其實講話佢喺賣日式西餐，又似喺唔一樣，因為有啲地地道道嘅日本菜式，又或西式菜式。不過，部分夾雜兩系所長，做出別樹一幟嘅風味。
食物種類走貴精不貴多嘅路線，成個餐牌底面兩大頁，圖文並茂分咗前菜、沙律、刺身、主菜、飯、湯及甜品幾大類別。另有6道菜嘅晚市套餐，有前菜3點、沙律、主菜、食事、餐湯及甜品，定價以所選嘅主菜計，都只喺180-240 + 10%，非常抵食。飲品可以額外加錢配送。
前菜3點
是夜嘅前菜喺炸牛蒡條、薑汁煮蝦及雞泡魚乾，以小木盒托出3點，賣相精美。
炸牛蒡條
牛蒡條有多方嘅營養，上網摷一摷就知，無謂多講，而炸牛蒡條做得粉漿夠薄，入口一啲都唔油，酥香而有咬口，好食；
薑汁煮蝦
兩隻鮮蝦緊扣住，放上點點黑魚籽及金箔，立時貴氣加倍，而鮮蝦清爽，滲出淡淡薑味，個人覺得恰到好處，太濃就可能搶咗蝦鮮味；
雞泡魚乾
晌啲居酒屋常見嘅小食，咬落鹹鹹香香，口感柔韌，燒到唔會好乾身，雖然只喺沾一般嘅沙律醬，但灑少少七味粉，感覺都變得唔同啲。
蟹肉沙律芝麻汁
依道蟹肉沙律我同朋友都超讚，沙律菜（更加入珍珠筍、蜜糖豆……）新鮮爽脆，芝麻汁充滿芝麻香，依啲做得好都喺基本。讚就喺鮮拆嘅蟹肉，夠晒鮮甜，其次，面頭粒車厘茄淋上少少焦糖，真喺一絕，入口有一層層脆口，焦糖跟茄味又夾到。細節位唔止喺咁，載沙律個碗摸上手喺冰涼，喺明顯雪過嚟先用。
套餐內嘅主菜其實都喺晌主餐牌中嘅主菜裡輪流推出，不過，問過店員，兩者份量其實唔一樣，好似小弟所試嘅法國春雞，主餐牌標$168一客，喺有全隻，而晚餐包埋其他咁多嘢先$180，皆因喺半隻份量，但查實作為晚餐嘅一部份已好夠食。其他主菜選擇仲有澳洲和牛、紐西蘭羊架、柚子胡椒牛油大蝦……等等。
柚子胡椒虎蝦 $180
虎蝦賣相似喺鐵板燒嘅做法，既去殼，又起肉，仲分成一小口一小一件，非便食用；而一上枱，胡椒香氣四溢，入口卻又嗒到柚子嘅甜味，兩者平衡唔會互相搶味，再者，蝦肉爽口彈牙，唧少少檸汁，更能夠吊起蝦肉鮮味盡出，實在叫人再三回味。配菜仲有冬菇、雞脾菇及翠玉瓜，都喺煎得香口好食。
大大隻虎蝦頭，咪睇佢得個樣，內裡仲有少少肉，兼且有點點蝦膏，食得真喺唔好嘥！
麥粒味噌燒法國春雞 $180
咪睇佢烤到燶燶哋樣樣衰衰，其實嗰啲喺味噌而已，感覺還似喺加咗少少薑蓉。雞皮烤得非常香脆，而雞肉嫩滑到不得了，鮮嫩且富肉汁，皮下脂肪又唔多，每口又帶味噌嘅味道，認真好食。同樣，配菜簡簡單單伴上冬菇、雞脾菇及翠玉瓜。
蔥吞拿魚碎壽司飯
食事會有烏冬、意粉或壽司飯……等等選擇，先嚟一客蔥吞拿魚碎壽司飯，因為之前又前菜、沙律、主菜，所以，個食事份量唔會好大，同樣做得精緻。雖然啲吞拿魚刴得細碎，但依然油潤鮮香，珍珠米亦都黏糯有飯味，伴上漬醃蘿蔔、薑片，好易三扒兩撥就清晒！
迷你咖喱牛肉飯
睇落好似無咩特別，其實嚿飯搓成嚿飯糰咁，不過，打平放先唔覺，咖喱牛肉好香，濃郁嘅咖喱味帶點點甜，咖喱牛肉內又混有少少薯仔粒，認真不俗。
甘筍忌廉湯
之前曾參閱過其他人嘅食評，見一道甚具和風嘅海鮮土瓶湯好吸引，可惜，今次嘅湯品喺西式嘅甘筍忌廉湯，個湯嘅質感較杰身，睇得出用足甘筍，所以味道濃郁，但有欠幼滑度。
紅豆湯年糕、馬卡龍
甜品嘅賣相好精緻，以日本陶瓷碟盛上，先試年糕，紅豆好清甜，不過唔知喺咪配合啲馬卡龍，所以，無做成「湯」，而以小匙羹盛載，份外的骰，但喺年糕經煎過，外皮稍韌，入口亦黏牙，令道甜品有點美中不足。 但馬卡龍甚有水準，小弟嘅喺檸檬（淡黃）及開心果（翠綠），友人嘅喺紅桑莓（粉紅）及雲呢嗱（淺啡）；入口無想像中過甜，外層帶脆，內層煙韌，味道突出。
小店好多時唔單止賣美食，仲有就喺貼心嘅服務，整晚6道菜，都喺等我哋食完一道，收拾好，再隔一小段時間上另一道菜，成個用餐時間大概個半小時，唔會太急，亦唔會等得太耐，令人感覺好流暢。此外，每一道菜都喺同時上枱，唔會前後腳咁，讓大家都可以同一時間享用美食，所以，都喺服務上嘅加分位，再者，添水，收拾，各項服務都讓人感受到店員嘅殷勤，抵讚，值得再嚟留下「手指紋」！
個人評分
味道：8/10
環境：8/10
服務：8/10
抵食：8/10
平均每人消費：HK$200
環境：8/10
服務：8/10
抵食：8/10
平均每人消費：HK$200
餐廳資料：
The Fingerprint
上環蘇杭街100號地下
2805 5298
上環蘇杭街100號地下
2805 5298
沒有留言:
發佈留言