菜式有散點，亦有套餐選擇，睇落套餐較為划算多啲。而套餐包咗餐前小食、餐湯、前菜、主菜、甜品及餐飲，收費取決於主菜嘅選擇。由於稍後時間會轉餐牌，所以，部份菜式有所變動已轉為新嘢。
鮮拆蟹肉他他杯沙律
以雞尾酒杯盛載嘅餐前小食，一啲都唔小食樣，更喺華麗登場。店員溫馨提醒，因為喺鮮蟹拆肉，雖然可能性低，但都怕有點點蟹殼碎。蟹肉入口果然好鮮味，伴有黑魚籽及三文魚籽，鹹鮮十足，味道更富層次。原來夾雜晌沙律菜中嘅喺食用花，既美觀，又可食用。
活龍蝦石鍋濃湯
賣相好特別，以紙包形式，店員話之前唔喺咁，依家少少改頭換面，但味道不變。一剪開個「紙袋」，龍蝦味一湧而出，由於用咗韓式石鍋，更耐熱，影多陣相都唔怕攤涼咗。滔一小口，口感順滑，味道超濃郁，有些微甘苦，而大大件波士頓龍蝦肉，咁先食得過癮。
波士頓龍蝦酥盒
龍蝦湯都意猶未盡，再嚟多個又喺以龍蝦做嘅前菜，搵酥皮做成脆盒，放入龍蝦蘑菇忌廉汁，蝦肉好鮮，圍邊嘅酥皮好鬆脆，不過「盒底」唔知何故頗韌。
青檸雪葩
試咗幾道菜之後，又喺時候清清味蕾，賣相清爽嘅青檸雪葩，除咗伴有士多啤梨及青蘋果做裝飾，最有驚喜喺雪葩之下加入青蘋果粒及乳酪，好有畫龍點晴之效，清新好食！
稍稍抖一抖之後，就喺主菜進場，未食之前，店員為我哋奉上餐刀盒，有重有輕，選好一把自己心水，慢慢享用各款主菜。值得一提，就喺佢哋個出菜，每個類別嘅菜式都會一次奉上，服務夠專業。
香煎鵝肝意大利飯 $388
咩都唔使講，單睇件鵝肝嘅尺寸已值回票價啦，厚切超大件，煎得或面都非常甘香，入口油潤粉嫩，飯粒煙韌極有咬口，好滿意！
海龍王紙包深海鱸魚 $448
再一道紙包菜式，但今次用嘅喺高溫玻璃紙，頗特別。雪白嘅深海鱸魚有4大件，入口非常嫩滑，肉質細緻鮮味；而下面墊有唔少鮮露筍、本菇、意大利黃瓜……等等，浸晌魚湯中，味道鮮甜。當然，別錯過窩內魚湯，否則就走寶喇。其中一位友人喺魚痴，真喺食得佢「魚」痴如醉。
堡雲蘇紐西蘭羊鞍 $488
羊鞍就最啱我啦，咪睇佢好似好生，已經唙4-5乘熟，切落又唔會有血水滲，所以，肉質細嫩，少少羊羶，突出到羊肉嘅個性；加上以堡雲蘇處理，讓羊鞍嘅邊位因黐滿麵包糠而入口更香脆。伴菜有唔少鮮露筍及迷你甘筍，店員話個黑松露燒汁喺沾伴菜食，話怕燒汁搶咗啲羊味，但錯有錯著，沾羊鞍都唔錯喎，仲有，一小兜喺蘑菇薯蓉，本身已幼滑好食，最神來之筆喺晌上面加一抹蛋黃醬，添幾分酸香，令食味更有變化及層次。
西班牙黑毛豬 $498
店方建議5-7乘熟最好，雖然豬肉，就大膽啲揀5乘啦，其實記得以前曾晌Metal Steak試過一款西班牙黑毛豬鞍扒，可以食得好生，最好就喺3乘，所以，今次5乘應該唔算膽粗粗啦。黑毛豬已裁成細件，方便我哋共享，色澤嬌嫩，外層香脆，入口肉汁仍然豐盈，肉質比想像中更嫩滑，簡單沾少少海鹽，更帶出肉味。同樣，伴有黑松露燒汁及蘑菇薯蓉。
鮮奶咖啡
雖然無拉花，但入口還算醇香，只喺跟奶泡唔夠均勻，欠缺柔和口感。
熱檸茶
友人嘅熱檸茶，喺立頓茶包沖泡，整壺上，飲罷清清油膩，再為甜品進發。
甜品以拼盤形式送上，大堆頭，包括藍莓芝士餅、玫瑰蘋果酥、天鵝泡芙及朱古力蛋糕，賣相得幾靚，但水準中規中矩。藍莓芝士餅其實幾好食，不過，改用撻底做有點怪；玫瑰蘋果酥好有蘋果香，但又喺酥皮出問題，唔酥脆；天鵝泡芙不過不失而已；而朱古力蛋糕普通之餘，無乜朱古力味。
雖然，部份菜式仍有瑕疵，尤其有用酥皮做嘅菜式，但整晚裡，晌嘻嘻哈哈笑聲中渡過，好不高興快樂，言談間知道大家都好忙，下次再聚又可能幾個月後，希望，下次可以更齊腳！
個人評分
味道：7/10
環境：8/10
服務：9/10
抵食：7/10
平均每人消費：HK$500
味道：7/10
環境：8/10
服務：9/10
抵食：7/10
平均每人消費：HK$500
餐廳資料：
Otto Restaurant
銅鑼灣駱克道487-489號駱克駅16-17樓
2893 8617
Otto Restaurant
銅鑼灣駱克道487-489號駱克駅16-17樓
2893 8617
沒有留言:
發佈留言