老實講，「公主」真喺有少少難搵，眼見信和廣場，都好似唔見入口，卒之兜咗個圈晌告士打道先搵到啲疑似後樓梯嘅入口。上到去個環境佈局又有啲「騎尼」，餐廳被中間嘅通過鎅開左右兩邊用餐區，明顯喺個商場嘅設計差。
一邊挨近廚房位，其實好開揚，不過較少人揀坐依邊；相對，另一邊以大窗簾遮一遮，又有落地大玻璃對住出面告士打道，算喺有少少維港景。然而，天花上嘅水晶燈、牆上嘅大油畫、宮庭氣派嘅座椅、喱士繡花嘅餐枱布，都令整體佈置好優雅。
就連餐碟，以及摺成玫瑰花嘅餐巾，都足見好多擺設上細節位都力求盡善盡美。
餐枱上早已放上粉紫色暗花Princess Tasting Menu餐牌，以絲帶及蝴蝶作裝飾捲起，讓人覺得有份隆而重之之感。依個新推出嘅套餐，分為8道、10道及12道菜嘅選擇，定價為$780、$880、$988，同枱朋友唔需要食同樣嘅配搭，大家大可按個人喜好及食得到嘅份量作取捨。需至少一天前預約，並收加一服務費，睇嚟唔平，但都喺店中招牌或受歡迎嘅菜式。而且，試過之後，無論選用食材、烹煮方法，都盡見每一環心思，要俾另一半有驚喜，喺個不錯的選擇。
公主曲奇
聽朋友講，「公主」起初晌中環賣曲奇及蛋糕起身，亦做得有聲有色，後尾輾轉搞咪餐廳。怪唔之得，一早晌枱上已放有自家製嘅曲奇招呼客人，仲有好多款口味，切成細細粒，的的骰骰。
求先嚟得匆匆，原來門口亦擺有多款曲奇作零售，晌餐牌亦有介紹，口味確喺與眾不同，分成多個系統，如堅果系列、鹹味系列、花茶系列、辣味系列……，非常特別，有10片、半磅及一磅裝，而且，包裝精緻。
迎賓小食
餐前會有三式小食歡迎你，因為次次不同，所以，唔會列明晌餐牌中。今回有黑毛豬肝松露米餅、蟹肉牛油果脆餅及黑魚子醬蛋沙律撻，三款小食都各具特色，米餅鹹脆，豬肝醬好綿香，點上少少金箔自然貴氣十足；脆餅上嘅蟹肉份量十足，鹹鮮好食；蛋沙律撻脆口到不得了，黑魚子醬有畫龍點睛之效。
心心相印（紅菜頭，黃菜頭配松子仁，西瓜）
小食過後，開始12道菜嘅晚餐，第一道屬前菜類，以紅菜頭、黃菜頭、西瓜裁成心形以配合主題，再加少少裝飾，並畫上兩道紅菜頭菜蓉，賣相清新而有藝術感。幾樣食材本身好鮮甜，黃菜頭更喺第一次食，味道跟紅菜頭無乜分別，最神來之筆喺心心之下墊有少許青檸芝士醬，酸與鹹嘅融和。
園林牧曲（香煎椰菜花配醋漬葡萄，薄荷油）
唔睇餐牌，真喺睇唔出佢由上而下成碟都喺椰菜花，仲「一雞三味」以3種唔同手法嚟處理椰菜花，底層喺配上葡萄嚟醋漬，中層喺海鹽香煎，上層壓薄烘乾成薄片，非常有創意。個人較鍾意中層香煎，因為食到椰菜花嘅清甜味，下層爽爽脆脆，但就醋酸味稍搶，而上層口感煙韌得意，卻嫌佢味道寡咗啲。
珍珠貝灣（香煎帶子配粟米茸，菜甫，臘腸）
睇佢個配搭已覺得喺一道好有趣嘅菜式，原隻帶子連殼，底下伴上粟米蓉，再以粗鹽托起，賣相好有亮點。帶子煎得恰當好處，焦脆嘅外層包住柔嫩嘅肉心，襯點點菜甫及臘腸 幼粒，有點神來之筆之感；墊底嘅粟米蓉更出奇地咁甜滑，粟米味濃郁地爆出。
火山谷（醬油豬五花，泡菜蘋果塔）
五花腩喺人都知喺肥膩之物，但烹調得好，配搭得宜，可以完全喺另一回事，依一道「火山谷」正好喺一個良佳嘅示範。帶點韓風嘅醬油五花腩本身入口已經唔覺油膩，再以泡菜及蘋果條作配搭，一啖放晒入口，四味紛陳，口感又富層次，讓人有驚喜嘅前菜。
魔法情緣（花彫酒鵝肝配焦糖燴梨，無花果，香脆鍋巴）
試咗幾道前菜，魔法又豈止喺依一道吖。鵝肝做成慕絲狀並以唧花為成品，功夫就肯定比單單煎鵝肝多，鵝肝入口絲滑甘腴，帶微微酒香，塗上鍋巴之上，加片焦糖燴梨、無花果粒，所產生嘅魔法喺唔輕易用三言兩語所拆解。
荷塘映色（清雞湯配蟹黃牛肝菌意式水餃）
