聚德軒 Jade Terrace Restaurant：情軒一線

中學年代，總會因成績關係，轉往唔同嘅班別，嗰時所讀嘅中學，精英班唔喺A班，而喺E班。隨着轉入唔同嘅班別，認識到唔同嘅同學組合，今晚一同飯聚嘅舊同學，算喺保持聯絡得最密嘅一組，不過，對上一次嘅聚會已經喺2014年年初晌德福金滿庭嘅事，今晚嚟到尖沙咀聚德軒，又再讓我哋班老嘢大話當年。

因為好幾位舊同學已為人家長，亦有帶啲小朋友出嚟一齊食飯，所以，我都專登安排得食早啲，6:30pm入席，未夠7:00pm就有得食。故此，早段酒家未喺好多客，上菜亦都較快手，而我哋仲被安排坐近窗一角，感覺更輕鬆。

揀聚德軒因為佢同德興喺同集團，其實佢本身個價位比德興貴少少，但卻喺有提供德興啲平價全包宴，就好似最近推廣嘅「翠樂宴」，星期一至四定價每席$1,660、半席$830，而星期五、六、日及假期為每席$1,990、半席$995，包晒茶芥、加一、啤酒兩枝（一枝啤酒換兩罐汽水）、橙汁兩渣，非常抵食。

全豬全體賀喜慶

首道菜式喺乳豬全體，睇身形就知喺細細隻無超齡嘅乳豬仔，燒得皮脆肉香，皮下脂肪極少，卻仍帶有油香，正喎。

彩虹蚌仁響螺片

果然夠彩虹喎，有三色椒、翠玉瓜等蔬果，感覺好夏日，而蚌片及螺片都爆得爽口，幾好食！

菌皇乾燒紅海蝦

啲紅海蝦一來夠大隻，二來乾燒後排列整齊，令賣相好睇又夠睇頭，仲鎅埋背方便食，唯可喺肉質一般，又唔算霉，但唔夠爽；紅海蝦之下墊有好多雜菌及蜜糖豆，炒得惹味。

松露鳳凰黃金卷

舊同學話食落無松露味，根本就喺一般海鮮卷，但我話我食嗰件又唔喺喎，有點點松露味，又有雞肉，條黃金卷炸得脆口。原來再問問大家，真喺有啲喺松露鳳凰， 但有啲唔喺，搏大霧搵咗少少笨。

竹笙花膠蟹肉翅

成為無翅之徒後都好耐無食過翅，當然喺講真魚翅嗰啲啦，但今晚依個可以安心食，因為喺無魚翅入饌，只有 竹笙、花膠、蟹肉，仲有唔少蟹肉添。

福綠鮑魚菰玉掌

唔知大家識唔識分鵝掌定鴨腳，小弟就唔多識分嘞（估計都喺視乎其大細），不過，大多數酒樓做依道菜都唔會太差，啲鵝掌炆得夠腍，啲茨汁唔好搞到好似膠水已收貨。至於配菜嘅鮑魚菰軟腍，個茨汁夠晒香濃，算交足功課。

清蒸游水海石斑

條斑都幾大條，睇落三斤有多，食魚就最好清蒸，因為條魚嘅質素好唔好一食就知。一拆開條魚起肉，無黐骨，入口嫩滑鮮甜，證明蒸得啱啱好。

當紅脆皮一品雞

正所謂花無百日紅，依隻一品雞就只有一剎那當紅，轉眼被剿滅入晒我哋個胃度，哈哈。隻雞個外皮炸得非常之香脆，入口一啲都唔油，雞肉亦比預期嫩滑，抵佢當紅踲。

錦繡烏冬

唔知個烏冬錦繡晌乜嘢，有啲銀芽、韮王，可以講得喺豉油皇烏冬，幸而炒得都唔差，醬油沾勻每條烏冬。

蓮茸壽桃

個套餐當普通飯又得，當壽宴賀一賀都得，因為，臨尾有一籠壽包。包身軟綿綿，啲蓮茸清甜軟滑，最啱食喺無過甜嘅弊病。

時令水果

只喺得碟橙，感覺欠啲誠意啫，多一、兩款生果就唔會有種好虎頭蛇尾嘅感覺喇！

一坐就坐咗3個鐘，席間話題總講不開往事，講吓講吓，原來部份同學嘅老公都喺晌石硤尾讀書（我哋本身就喺晌石硤尾大），雖然以前未有機會撞到，有緣嘅自然一線牽。

個人評分
味道：8/10
環境：8/10
服務：8/10
抵食：8/10
平均每人消費：HK$220（以9個大人計）

餐廳資料：
聚德軒 Jade Terrace Restaurant
尖沙咀麼地道67號半島中心2樓
2311 8888