餅家 the Bakery：好友狂嚐曲（50）

早前友人所送嘅聖誕禮盒（蝴蝶酥及杏仁酥），已對「餅家」嘅出品已有深刻印象，貫徹店家嘅宗旨：用心製作；估唔到時隔無耐，又收到食友嘅好意，不約而同，又喺「餅家」出品，但今次就唔喺乜酥物酥，而喺曲奇，正正又可以為小弟嘅「好友狂嚐曲」多添一篇食評。

朋友話，佢哋嘅曲奇有成8、9款，部份口味好特別。而小弟獲贈嘅喺其中兩款口味，每款都以深藍或純白麻質布袋袋住，簡潔美觀，可以循環再用。

黑朱古力曲奇

每袋有10片曲奇，全部獨立包裝，夠衛生。打開包裝，已有香濃嘅朱古力走出嚟，入口唔單只鬆脆，少甜，而微微甘苦，做得頗出色嘅曲奇。

玫瑰小紅莓乾曲奇

唔講得笑，真喺有一朕玫瑰花香，所以，印象上已覺得非常特別，曲奇內混入好多小紅莓乾，所以，曲奇有鬆脆嘅口感外，又有份煙韌嘅咬口。

事後瀏覽一下官網，原來仲有朱古力榛子曲奇、咖啡杏仁曲奇、開心果曲奇、洛神花全麥曲奇、伯爵茶曲奇……等等，睇見都吸引呀！

個人評分
味道：9 /10
環境：- /10
服務：- /10
抵食：- /10
平均每人消費：HK$0（好友送贈）

餐廳資料：
餅家 the Bakery
柴灣泰民街16號康翠臺商場L5 4A舖
2285 9928