香脆，而雞肉則保持到嫩滑，帶少少香草味，唔錯喎；豬肋骨肉質鬆化味濃，個醃醬又惹味，怕膩嘅，附上嘅酸椰菜就大派用場，小弟覺得再酸少少都無妨喎！

Garlic Prawns $180

屬於「飯桶」嘅友人，依一道蒜片蝦炒飯就合佢心意。個炒飯以蕃紅花嚟炒，有點西班牙大鑊飯嘅影子，飯粒分明而略帶獨特香氣，加上蒜香，整體不俗，至於啲鮮蝦，大隻又彈牙。

The Chop House Baileys Cheesecake $65

雖然百利甜酒芝士餅唔喺甜品之中最貴嘅一款，但用得店名「The Chop House」冠名，必有其過人之處。賣相簡潔，襯點點五顏六色嘅水果，好有夏日風情；餅底做得夠薄，而芝士嘅味道既濃香，又帶有酒甜，不過，大可放心，唔會有好重嘅酒味，再者，質感真喺做得好軟滑，喺一道挺有水準嘅甜品。

環境有相睇都知地方唔錯，又夠氣氛，服務又到位，添水、換碟都做到足，難得食物質素屬中上，雖則消費亦要有番咁上下，但都值得推介嘅餐廳。

個人評分
味道：7/10
環境：8/10
服務：8/10
抵食：7/10
平均每人消費：HK$325

餐廳資料：
The Chop House
尖沙咀彌敦道132號美麗華商場3樓3013C號舖
2295 3200