門口擺着九層塔蒸鍋，已成為其生招牌。因為本身都幫襯過大坑店，知道都好旺場，所以，訂枱於紅磡店時，都選擇訂早啲，一來人客無咁多招呼可能到位啲，二來早啲嚟心態上覺得食材都大機會揀手啲，哈哈。此外，晌門口嘅易拉架所見，仲有啲午市套餐（$58-$68），另加$15更可享1小時自助少律吧及任添啡茶，如果食海鮮塔可享八折優惠。
對比起大坑店，依度真喺大好多，座位編排都闊落啲。新簇簇嘅裝修，一室暖木色系，予人柔和溫暖。最鍾意挨牆嘅卡座，騷擾度較少，不過，嗰啲算為6人座，我哋則只有4人而已。
餐枱下面有個位可以放吓袋或背囊，唔夠擺嘅話，佢哋仲有啲儲物盒，咁就唔使將背囊放晌地下啦。
大廳夠大之外，仲有幾個廂房，裝修幾骨子，好適合一大棚老友聚一聚，或一啲大家族搞活動。不過設有最低消費，每人$600，我等慳鬼都喺坐大廳可以喇！
睇睇餐牌，基本上無咩太大變，都喺有以前幾款海鮮塔：釜山塔（$329 / 位）、首爾塔（$398 /位）、濟州塔（$568 / 位），全部兩位起，需加一，當然加價就在所難免， 不過，以首爾塔加幅最少，只喺由$388加到去$398，已有12款海鮮食材，亦喺我哋揀首爾塔嘅原因。
仲有，多咗啲高檔嘅前菜推介：醬油蟹、醬油蝦，不過，收費唔平！另外，每款套餐亦可以額外俾錢追加蔬菜拼盤（$58 / 盤）、阿拉斯加蟹（$1,600 / 隻）、和牛（$168 / 8件）、黑豚肉（$138 / 8件）。
有啲咩食，大致都介紹過，不過，好搞笑仲有一款海鮮塔：仁川塔，無價錢，只喺話海鮮付運中……！
飲品方面，除以前都有嘅韓國真露、啤酒、罐裝飲品、濟洲橙汁……等等外，仲多咗紅白餐酒。酒就唔多啱我哋，所以，飲飲濟洲橙汁、韓國檸七、提子七喜都可以喇。
韓式前菜
趁個海鮮塔蒸到食得之前，先食住啲韓式前菜：白菜仔、韓式泡菜、醋醃青瓜及酸椰菜，今回又無咗啲我鍾意嘅薯仔。
不過，唔知喺咪見我哋鍾意食啲韓式前菜，中段又主動送多4小兜上嚟，分別喺：紅豆黑豆、蕃石榴、海草絲及大豆芽，黑豆同大豆芽最好食，紅豆硬到好似未煮過咁。
食法喺點？相信依家有唔少都知道其食法，所以就唔多再累述，貼上餐牌中嘅介紹，一睇就明。
店家提供柚子豉油、鮮茄辣醬及海鹽麻油，機本上為求食其原有鮮味，無乜需要點用，不過，有啲人或許食慣味重之物，而有啲海鮮又確喺海水味較重，適當沾些少蕃茄辣醬調和吓都可以。
海鮮塔，要等蓋面溫度計去到85°C先可以開始食！
第一層：蟶子、象仔蚌（伴車厘茄、勝瓜、韮菜花、本菇）
雖然餐牌寫象拔蚌，但點睇都似象仔蚌，不過，跟蟶子兩者入口同樣鮮甜而爽口，小弟就較喜歡沾少許柚子豉油提鮮。
第二層：元貝
無花假，亦都無花巧，原隻元貝清蒸，考嘅喺食材質素。先試一啖，果然厚肉卻爽彈；再試試蘸點海鹽麻油，感覺仲好食，最後，別忘記殼上嘅湯汁，集清、鮮嘅精華。
第三層：海蝦（伴金菇）
海蝦唔喺一般蝦毛仔，隻隻都好大隻，蝦肉非常彈牙，又足鮮蝦味，都喺稍稍鍾意配點柚子豉油嚟食。
第四層：新鮮花尾龍躉、北寄貝（伴車厘茄、木耳）
龍躉以紹菜墊底，唔怕會黐住個蒸籠，亦唔怕唔夾散晒，肉嫩就唔在講，魚味鮮甜，正呀；而北寄貝好大隻，入口柔韌鮮甜，跟刺身喺另一感覺。
第五層：大蚌、大花蛤（伴木瓜）
一籠滿滿大蚌同花蛤，無論邊一樣，都帶有一朕朕海水鹹鮮味，印象上，今次好似好過對上一次食，入口無咁韌，翻睇舊食評，原來之前喺放第六層，易蒸過火，依次所見就放咗晌第五層。此外，啲木瓜極之清潤！
第六層：沙巴肉蟹、蝴蝶蚌（伴秀珍菇）
每人有半隻沙巴肉蟹，雖然，肉蟹唔算好大隻，但蟹肉非常鮮甜，內裡仲有少許膏，最有肉位當然喺蟹鉗，拆好慢慢嘆；至於啲蚌，因為上層都食咗唔少同類嘅貝殼類食材，所以，到此刻再食就顯得無咁特別，可以嘅話，轉轉其他海產仲好。
第七層：鮑魚、日本蕃薯（伴白蘿蔔、冬菇）
據介紹鮑魚喺嚟自大連（可加$48 / 位轉南非鮑魚），一人一大隻，夾住食，食得爽，鮑味不俗，口感柔韌富彈力；啲蕃薯好香好粉，又夠甜，連皮食一啲都唔好蹝。
第八層：海螺、日本南瓜（伴粟米、黃牙白）
啲海螺麻麻哋，因為細粒無乜肉地，而且，入口有少少沙；南瓜同粟米可以話喺超甜品種，食落確在清甜，海螺反而變咗「大茄」。
第九層：韓國泡菜湯
因為曾試過韓式豬手湯及人蔘雞湯，又唔想加錢試其他湯底，咁不如就試試韓國泡菜湯。咪以為淨得泡菜，滾起嘅泡菜粥仲有韓式年糕、大蜆、墨魚仔，雖然加入唔少海鮮精華，但都喺以泡菜味為主導，而且，入口都頗辛辣刺激。除非你好鍾意泡菜，否則，小弟都喺覺得豬手湯做粥式最好。
唔似去食自助餐，對住啲凍海鮮，唔使搏命要搶嘅，晌度慢慢嚟嘆一樣捷足「鮮」登。朋友今次第一次食蒸海鮮塔，當然新鮮感比小弟大好多，不過，食材方面始終都交到貨，再嚟食都無叫人失望。
個人評分
味道：8/10
環境：8/10
服務：8/10
抵食：8/10
平均每人消費：HK$465
環境：8/10
服務：8/10
抵食：8/10
平均每人消費：HK$465
餐廳資料：
九重鮮 Steam Fresh
紅磡黃埔花園11期地下G26號
23210188
九重鮮 Steam Fresh
紅磡黃埔花園11期地下G26號
23210188
沒有留言:
發佈留言