依度無攞酒牌，所以唔賣酒，但歡迎大家携酒暢飲，免開瓶費。故此，食友帶嚟香檳、白酒、紅酒同享，自問並非好酒之人，但淺酌無妨。
店家主打為8道菜嘅套餐，由前菜、餐湯、第一就小主菜及甜品每類別都有兩款選擇，而第二道大主菜則5揀1，連埋麵包籃、雪葩及花茶共8道，定價亦由所揀嘅大主菜而定（$660-$698），無加一，但今晚招呼我哋嘅Ivan服務極好。只做套餐，除有效控制成本外，更可以保持質素。事前訂位亦已收到店方whatsapp菜牌嚟，可以事先同佢哋講揀咩主菜，亦可以到時才落單又得。
麵包籃盛上喺一般嘅百吉包，但精彩之處喺啲醬，分別喺香草茄子醬、香草牛油及檸檬油醋。茄子醬加入香料做成，頗有印度風味；香草牛油好柔滑，當然相比其他兩款醬就顯得平淡少；檸檬醋酸香細緻，唔嗆喉，卻富檸檬香。
前菜有兩款選擇，上次食過就知，佢哋做菜嘅賣相好睇精緻唔在講，用料配搭都見心思。所以，無論你揀邊一款前菜，都要慢慢細味當中廚師嘅心血。
柚子檸檬汁醃紐西蘭藍青口肉及吞拿魚伴柚子沙律
一客就有3件之多，前菜而言都唔少，友人醒我一件喺試試，底層喺輕煎過嘅吞拿魚，再上喺以柚子檸汁醃過嘅藍青口肉，放上面仲有三文魚籽，拼上少少沙律菜及翡翠苗，一啖過放晒入口，除味道紛陳外，吞拿魚嘅半生熟、藍青口嘅鹹鮮，都令依道前菜變得有個性。
西班牙肉腸蘋果乳酪千層酥伴蘋果脆片及富士蘋果蓉
若非啲伴碟，真喺似甜品多過前菜。千層酥內夾有西班牙肉腸、蘋果乳酪，鹹、酸有序，又帶點微辣，實在有趣，千層酥又焗得香脆；除面層嘅蘋果脆片，底下仲有啲蘋果蓉，清甜好食。
餐湯同樣喺2揀1，眾友覺得個洋薏米忌廉濃湯好特別，篤定以此為選，小弟就犧牲吓，點個龍蝦湯，等大家都可以兩款湯品都試到。
法式龍蝦湯
唔使多介紹依一款經典嘅法式餐湯，深沉而橙紅嘅湯色，呷一口，口感絲滑，蝦味濃郁而帶點甘，印象中比起上次嚟飲嘅都無失準；而且，對比起上次，仲配上大大件嘅龍蝦肉，不過，若然啲忌廉拉啲花就連賣相都攞滿分。
意大利風乾牛肉，洋薏米忌廉濃湯
個名就已經夠特別，原來件風乾牛肉主要用晌伴碟之上，聽友人講伴點湯食，效果會好得意；至於個湯，打得柔滑，湯內有些少洋薏米，入口煙煙韌韌，整體味道不俗。
輪到第一道小主菜（Entrèe），鵝肝似乎喺眾多人嘅心水，不過，若然你唔喺輕易講出膽固醇萬歲嘅人，海鮮脆卷不失喺個好選擇。
香煎法國鵝肝伴三式杏甫及法國牛油包
睇見件鵝肝嘅件頭，以及厚度，就知廚師幾夠鬆手，再者，煎得外脆內嫩，整富油香；上層加上杏甫莎莎，下層喺烘得脆脆嘅法包，三者一齊放入口，當中所產生嘅化學作用，真喺妙不可言。伴碟嘅杏甫啫喱，清爽甜蜜，為此道小主菜加添不平凡。
法式焗海鮮脆卷
焗海鮮脆卷外型猶如巨型炸春卷，外皮鬆脆都不得了，入口又唔油，卷內有好多海鮮餡料，如蝦、墨魚、帶子粒、蜆肉……等等，沾一點檸檬牛油汁，少少檸檬清香更添美味，唯一挑剔喺頭尾兩尾收口做得厚咗，影響咗少少個脆口感。
蕃石榴雪葩
上次嚟都喺蕃石榴雪葩作間場，由於兩份第一道小主菜都屬味濃之物，為迎接稍後嘅第二道大主菜，一小球蕃石榴雪葩嚟清清味蕾就最好不過。雪葩蕃石榴味好突出，入口涼快，乜濃膩都去走晒。
卒之去到第二道主菜，餐牌共有5款選擇，有海鮮、有魚、有羊、有牛、亦有豬，務求大家都揀到自己啱心水嘅主菜。題外話，佢哋啲服務真喺做到足，好似上菜咁，由始至終，都喺做到同時上菜。
香煎虎蝦及北海道帶子意大利闊麵，干邑香草忌廉汁 $660
件虎蝦煎得甘香，啲蝦肉好爽彈，大廚鎅晒背方便食用，而北海道帶子厚身夠肉地，柔軟清甜，食得出用料有質素，絕無馬馬虎虎；至於個闊麵好特別，較一般嘅闊麵闊身，入口柔韌，掛上干邑香草忌廉汁，芳香好食。
法式紅酒燴牛膝伴松露薯蓉 $660
燴牛膝不愧喺店方推介，件牛膝燴到好軟腍，入口肉質好軟滑，而且，好夠肉香，又滲出紅酒嘅香味，大家都無不大讚件牛膝正；除伴有少少精緻嘅時蔬外，牛膝底下墊有好多松露薯蓉，做得幼滑又極富松露幽香！
M9和牛配黑毛豬火腿露荀卷及喜瑪拉雅山玫瑰鹽 $698
友人喺食肉獸，和牛喺心底之選，和牛要求五乘熟，果然煎得恰到好處，M9級既有肉味，又有油香，質感細嫩就唔使多講，就算唔沾啲玫瑰岩鹽，同樣好食；唔單單有時蔬、薯蓉，仲配上黑毛豬火腿露荀卷，鹹香中有份爽脆。
花茶
食完主菜，來一杯花茶，目的唔單止稍稍消滯，仲可以讓胃納緩和一下，花茶嘅清幽香氣亦叫人可更放鬆。
意大利芝士餅
既然喺花思，又點可以因循，所以，甜品之一嘅意大利芝士餅賣相亦別樹一格。馬卡風芝士之內，並搵唔到滲透咖啡酒嘅手指餅，取以代之喺咖啡啫喱粒。大家對此都較為兩極，有人覺得好有新意，柔滑嘅芝士漿夾雜甘苦嘅啫喱粒，好有衝擊感；相反，就覺得唔太夾，無咗意大利芝士餅原有嘅神髓。
焦糖燉蛋
依一道焦糖燉蛋就嚟得大路，雖然並非法式燉蛋嘅做法，但焦糖一樣好焦香沉厚，燉蛋蛋味香濃，又很嫩滑，整體唔會過甜。
餐廳每晚只做一轉客，所以，大可以慢慢嘆，我哋亦食足三個幾鐘，談天說地講過不停，真喺此「喜」彼「樂」。
個人評分
味道：8/10
環境：8/10
服務：9/10
抵食：7/10
平均每人消費：HK$660
味道：8/10
環境：8/10
服務：9/10
抵食：7/10
平均每人消費：HK$660
餐廳資料：
Amina² Cuisine
銅鑼灣富明街2-6號寶明大廈4樓J室
6883 0021
銅鑼灣富明街2-6號寶明大廈4樓J室
6883 0021
沒有留言:
發佈留言