Three on Canton：食得夠Three

又喺一年一度嘅公司周年飯，雖然，今年嘅限額又再多啲，但啲自助餐價錢又再升啲，幸好老細俾嘅預算都算鬆，大部份五星酒店嘅自助晚餐都足夠應付。自從周年飯老細俾我哋放手搞「自己食自己」，無老細同枱，自然食得夠自由，夠輕鬆，經大家嘅篩選，定好晌Three on Canton大擦一餐（星期五晚，$628+10%一位，另有78折）。

環境方面就唔多着墨，總之地方幾大，裝修雅致，除自由組合嘅長枱外，又有啲中型6人圓枱，方便一家人圍埋坐，易啲傾偈。我哋被安排坐近窗口，落地大玻璃，廣東道街景一覽無遺。

等同事拎完第一轉嘢食，就喺小弟出場做巡場嘅時間。初時入門口以為得一截長形食物區，原來，掘個彎仲有另一大截食物區，所以，整體食物嘅選擇十分之多。

沙律、冷盤

雖然最貴價嘅食物肯定喺近門口嘅凍海鮮，不過，見佢不時補充，現場食客斯文，無需要急住食。相反，要延長個戰鬥力，第一轉嘅沙律喺必不可少。6款沙律菜、10多款配料、4款醬汁整齊分區排列好；最有趣喺加插啲蘿蔔仔，又有好健康嘅黑豆、黎麥……等等健康食材。

沙律拼少少冷盤切腸喺小弟嘅慣性頭盤，今次嘅亮點喺兩款蘿蔔仔，就咁食爽脆到不得了；而其他材料亦非常新鮮有質素，好似露筍、紅菜頭、巴馬火腿咁，當然黑豆藜麥就要食多兩炷啦！

凍海鮮

雖然無生蠔，但一樣滿意佢哋嘅凍海鮮陣容：龍蝦、龍蝦仔、蟹脚 x 2、青口、甜蝦、翡翠螺，款款海鮮嘅供應都源源不絕。配檸檬角、雞尾酒汁都常見，加多埋紅酒醋及泰式汁少就有啲，更少有喺第一次見有咁多款「辣椒仔」。

一大碟海鮮拼盤，樣樣執啲，唯獨龍蝦仔唔要，拆麻煩，肉又少。最爽喺大大件嘅龍蝦肉，又大大件嘅蟹腳，更爽嘅喺其中一款較大嘅蟹腳已批開殼，食用異常方便。款款海鮮都好鮮甜，肉質又爽，食完一口海水鮮味。

湯品

食咗兩轉凍嘢，喺時候食少少熱嘢緩和吓。湯品有兩款（節瓜淡菜湯、蕃茄忌廉湯），有原因唔揀中湯，等陣再講。個蕃茄湯橙紅艷麗，「忌廉」成份應該唔多，所以茄味濃郁，酸香鮮活，正！

麵包籃

雖然個湯好飲，但淨飲都喺寡啲。見佢有唔少麵包款式，有軟有硬，有粗有幼，襯番碗湯感覺會更完整。

小弟戲謔自稱麵包王，都喺虛銜，但同事T君就名副其實嘅麵包狂，睇我眼前碟麵包，相信好少人食自助餐會拎咁多包，小弟都有幫佢食1/3。整體啲包真喺唔錯，各有唔同口感，有麵包香。

芝士碟

冷盤旁設有芝士碟，除一堆粒裝笑牛芝士外，仲有瑞士嘅Gruyere、法國嘅Brie及Bleu D'auvergne幾款特色芝士，配克力架，又或搽晌麵包上都喺唔錯。

刺身、壽司、冷麵

日本嘢唔喺唔鍾意食，不過，無理由晌度食壽司㗎；而刺身見款式唔喺點特別，亦都無食；反而，冷麵中有一款梅味（粉紅色）喺幾想試，不過，食食吓忘記咗個梅味蕎麥麵！

足料燉湯

睇到依度就明點解唔使試之前提過嘅中湯。燉湯喺紅棗圓肉螺頭燉瘦肉，足料無欺場，清潤順喉，寒冬下飲碗燉湯，真喺暖入心肺。

粉麵、意粉

雖然，個人嚟講，都好鍾意食粉麵、意粉，不過，晌自助餐中，為咗想試多啲嘢，即煮粉麵及意粉通常都喺被逼放棄嘅項目。但喺，等大家知道有啲咩選擇，貼幾張相當有個參考。

熱盤

熱食分開幾類，散佈幾個角落，等小弟先介紹一下當晚大致有啲咩食，之後再分享我試咗啲乜。先講講中式，晌麵檔嗰邊有：古法蒸爐魚、野菌燒豆腐、鮮蝦荷葉飯、南乳豬手；

另一邊角落有：當紅炸子雞、蟹肉扒西蘭花、瑤柱扒瓜脯、即做片皮鴨、海螺片扒時蔬、芝士龍蝦鉗，以相片作紀錄，應該喺有咁多中式熱食喇。

再行過隔離一區，喺印度咖喱專區，食物包括：辣咖喱雞、印度烤雞、豬肉咖喱、雜菜咖喱，此外，印度薄餅之外，當然唔少得印度黃薑飯啦。

咖喱專區隔離仲有幾款食物，不過，我就唔清楚佢嘅分類，食物款式有喇沙青口、烤雞、扒車厘茄、炸蝦片，小餐包，喺咪睇完都唔知佢嘅類別屬咩呢！

再落嚟有即煎鵝肝配法包，見師傅密密手喺咁煎，啲鵝肝嘅油香充斥於空氣中。

去到食物近尾部份，就喺精選烤肉配約克郡布丁：南美燒烤及燒羊架，除伴有法式芥辣，更有海鮮莎莎、阿根廷青醬、芒果莎莎、辣椒莎莎作為佐料，等大家晌味道配搭上有更多選擇。

