良記餐廳（老鳳冰室）：老奉本色

傳統冰室晌香港賣少見少，執一間就少一間，不過，近幾年又興番起啲懷舊冰室，雖然只可以叫做「仿」冰室，但內裡嘅陳設卻又幾令我依等中坑懷念。之前曾幫襯過羅麥記、南龍、金記好幾間懷舊冰室，從食友嘅食評見到深水埗都有一家「老鳳」，我作為半個深水埗人，無理由唔撐吓喎，是夜就「老奉」撐場，順便落鴨寮街買個USB充電插座將來旅行用。

被標籤為懷舊冰室，懷舊嘅裝修喺賣點之一，入到店內，懷舊之物一件接一件，古老大鐘、懷舊電影海報、黑白舊相、舊式廣告……件件都入型入格，務求讓大家重溫70年代嘅情懷。大家明白，鋪租貴，地方淺窄，搭枱喺潛規矩。

卡位旁掛起嘅「信箱」所插住嘅信件就喺餐牌，而個信箱印住荷里活道大酒店，第一時間就諗起尹光首「荷里活大酒店」：

荷里活有間大酒店，

有三個肥呀婆學踢波，學踢波，
你又踢，佢又踢，卒之就踢咗落河……
尹光喺乜水？可能好多90後都真喺唔多識佢。

始終都喺冰室，嚟嚟去去嘅食物款式都喺嗰幾大類，小食、一丁、通粉、碟頭飯、奶茶、咖啡……等等，價錢亦算相宜。不過，睇得出店主晌菜式上都加咗唔少心思，改良、變革令菜式加啲亮點，唔喺單賣環境，希望食物都為客人帶嚟點點驚喜。

此外，枱上放有多款醬汁或調味料，比一般茶記有心。

芝士焗大蝦保齡球 $78

咩叫保齡球？即喺以農夫包當餐碟，其他，依個做法都興咗段日子，唔喺咩新嘢，但晌度個包殼夠脆，包面又搽咗啲蒜蓉，另備有一兜芝士汁，撕開個包沾芝士食，正呀，所以，最後一滴芝士汁都無晒；而啲大蝦都幾鮮爽，唔喺雪藏貨色，配炒飯底，整體真喺唔錯。

原味波波冰鎮奶茶 $24

其實晌茶記，紅豆冰喺一份回憶，奶茶喺一種心水，難得有個將兩者合而為一嘅選擇，真喺二話不說揀中佢。因為點咗個飯，所以，依杯特飲只需加$14就可以喇，足足慳番10皮。由於，以奶茶雪成波波冰當冰用，所以，杯奶茶由頭飲到尾都無淡過，個茶底又夠香，兼有唔少清甜嘅紅豆食，哈哈，滿足晒幾個願望。

深水埗屬於舊區，區內亦有唔少中上年紀嘅人，唔知「老鳳」可唔可帶俾佢哋絲絲懷舊嘅慰藉呢？餐廳個名令我諗起「老奉」一詞，幸福真喺唔喺必然，無一樣嘢喺你「老奉」會有，如果你睇乜嘢都喺覺得比人少、比人差，眼前永遠只「剩」半杯水，而非「有」半杯水，「老奉」不知不覺間已成為你人性嘅本色！

個人評分
味道：8/10
環境：7/10
服務：8/10
抵食：8/10
平均每人消費：HK$92

餐廳資料：
良記餐廳（老鳳冰室）
深水埗基隆街216號地舖
2660 8136