嚟到食晚飯，唔使擔心消費特別高，有平有貴，又有啲特價嘢，最緊要喺唔使被逼食啲貴價套餐，所以，我哋點啲小菜，又點啲炒粉麵。
補充下，餐前小食收$15碟，我哋13人收3碟，茶芥收$12位，其中一個喺阿B，收12人茶錢，所以，依啲濕碎數，都收咗近兩嚿水 。
成都手撕雞 $48
手撕雞幾嫩滑，墊底嘅青瓜絲入口爽脆，淋上嘅麻辣汁，辣勁好強，但唔會好麻，幾醒神醒腦嘅小食。不過，因為晌個餐牌唔見有「辣椒」公仔，所以，無諗過佢會辣成咁！
上海三鮮烤麩 $48
摷嚟摷走，都好似只得兩鮮：木耳、冬菇，不過，都唔緊要啦，做得好食咪可以囉。烤麩綿柔又吸滿汁，木耳爽，冬菇香，大人細路大都啱食。
燒味拼盤 $168
人多就特別鍾意點袋個餸，當餐前小食又得，當餸伴白飯都得，唔個點解，啲細路又特別鍾意食「橡根」。拼盤有叉燒、燒鴨、乳豬、海蜇、煙鴨胸、豬脚仔，樣樣有啲，勝在多元化，滿足大家各有所好，況且，啲燒味又做得唔差。
秘製話梅骨 $98
無啦啦嚟咗份元蹄，仲以為嚟錯要求退走，點知眼前嘅就喺話梅骨，因為以前食過一直認為好似無錫骨、糖醋排骨嗰樣，所以，依份話梅骨小弟點都認為唔可以叫骨囉 。不過，講味道又幾唔錯，「元蹄」處理得唔肥膩，又有肉香，嗒落又確有話梅嘅酸香，更中和剩餘嗰份油脂感。平時真喺食份紅燒元蹄要兩嚿幾水，依家唔使一嚿就搞掂，錯有錯着。
滑蛋炒蝦仁 $88
蝦仁既大隻，又爽口，滑蛋配少少蔥花炒，又做得唔錯，一碟嘅份量唔會得少少，只賣$88實屬抵食嘅小菜。
北海道元貝賽螃蟹 $88
通常話元貝，都諗住碎濕濕，但個賽螃蟹好有驚喜喎，個炒蛋白炒得嫩滑之餘，堆到成個小雪山咁，而元貝唔喺只得兩、三炷咁少，更加埋鮮帶子，翠綠嘅西蘭花伴碟，好睇又好食。
紅燒滑豆腐 $68
可能好多人都認為喺一道好普通嘅菜式，不過，易學難精，豆腐入口十分嫩滑，又豆味，個汁茨香濃，簡單味美！
紅梅漁肚浸秋葵 $108
廚師推介菜之一，又因為有秋葵入饌，加埋魚肚，有益健康。不愧推介，魚肚浸發得好腍滑，秋葵爽得嚟帶點黏，「紅梅」攞個名靚啲，其實喺蕃茄湯底，幾酸香濃郁，正！
原來喺打算叫啲小菜，再叫白飯，因為見佢哋有啲特色炒粉麵飯，所以一口氣點兩個試試。
南瓜芝士海皇焗天使麵 $148
成道西菜咁款，中菜師傅煮天使麵，喺膽搏嘅選擇，不過，佢哋又煮得有水準喎，首先天使麵無煮過籠，唔會腍到好似啲蚵仔米線咁；個南瓜芝士汁又煮到恰到好處，既有南瓜味，又有芝士香。
牛肝菌鴛鴦米帶子炒飯 $138
標得個題目驚喜就當然唔喺單一事件，依個炒飯真喺先驚後喜，初時睇賣相以為得嗰3粒帶子做做賣相，怕唔夠分仲軋開晒，原來飯內仲混有好多帶子粒，夠晒驚喜，而且，牛肝菌亦有唔少，飯粒夠乾身，又炒得有菌香，認真好食。
雖然我哋當中都有啲甜品粉絲，但只打算叫少少過吓口癮，不過，一來酒家有唔少甜點供應，二來難得大家食得咁開心，三來就快過年，一於盡慶啲，8款甜品點咗5樣，擺到成枱都喺。
呂宋香芒布甸 $22
碗布甸質感唔錯喎，幾挺實，唔會好削，不過，啲芒果就質疑喺咪菲律賓貨，因為有少少酸（兩碗都喺），一喺就焗得唔夠熟就拎去整布甸。
千層薑汁糕 $24
一籠有4件，睇個樣仲以為咖啡糕之類，一層間一層，雖然唔喺咩難整嘢，都要俾少少心機。入口薑汁糕幾爽，薑汁味亦好突出，幾好食喎。
紅豆桂花糕 $28
同樣一客有4件，仲要裁成心形，底面都喺一般嘅桂花糕，不過，睇見都知佢落足桂花，所以，挺濃桂花香；中間就隔一層紅豆糕，紅豆大粒，又清甜，只喺發覺有部份豆煮得未夠腍。
金牌流沙包 $38
一籠3件嘅流沙包，不負金牌之名，包身非常軟熟，咬落又唔黏牙，「流沙」餡絕對好「流」，好香蛋味。
原籠蔗糖馬拉糕 $38
大大個馬拉糕，一開6，色澤黝啡因為採用純蔗糖，所以，有一朕朕清甜，而且，馬拉糕發得鬆軟，又有回彈力，出色嘅出品。
另外，白飯收$12碗，收加一服務費就唔使多講啦，不過，菜價唔算貴，碟頭都夠份量，招呼亦唔錯，所以，今次個團年飯都算喺抵食夾大件。有時專登搵都未必有咁筍，偶遇反而處處滿驚喜！
個人評分
味道：8/10
環境：8/10
服務：8/10
抵食：8/10
平均每人消費：HK$156（只計成人）
環境：8/10
服務：8/10
抵食：8/10
平均每人消費：HK$156（只計成人）
餐廳資料：
譽宴 U-Banquet
太子彌敦道750號始創中心始創中心6樓
2811 1983
太子彌敦道750號始創中心始創中心6樓
2811 1983
沒有留言:
發佈留言