亞玉豆腐花：垂涎玉滴

一大朝早晌新同星茶餐廳食完早餐，就出發踩單車由元朗入到去屯門，因為今朝個早餐都幾飽，之後返回元朗都無食晏，只隨意搵啲小食。嚟到阜財街，最人氣就喺依檔「亞玉豆腐花」，排晒長龍，不過，流轉快，排唔夠5分鐘就輪到我哋。

店內地方好細，所以，都不宜堂食，拎上手企晌外面仲夠街坊風味。

雖然，小店仲有其他甜品，但依門口所見，主打都喺豆腐花、缽仔糕及糯米糍，睇見依啲傳統小食，實在讓人垂涎欲滴，而大部份人都喺揀食依幾樣，我哋就一碗豆腐花兩份食，再各加件迷你缽仔糕。

因為人客太多，所以，薑汁、黃糖及糖水都放晌鋪面一旁，全自助，客人想落幾多就幾多。

豆腐花 $8

賣$8碗真喺非常抵食，夠大碗，可知整豆腐花幾多工序呀，又要浸，又要磨，隔渣，再煮，小弟家中有豆漿機，淨喺整豆漿都嫌有啲煩。亞玉嘅豆腐花真喺好夠幼滑，豆味又夠濃郁。想刺激啲，可以加啲薑汁，有辣勁，幾真材實料喎。

迷你缽仔糕 $2

有原味及加有紅豆兩款嘅缽仔糕，當然，揀後者總喺覺得抵啲啦。叫得迷你就梗喺好細件啦，睇佢放上手就知有幾大。真唔講得少，加紅豆嘅唔喺得幾粒做個樣，真喺一啲無手緊，啖啖紅豆，夠清甜，而缽仔糕本身質感好好，軟熟而帶一點煙靱，平靚正。

豆腐花同缽仔糕都好好，又平喎，有少少「玉」罷不能架，不過，是晚仲有同屋企人嘅慶生飯，兼且開早場食6:00pm，所以，墊墊肚過口癮就算！

個人評分

味道：8/10
環境：6/10
服務：6/10
抵食：9/10
平均每人消費：HK$6

餐廳資料：
亞玉豆腐花
元朗阜財街2號宏豐大廈地下12號舖
2664 9622