前身喺吉野家個鋪位，地方都幾大，一室芥辣黃襯啡，搶眼醒目，再配木系裝修，牆上有不少越南風土嘅畫作，提醒你佢喺一間越南餐廳。店內以4人枱為主，比起綠楊坊店，依度啲間隔闊落好多，揀個梳化卡位，就坐得更舒服。
餐牌有啲似報紙裡分類廣告形式，食物嘅選擇，店名「越式湯粉專門店」都話晒一切，主打多款越式湯粉、撈檬，仲有越式小食，少少咖喱類產品，部份菜式有圖片介紹；亦設有唔同形式嘅套餐、二人餐、四人餐。
另外，有一個主餐牌以外嘅新推小食「蓮藕釀餅」（$22 / 3件、$38 / 6件），點睇都唔似越南嘢，不過，老婆喜歡食藕餅，所以，都點一客細份嚟試試。
蓮藕釀餅 $22 / 3件
藕餅都煎得幾甘香，唔油膩，口感帶少少爽脆，餡料有啲豬肉、甘筍、馬蹄粒，都真喺做得唔錯。
特別牛河 $50
散叫價$50，套餐價$58，配飲品一杯，改特飲就+$4。何謂「特別」？咪就喺四合一牛河囉，貪其一次過可以試晒胡椒牛扎肉、金肚絲、牛腩片及生牛肉。如果想加菜（津白 / 生菜 / 蘿蔔）無問題，都喺多+$8。
晌餐牌上，店方特別點明「本店所有湯底均選用鮮牛骨熬制」，所以，真喺要嗒真啲個湯底先得。
先講湯底，香而不俗，的確幾有骨香且馥郁；河粉較廣東嘅幼少少，但好滑溜，而且份量頗多。一碗裡果真有齊4款「牛」，不過，份量唔算好多，金肚絲沉晒底，初時仲以為俾漏添。胡椒牛扎肉幾得意，柔軟有彈性，金肚絲幾爽口，牛腩片幾有肉味，而生牛肉好嫩滑。
雞絲金邊粉 $42
雞絲似喺手撕雞肉，撕得比較碎濕濕，但口感又幾綿柔，唔會「嚡烚烚」，金邊粉差唔多等同粗身嘅米粉，入口有米香，雖唔及河粉滑，但一樣好軟綿，同樣份量十足。
生薑果纖蜜 +$8
單點要$22一杯，不過，你食任何湯粉、湯檬……，都可以+$8配基本飲品，+$12配特飲。天氣有點凍，就揀咗一杯健康熱飲「生薑果纖蜜」，飲落就好似一杯有薑味嘅熱菜蜜，而薑味都幾堅，飲完杯底一埋薑絲，貨真價實。
雖然是晚喺閒日，但嚟到都只喺8:00pm，已經唔太多客人，雖然話美孚多中產（可惜小弟未入流），但四、五十食一碗河粉麵亦未必人人捨得（小弟都覺得定價有啲偏貴），依頭啲食肆較少區外客幫襯，所以，做唔做得住都仲喺要靠日積月累儲多啲街坊客。晌依區，依家一共有兩間賣越南嘢嘅食肆，個人而言，都喺喜歡近街市嗰邊嘅小越南多啲，唔單單因為佢哋食物種類多選擇啲，更因為水準確喺高一班。
個人評分
味道：7/10
環境：7/10
服務：8/10
抵食：6/10
平均每人消費：HK$61
味道：7/10
環境：7/10
服務：8/10
抵食：6/10
平均每人消費：HK$61
餐廳資料：
越棧越式湯粉專門店 Viet's Choice
荔枝角寶輪街9號九巴總部地舖
2264 4422
荔枝角寶輪街9號九巴總部地舖
2264 4422
沒有留言:
發佈留言