最後嘅熱盤，較為西式，但再加插其他，包括：煙肉焗蠔、炸薯格、西班牙南瓜辣香腸飯、雜菜千層麵、日式炒茄子、阿根廷肉批、巴西燴黑豆、烤甜薯、燒南瓜……等等。所以，綜合咁多熱食，相信有排你揀。

熱盤（一）：烤肉狂熱

熱盤食咗兩轉，第一轉喺個人嘅慣性心水「烤肉狂熱」，有燒羊架、南美烤牛肉配芒果莎莎、燒菠蘿、煎鵝肝配法包、煙肉焗蠔。個羊架超好食，軟腍又帶羊羶味，沾法式芥辣一流，煎鵝肝亦都好正，油潤甘香，燒菠蘿就特別清甜；不過啲烤牛肉唔喺好得，又乾又韌，焗蠔縮晒水，唔夠肉地。

熱盤（二）：精選滋味

第一轉熱盤則會揀啲心水想試試嘅菜式，有印度烤雞、芝士龍蝦鉗、扒車厘茄、烤甜薯、燒南瓜、西班牙南瓜辣香腸飯及烤雞。整體味道唔錯，較得小弟歡心有印度烤雞、扒車厘茄、燒南瓜幾樣，因為烤雞好入味，充滿印度香料，扒車厘茄好清甜、燒南瓜則夠晒粉香。

甜品、生果

食咗咁多碟嘢，其實都有所節制，就喺為咗啲甜品。佢哋擺甜品所佔嘅地方都算幾多，分兩個區域，一邊L形長枱擺放咗：中式嘅雞蛋卷、薩琪馬、合桃酥及西式嘅即製班戟、朱古力噴泉、麵包布丁、窩夫、心太軟及Movenpick雪糕。

另一邊方形食物枱則放咗多款甜品：豆腐花、芒果車厘子慕絲蛋糕、黑森林蛋糕、玫瑰忌廉芝士蛋糕、椰子花圈、朱古力千層蛋糕、玫瑰荔枝白朱古力慕絲、香蕉合桃麵包、熱情果啫喱、法式焦糖燉蛋、朱古力布朗尼、南美椰汁飯布甸、桂花柑橘大菜糕、英式士多啤梨布甸、自家製手做朱古力及迷你馬卡龍。款式就肯定夠晒多，味道就要試過先知；此外，仲有幾款新鮮生果：香蕉、蘋果、香梨、紅桑莓、甜橙、熱情果、菠蘿、西瓜、哈蜜瓜及蓮慕，種類繁多，應有盡有。

因為都去到尾聲先食甜品，所以，原先見到有心水嘅都無咗，唯有眼見有咩啱食就拎，結果攞咗：意大利芝士餅、士多啤梨慕絲、熱情果啫喱、香蕉合桃麵包、朱古力布朗尼 、法式焦糖燉蛋 、麵包布甸、自家製手做朱古力及迷你馬卡龍。始終喺五星酒店，水準都唔失禮得去邊，概況而言，所試到嘅甜品都好好味，個人較鍾意熱情果啫喱、香蕉合桃麵包及朱古力粒，啫喱比較似中式嘅軟糕，好濃熱情果香，合桃麵包嘅香蕉味好濃郁，合桃好脆口，啲朱古力則非常柔滑、甘苦，唔會得個甜字，猶如食法國菜最後嘅法式小甜點（Petit Four）咁。

晌雪糕櫃之上，會不時推出新鮮焗製嘅心太軟，廚師仲會配上雪糕球，記得唔好錯過。睇到個心太軟有足夠嘅流心效果，就知唔差得去邊！

依度唔興果汁汽水任飲，只包餐茶1杯。食甜品最夾都喺配一杯咖啡，小弟要咗一杯鮮奶咖啡，睇樣就知喺機沖貨色，不過，多數食自助餐嘅地方，就算酒店喺5星，都喺咁上下，千祈唔好抱太大期望。

Movenpick雪糕

最後衝刺就喺以Movenpick雪糕作結，一杯過5球Movenpick（瑞士朱古力、雲呢嗱、士多啤梨、楓糖合桃及香蕉雪葩，而意大利奶凍就無晒，否則喺6球架）。一口氣食足5球自然超滿足，楓葉合桃及香蕉雪葩最好食，較特別，而朱古力亦都好香濃，再者，Movenpick嘅雪糕軟滑富奶香，口感細密，真喺有個滿意嘅結束。

從網評而決定揀咗依度，食完之後都真喺覺得好唔錯，此外，貪佢可以食到10:00pm，等大定慢慢嘆（因為我哋標準收工時間晏）。服務方面，無咩太大問題，基本嘅收碟、添水、食物補充……都算做足。

個人評分
味道：9/10
環境：8/10
服務：8/10
抵食：8/10
平均每人消費：HK$555

餐廳資料：
Three on Canton
尖沙咀廣東道13號海港城港威酒店3樓
2113 7828