御苑皇宴 The Banqueting House：隨御而安

早年因為一個護鯊活動而嚟過依一間「御苑」食飯，覺得佢啲菜式都做得唔錯，今次同幾個以前做酒店嘅舊同事食團年飯，東鐵沿線最就大家，問過好幾間都分場，啱啱御苑就唔需要，所以，就一於扑鎚晌度食，等我哋可以安心慢慢傾。御苑屬於專做婚宴酒家，所以，環境算裝修得美輪美奐，可惜對海一邊大廳有公司包咗做年夜飯，不過，晌另一邊大廳都唔差。我哋一行5人，被安排坐晌近尾嘅一角，仲好啦，人少少，靜局啲。

有一張圖文並茂嘅主餐牌，打開內頁夾夾埋埋都喺十多款餸，應該喺酒家嘅手本菜。

仲有另一張底面兩頁嘅菜牌，睇落去我估喺比較時令少少，又或近期推介，有小食、小炒、燒味、湯水、主食、海鮮，甚至4、8人套餐。

順帶一提，晚市其他收費包括：前菜每碟$13（1-4位一碟，5-8位兩碟……），茶錢$12位，另收加一服務費就喺指定動作。

前菜

我哋5個人就自動送上兩碟：蝦片、花生，總算無話好迤，前者卜卜脆，後者夠鹹香。

丹麥皇冠叉燒皇 $128

舊同事見個叉燒皇喺啲得獎菜，好奇想試吓，我事後先醒番起「丹麥皇冠」依個品牌嘅豬肉曾經晌一次活動接觸過（http://garycwm.blogspot.hk/2015/03/berliner-german-bar-and-restaurant.html），佢哋由飼養至生產，過程中並無添加生長激素或防腐劑，亦會採用非基因改造成份嘅飼料，唔含化學肥料或農藥，所有產品務求做到是天然，不含人造色素或香料，更獲歐盟有機（EU）認證、美國農務部有機食物認證標籤（USDA）及全球紅肉標準（GRMS）認證，品質絕對保障。

老實講，啲肉靚都要師傅燒得手勢好，一份例牌其實唔少，外觀燒得「勻巡」帶少少焦香，而且，基本上食唔到咩肥肉，但入口唔會好嚡，肉質好鬆化，確實有水準。

豉汁帶子蒸豆腐 $118

一客有6件，豆腐極之嫩滑，又有豆香，帶子雖然唔喺超大隻尺碼，但還算厚肉彈牙，面層鋪滿豆豉、蔥花，惹味就不在話下啦。

醇香三杯雞 $98

聽人講三杯雞嘅「三杯」就喺指一杯醬油、一杯米酒及一杯麻油，出嚟嘅雞件酒香味濃。眼前嘅三杯雞，雞件爆炒得夠香又有鑊氣，咬落都幾嫩，無煮過火嘅跡象，不過，酒香稍薄，再加多少少酒都仲可以。

竹笙鼎湖上素 $88

之前幾道菜都較為味濃，素菜就揀咗鼎湖上素，有竹笙、竹筍、珍珠筍、草菇、蘑菇、雪耳、木耳、西蘭花，夠晒清，又夠健康啦！

臘味糯米飯 $98

冬天食糯米飯寧舍滋味，個糯米飯做得又幾好喎，飯粒黏糯，卻唔會黐埋一嚿嚿，又夠入味，臘味主要都喺啲臘腸粒，唔喺好肥、好油膩咋喎。

除咗小弟，一枱都喺女士，甜品環境佢哋又發揮出潛能，一口氣點咗5份甜品，樣樣點啲，有熱有凍，務求大家樣樣都可以試一下。

杞子桂花糕 $18、千層咖啡糕 $18

一碟過上晒兩款凍糕，所以，擺出嚟嘅賣相變得特別好睇，抵讚。桂花糕入口清涼又清新，淡淡桂花香，好食；不過，小弟就更欣賞啲千層咖啡糕，軟軟韌韌，好濃咖啡味。

栗茸西米焗布甸 $18

西米焗布甸都好耐無食過喇，依度嘅焗布甸細細兜，可以俾我哋過過口癮，布甸好有奶香，底下嘅栗子茸既綿滑，又清香，$18呢個價抵食喎。

珍寶壽包 $18

佢哋有半打壽包（$45）以可叫，不過，點半打我哋未必食得晒，所以，點一客珍寶壽包，正正八吓有幾「珍寶」。嘩，又真喺幾大個，成個拳頭咁大，基本上都喺蓮蓉餡，不過，就有埋鹹蛋黃，所以，就更香。包身亦好軟熟，咬落唔太黏牙。

今晚嘅菜式水準屬中上，比預期嘅好，不過，我哋最欣賞喺佢哋嘅服務，唔知喺咪做得酒席多，抑或始終喺晌尖沙咀區。我哋點嘅餸菜，有燒味，有主食，佢哋真喺一上就上碟叉燒先，其他小菜陸續咁嚟，個糯米飯會晌最後先上。或者你會覺得喺偶然，不過，我見個經理晌張落單紙度間開個糯米飯，而且，之後另點甜品，喺一次過出晒所有甜品，所以，貼士都值得俾多少少！

個人評分

味道：8/10
環境：8/10
服務：8/10
抵食：8/10
平均每人消費：HK$155

餐廳資料：

御苑皇宴 The Banqueting House
尖沙咀麼地道68號帝國中心1樓
3962 1188