翠河餐廳 Green River Restaurant：不翠多士

晌美孚區有咩多？人口多，菲傭多，就喺茶記夾快餐店多。所以，逢星期六我同老婆都會出街食早餐，輕輕鬆鬆慢慢嘆，至於今早食邊間，揀嚟翠河，喺幾間美孚茶記值得翻兜之一。

環境唔多講，因為以前食評提及過，總之鍾意佢光猛闊落，乾淨企理，樓底又高，空間感強。

照抄上次個食評，就喺早餐依然喺A-I共9款，供應時間去到12:00pm，定價為$24-$30，即喺過咗年個價錢都無變。

早餐I $29

上次我就食早餐I，今回就輪到老婆試，其實，食吓食吓都喺一齊食，無話邊個試邊樣。個意大利蕃茄濃湯薯仔通粉依然濃郁酸香，配美式蘑菇腸及煎蛋，份量十足，實在飽肚。

蒜香牛油多士

多士用厚切，除牛油、蒜蓉，仲加咗少少香草，味道無疑夠晒香，不過，美中不足喺件多士烘得「求其」，唔夠熱又唔夠「燶」。

熱奶茶

老婆一向飲熱檸水，覺得相對健康啲，但今次竟然興起要杯熱奶茶。茶底醇香，絲滑幼細，喺穩膽之選。

早餐A $29

小弟要咗個早餐A，主食喺忌廉雞濃湯火腿通粉，就喺想睇睇點「忌廉雞濃湯 」，點知嚟到同平時嘅清雞湯無分別，初時怕喺嚟錯，再跟店員確認，眼前依碗如假包換嘅忌廉雞濃湯，雖然味道唔錯，但唔喺預期嗰樣嘢。

炒蛋、餐包

個炒蛋做得幾嫩滑，而餐包屬老牌茶記嘅產物，夾埋一齊變成厚蛋餐包，正呀！

熱咖啡

老婆要咗杯熱奶茶，小弟就要杯熱咖啡。雖然唔喺咩泡沫、拿鐵，但杯即磨咖啡飲落又確喺唔錯，醇香平衡。

食完個早餐，趁天氣回暖啲，行吓荔枝角公園，見有啲花開，又曬吓太陽，感覺不知幾舒服。

個人評分

味道：7/10
環境：8/10
服務：7/10
抵食：8/10
平均每人消費：HK$29

餐廳資料：
翠河餐廳 Green River Restaurant
美孚美孚新村4期百老匯街69-119號地下101A舖
2370 2908