雖然荃新天地嚟過唔少次，不過，原來Bien瑟縮樓上一角，兜咗個大圈卒之搵到，其實，如果晌沙咀道嗰邊入就好易搵到。店子查實一啲都唔細，有小圓枱，有卡座，樓底極高，空間感足，木系襯黑，配上暖和嘅燈光，型格中有股活力。而且，所有店員都喺後生仔女，服務勤快。
嚟之前都無乜睇過啲食評，都喺隨心所選，亦問問店長有咩推介。散點餐牌一紙過，包括湯品、頭盤、主菜、三文治、薄餅、墨西哥卷、甜點。
如果想慳少少錢，晚市套餐就應該喺較多人之選。包餐湯或沙律、主菜、啡茶，收費在於所選嘅主菜（$148-$168）。雖然套餐無甜品，但可以+$28任選甜品一客，非常划算！
飲品餐牌備有另一張，啲飲品有唔少特色嘢，平常小弟就揀鮮奶咖啡，今回貪新鮮試吓抹茶梳乎厘系列。
此外，冬天佢哋又有多款熱飲系列，應該幾啱老婆飲，所以，佢都試咗杯特色熱飲。
麵包條
先上一客餐前麵包條，撕開有點煙韌，但入口卻喺軟綿。伴上嘅薯蓉千島沙律醬都幾好食。
西班牙特色頭盤 $80
個拼盤有吉列炸蠔、脆餅伴煙鴨肝醬、烤蘑菇沙律及西班牙凍湯。睇份量，就屬於兩人嘅份量。
趁熱辣就梗喺食炸蠔先啦，啲蠔幾有蠔味，個脆漿又唔厚，好甘香；
薄薄嘅脆餅搽上鴨肝醬，香膩滋味，載鴨肝醬嘅蕃茄當然亦都食得唔好嘥啦；
配菜唔喺就咁得啲沙律菜，仲有埋烤蘑菇，真喺誠意位；
至於個凍湯都OK喎，唔會好酸，入口涼爽開胃。
東方辣椒大蝦扁意粉 $128
以意大利嘅香蒜欖油意粉（Aglio Olio）為基礎，加入泰式香料「羅勒」，令整碟扁意粉唔單止蒜香及辣勁，仲有香草幽香，加上大蝦都幾爽，意粉有咬口，粉內混咗啲菇菌，令整道意粉變得更豐富。
匈牙利燴豬柳約克郡布甸 $95
店家不時有啲是日推介菜式，依個約克郡布甸就喺今日嘅新品，暫時喺試食價。估唔到個約克郡布甸咁大個，伴上匈牙利燴豬柳，淋少少黑醋，作為鹹食，得確幾有新意、心思，而約克郡布甸焗得鬆軟，質感有少少似麵包布甸，幾有蛋香，蕃茄汁底又酸香鮮活，唯一挑剔喺啲豬柳一般，唔算好滑。
澳洲鮮草莓蛋白酥餅 $55
雪白嘅蛋白酥餅，淋上黃色嘅芒果漿及紅色嘅士多啤梨漿，好搶眼，加埋粒龍珠果同雜莓做裝飾，又搵啲餅碎襯一襯，賣相真喺攞硬高分。切開先發覺原來中間位仲唧咗啲忌廉，而個蛋白酥餅十分脆口鬆化，不過，就非常甜，非常「漏」，連一向食得幾甜吓嘅小弟，都覺得佢真喺頗甜，所以，建設3-4個人共享好啲。
焦糖布丁抹茶 $36
好期待杯嘢會喺點，原來，焦糖布甸真喺做咗粒焦糖布丁放晌啲梳乎厘（蛋白）之上，我就讓粒布丁溶返入杯抹茶度，不過，其實飲落又唔喺好有焦糖味，但件梳乎厘入口好似棉花糖咁綿柔，而杯鮮奶抹茶亦做得不俗，抹茶味都幾甘香，口感亦頗滑溜。
楓葉核桃煎茶 $48
依一系列嘅秋冬特飲，喺由德國引入富歐陸風情嘅飲品，仲喺得獎作品添。煎茶以成壺上，飲完可以再要求店員添加熱水，大致可以飲多一至兩轉。
店家嘅菜式似乎喺集各國之大成，但好多睇落都相當有特色，就連飲品都別出心裁搞啲「花臣」，再者，服務又唔錯，值得再嚟幫襯。
個人評分
味道：8/10
環境：8/10
服務：8/10
抵食：8/10
平均每人消費：HK$220
餐廳資料：
Bien Bistro
荃灣楊屋道1號荃新天地1期1樓L117號舖
2155 9022
沒有留言:
發佈留言