一輪前菜小點，來一客熱辣辣清雞湯暖暖胃，上枱時店主教落要趁熱飲，咁先感受到嗰份清新之意。個雞湯唔單止清澈見底，半點油份都無，更喺淡雅清潤；配以蟹黃、牛肝菌作料嘅意式水餃，細細粒卻幽香盡出，仲有就連湯中嘅瓜粒都以小湯匙刮成球形，加點金箔，務求做到荷塘映色嘅意境。
香茅雪葩配冬陰功曲奇
西餐好多時都會以雪葩做間場，晌度都唔例外，不過，特別在於雪葩口味，一球香茅雪葩實在難忘，香茅味非常突出，配上點點冬陰功曲奇碎，很有心思嘅組合，極具東南亞風，喺略嫌曲奇碎灑得少。一如所有菜式，佢哋好重視個賣相，所以，既以千層酥撻殼墊底，又以食用日本櫻花和蝴蝶作點綴。
太平洋戀曲（龍蝦配青芒莎莎，青檸芒果蓉）
進入主菜部份，先嚟嘅龍蝦，仲要以原隻鉗位為主打，實在貴氣。龍蝦以慢煮先處理，再以火槍灸燒，晌鮮甜之間，隱約有微微焦香，配合青芒果蕃茄莎莎，帶出陣陣如海洋般清爽，而另一件龍蝦肉搭上黑魚籽，鹹鮮盡顯，但底下嘅青檸芒果蓉，酸甜細緻，卻起咗緩和嘅作用。
橘豚蜜語（燒慢煑豬腩肉配甘筍香橙蓉）
第二道主菜再次用上腩肉，除咗件頭大啲之外，再以慢煑處理，盡量保留肉汁及其肉味濃度。基本上，選用日本黑毛豬已經喺有心之作，慢煑後再燒，豬腩肉甘香不膩，肉味濃郁，配甘筍香橙蓉，以及些少醋汁，有去膩之用。
黃金海岸（海膽煙肉藜麥幼蛋麵）
餐廳總怕食客投訴食唔飽，所以，接近尾聲時候，一道「黃金」幼蛋麵就一連令你捧腹而回。麵條既用海膽同煮，又以大大粒三文魚籽作裝飾，真喺一身金黃；味道上，其實之前都食過以海膽做嘅意粉，總感覺海膽熱煮效果唔理想，所以，依道幼蛋麵都有點類似嘅情況，但論基本，麵條極具咬口，下嘅海膽應該唔少，又混入煙肉碎及藜麥，味道算不俗。
草莓仙子
店家所做嘅甜品別具特色，而依一道「草莓仙子」亦喺佢哋嘅招牌甜品之一，散叫都要$138一客。而草莓仙子其實喺士多啤梨乳酪、菠蘿花及熱情果雪糕3者所組成，更以前者雪凍做成高跟鞋最為話題性，味道酸酸甜甜，好香士多啤梨味，而熱情果雪糕入口都十分清新，反而深紫色嘅菠蘿花最估佢唔到做法咁手工嘢，先切成薄片，以紅菜頭汁染紫，再烘乾，咬落有點煙韌口感，味道甜蜜。
薔薇甜心
依個亦喺另一主打招牌甜品，散叫價需要$108一客，所以，個套餐散計番出嚟，絕對超值。食到尾，每道菜嘅賣相都真喺賞心悅目，深紫色嘅玫瑰花，有人會覺得幽怨，有人會覺得優雅，查實佢喺以藍莓果肉打蓉加入青檸汁所做嘅雪冰，入口冰涼酸香，好香藍莓味；底下則喺荔枝雪葩，荔枝味香甜突出，清爽怡人，一定教女生愛上。
鮮奶咖啡
套餐包一杯餐飲，小弟都喺喜歡選上鮮奶咖啡，不過，依度嘅咖啡出名在於3D嘅拉花，晌無乜要求下，咖啡師幫我整咗杯「小豬」，識我嘅人都知小弟喺鋼條骨格，大抵希望我食番肥啲啩！然而，咖啡嘅質素不俗。
未嚟之前，真喺無諗過佢哋對做菜咁有熱誠，晌依家個社會仲講呢啲，已經好少有。餐後，更有機會聽到店主分享佢做餐廳嘅理念，想以一個合理嘅價錢，食到具質素，烹煮健康嘅菜式，所以，晌度食一餐飯，真喺唔好當上去啲café仔飲杯咖啡，食件蛋糕，迤吓迤吓咁，而喺有一份尋找真味「公」略嘅覺悟。連埋道迎賓小食，何止12道菜，既唔喺賣萌作包裝，做菜有心思而配搭不紊亂，店主不時問問食客意見，絕唔會不問不聞為賺錢就算，值得晌特別嘅日子帶太太嚟當一晚公主，以表彰佢哋晌家中嘅勞苦「公」高。
個人評分
味道：9/10
環境：8/10
服務：9/10
抵食：7/10
平均每人消費：HK$1,090
餐廳資料：
公主 Princess Cafe
銅鑼灣告士打道255-257號信和廣場上層7號舖
2866 9062
沒有留言:
發佈留言