山區裡的走走趯趯: CHOO CHOO：愛屋及Choo

工作關係，間中要在大陸山區跑呀跑，周圍走走趯趯（音：笛），所去的都是窮鄉僻壤，雖然靚景欠奉，但身處農村時，就自然有種令人感到寧靜、安然的感覺！在城市忙碌地做呀做，都是為了賺得三斗米，不過，慶幸有餘有剩等我都可以出外隨處盪，不單只見識一下不同地方的風土人情，還可以調節一下知足的心靈。小弟的旅遊足跡，可暫時瀏覽以下網址：http://travel.openrice.com/traveller/userdetail.htm?userid=49632

2016年2月1日星期一

CHOO CHOO：愛屋及Choo

最近，其中一個表姨甥女搬咗屋，其實喺長沙灣搬去長沙灣，只不過街頭去咗街尾，乘機賀佢喬遷兼聚一聚講吓近況，所以，呃番一餐飯食。Choo Choo話就話地址晌順寧道，查實鋪面開晌轉角嘅昌華街。好彩，事前表姪女話搭咗棚嗰間，所以，一轉角就見到。

一離開青山道，入到內街就好靜，不過，估唔到入到店內卻有唔少客喎，其實，Choo Choo屬小店經營，全場都喺得25個位，都幾易爆，所以，有心嚟嘅話，最好訂定位就穩陣啲。

“Choo Choo”就喺蒸汽火車起動時所發出嘅嗚嗚聲，所以，你就會發覺全店就喺以蒸汽火車為主題，兩旁嘅電視屏幕營造出窗外嘅風景（事後先知喺店主旅行時所拍），而「車窗」更架設幕簾、行李架，甚至大件、細件行李在其上，絕對一絲不苟扮得似模似樣，加點幻想讓人猶如置身火車中用餐。

就連上到二樓嘅洗手間都有掛起啲旅行地圖，洗手盆之上都加插一張黑白嘅世界地圖。

是晚仍然天寒地凍，但一坐低店員就送上兩杯熱水，實在窩心。枱上「布拉格」小蠟燭杯，精緻美麗，柔柔燭光更添幾火暖意。

餐牌共有兩頁，好似無咗晚餐供應，因為嚟之前睇過其他人嘅食評做參考。此外，餐牌以食材嚟分類from the Land、from the Sea，Crab up……等等主菜菜式，唔會好似一般餐廳咁有餐湯、沙律、頭盤……等等，所以食物種類唔算多，亦都有少少焗限。

香辣蘿勒葉醬炒魷魚圈意大利麵 $108

個意粉都幾辣吓，所以，餐牌上俾多隻辣椒公仔都不為過，但的而且確辣得刺激惹味，又有唔少蘿勒香。魷魚圈柔韌有咬口，最有趣喺意粉用上一般意粉及墨魚汁意粉，而意粉煮出嚟個韌度啱啱好，好有咬口，不過，個人而言，略嫌有少少油，雖然都只不過喺橄欖油而已，但落少一點會令個感覺更好。

牛肩胛配露筍黑松露波特菇 $198

好鍾意佢隻「碟」，樹木形連埋啲年輪，好有原始味道，所以，賣相亦唔花巧，催向基本。牛肩胛扒幾大件，面面刨上香草牛油，慢慢咁溶化，充滿香汽；而牛肩胛燒得恰到好處，色澤粉嫩，食落果然富牛肉香，唯未有想像中咁軟腍，不過，亦算好食。

反而更愛配菜嘅露筍仔及波特大菇，前者爽口無渣，後者菌香味濃，再者，肉汁與牛油滲進其中，味道更香。

店中有3款甜品供應：Scenery In Glass、L.J.K.、Gold Rush，單睇名字及其成份組合，雖然定價實在唔平，但都非一般大路嘅芝士餅、慕絲蛋糕，每款都感受廚師嘅心思及創作。我哋揀咗個平平嘅Scenery In Glass一試，睇睇質素如何！

Scenery In Glass $78

當廚師捧出以雞尾酒杯盛載嘅Scenery In Glass出嚟向我哋解釋當中成份時，原來，其中嘅威士忌泡沫喺後加，故小弟未影得徹之前嘅模樣。眼前嘅甜品，就喺唧上威士忌泡沫及加上紅桑莓乾嘅成品，內裡仲包括由下而上嘅大豆意式奶凍、熱情果漿及芝麻脆餅（餐牌原先喺用上花生金寶）。一羹過插到底試晒幾樣食材唔容易，但其實，每個部份都做得唔錯，奶凍夠挺有豆香，熱情果漿酸香鮮活，脆餅脆香滿滿芝麻味，威士忌泡沫輕盈帶酒香。