餐廳環境幾幽雅，樓底高，四周都喺偌大嘅玻璃窗。最舒服嘅都喺靠窗嘅梳化位，挨住坐不知幾爽！
離開時見到店內正中間嘅花飾原來有專人擺設，所以，就算揀唔到窗口位，坐晌大廳中，對住新鮮艷麗嘅花束，感覺都會變得唔一樣。
既然嚟嘆高茶就唔使費思量諗食乜，不過，就要諗吓飲咩好！小弟就一向喺鮮奶咖啡愛好者，所以，唔多需要煩飲乜，不過，都喺有少少後悔，容後再分享，而親友就試玫瑰花茶。
鮮奶咖啡
睇樣就知喺咖啡機沖製，感覺有少少失望，雖然，沖出嚟嘅咖啡幾香，但口感絕對喺咖啡還咖啡，奶泡還奶泡，就算攪勻之後，醇香而欠缺柔滑。
粉紅玫瑰花茶
自選香茶有粉紅玫瑰花茶、橙黃白毫、百合花茶、荔枝紅茶數種款式，而親友揀花茶實屬明智之舉，因為，一壺花茶加入好多夥玫瑰，沖出嚟嘅香茶芬芳馥郁，入口淡雅芳香。
等咗良久，經典嘅三層架高茶（$398二人享用）卒之送到。由上而下，有鹹點，又有甜點，分別喺巴馬火腿及水牛芝士配迷你意大利麵包、蟹肉蕃茄沙律配意式烤麵包（上層），朱古力榛子醬香蕉布朗尼、提拉米蘇小盆栽、馬卡龍驚喜四重奏、咖啡奶凍（中層），香煎鴨肝多士配蘋果醬及杏仁粉、忌廉焗生蠔配岩鹽（下層）。我哋先食上下兩層嘅鹹點，跟住慢慢享受中層點點甜。
香煎鴨肝多士配蘋果醬及杏仁粉
件法包多士超鬆脆，而鴨肝煎得面層帶點焦脆，內裡口感軟綿而油香十足，伴上嘅蘋果醬酸酸甜甜，發揮到中和油膩嘅感覺；反而餐牌指有加入杏仁粉，老實講，小弟就唔喺好食得出添。
忌廉焗生蠔配岩鹽
預期喺熱辣辣嘅焗蠔，但嚟到卻喺已經放涼嘅狀態，依一點已經被扣分；忌廉嘅奶味過重，遮咗啲蠔味，而且，隻蠔都偏細，所以，對此都有啲失望。
蟹肉蕃茄沙律配意式烤麵包
意式烤麵包即喺用上百吉包，烘得蠻脆口，而蟹肉蕃茄沙律部份，確喺有份蟹肉嘅鮮味，但有些微過鹹嘅情況。
巴馬火腿及水牛芝士配迷你意大利麵包
個麵包（改咗唔喺「拖鞋」包）包身幾鬆軟，夾上巴馬火腿、水牛芝士，蕃茄、火箭菜，喺幾輕怡嘅三文治，只喺略嫌啲巴馬火腿落得少，火腿嘅鹹香唔突出，反而被啲配角搶晒味。
朱古力榛子醬香蕉布朗尼
個布朗尼非常好食，口感挺實帶點濕潤，唔會「乾崢崢」，上面層榛子醬又打得柔滑充滿榛子香味，嗰一片香蕉稍為燒一燒上啲色盲更好。
提拉米蘇小盆栽
將意大利芝士餅做成盆栽已經唔喺咩新鮮事，所以，質素成為關鍵。不過，個小盆栽有啲「唔新鮮」，片薄荷葉有啲乾，面層嘅Oreo餅碎亦腍晒；反倒內裡嘅芝士幾滑溜幼細，不過，唔喺配咖啡酒，改用橙酒，個人感覺就唔喺太夾。
馬卡龍驚喜四重奏
四重奏分別喺士多啤梨、芒果、咖啡及芝麻，小弟試咗其中嘅士多啤梨及芝麻，前者嘅香味好芳香，後者嘅芝麻味好香濃，口感煙韌而味道少甜。
咖啡奶凍
雖然叫做奶凍，但質感似慕絲咁軟滑多過似奶凍，但咖啡嘅香味無疑甚為突出，好食。
AVA個環境的確一流，讓人感到好舒適，因為客人唔太多，侍應安排座位時都刻意分隔開啲，等大家有更多空間同私隱。不過，食物質素就有啲參差，我覺得可以再做好啲，否則，嘥咗個靚場及靚景觀！
個人評分
味道：7/10
環境：9/10
服務：8/10
抵食：6/10
平均每人消費：HK$220
味道：7/10
環境：9/10
服務：8/10
抵食：6/10
平均每人消費：HK$220
餐廳資料：
AVA Restaurant Slash Bar
尖沙咀赫德道8A隆堡麗景酒店38樓
3550 0262
尖沙咀赫德道8A隆堡麗景酒店38樓
3550 0262
沒有留言:
發佈留言