灑家燒味小廚 Master Kitchen：燒灑走一回

大半年前嚟過灑家一次，試過其及第粥、炒牛河，都覺做得唔錯，不過，以南乳豬手最為有水準，印象中炆得腍，又充滿南乳香，所以，今日同朋友嚟下午茶，都翻兜一客豬手。

事隔嘅一段日子唔算長，所以，再細閱餐牌，對照番上次嘅食評，選擇多咗，基本嘅主餐牌就無咩點郁，仍然有湯麵、撈麵、生滾粥、點心、燒味，另外仲有幾張額外餐牌：炒粉麵、小菜、燉湯及套餐，價錢似乎就無變。

多咗嘅喺指有個下午茶餐，最平竟然$20都有交易，最貴亦只不過$45（點心兩款）。

本以為為吸客只有星期一至五供應，原來星期六、日及公眾假期一樣有，怪唔之得下午茶時段都有咁多客啦！

南乳炆豬手 $48

果然保持到水準，一客4大件嘅豬手，依然既腍且啖啖南乳香，皮下脂肪充滿「骨膠原」，肥而不膩，咬口而不油！

京都炸醬麵 $35

睇落份量好似唔多，其實都好夠食，但至緊要味道好。麵條爽彈，所帶嘅鹼水味唔重，配上炸醬肉絲，味道辛香而唔太辣，極之惹味討。不妨試試加點豬手嘅南乳汁晌化學作用之下，別有一番風味。唯一可惜喺下午茶餐之內，無包依一款麵食！

花雕醉雞麵 $35（下午茶餐）

諗住喺下午茶餐，應該份量唔多，碗湯麵喺一般嘅常見份量，但估佢唔到喺碟醉雞竟然有成滿滿一碟，花雕嘅酒香頗突出，雞皮做得都幾爽，皮下脂肪又唔算厚，肉質挺嫩，所以，個醉雞麵真喺好抵食。

凍豆漿（下午茶餐）

由於喺跟餐關係，所以，份量喺會相對細杯啲，但豆味濃，唔太冰，少甜，啱啱好。

郊外油菜 +$10（下午茶餐）

晌健康嘅前題下，食多少少菜都喺好事嘅，既然下午茶加$10就有，就簡單點多碟菜。

雖然店家以「燒味小廚」為名，不過，今次就無食其燒味喇，但一個小食，兩碗粉麵，加碟菜，都算食得簡單「燒」灑！再者，個下午茶餐的確超抵食！

個人評分
味道：7/10
環境：7/10
服務：7/10
抵食：8/10
平均每人消費：HK$70

餐廳資料：
灑家燒味小廚 Master Kitchen
屯門屯門鄉事會路83號V City商場1樓L1-2號舖
2338 1398