奇華餅家 Kee Wah Bakery：「喜迎金猴」工作坊

世紀寒流襲港，市區氣溫十度以下，新界就更加唔使講，不過，晨朝早無懼寒風，照樣入到嚟大埔工業邨，因為，參與咗奇華餅家嘅「喜迎金猴」工作坊，阿茂整餅，學人整年糕及蝴蝶酥。

入到廠房內，設有一個「實驗室」，改裝成我哋今日學整餅嘅場地。一切「架生」都準備好，有圍裙、工具、所需材料，一應俱全放晒晌枱上。

先有建師傅教整年糕，咪睇佢後生細仔，已經有多年做餅經驗。做年糕嘅步驟簡單啲，預備好糯米（自家生磨，唔喺用現成糯米粉，而枱上嘅石磨都只喺示範真正磨糯米喺點，實際依家就梗喺機磨啦），搗散、下糖漿、攪勻、隔漿，入爐蒸就成事。

石磨純粹示範一下點磨糯米

白色一兜喺糯米磨完出嚟個樣

糖漿分兩次落

睇佢示範就好似幾易，跟坐就輪到我哋落手落腳做，唔試都唔知，到自己親手拌粉攪勻原來真喺要花多少少力氣先得。

最後，小弟嘅成品唔差，加粒紅棗，排幾粒瓜子仁，成兜招牌「亞嫲糖年糕」就完成喇！喺咪做得有板有眼呢！

跟住再跟林師傅學整寓意甜蜜嘅蝴蝶酥，學呢個所需技巧就多好多，但師傅細心講解，逐一示範，以高筋粉、低筋粉、牛油搓成油皮，經一日雪硬後，又要加入水皮一層摺一層壓成酥皮，前後過程需要4日，所以，最後做蝴蝶酥嘅酥皮都喺師傅預先製作好嘅「現成貨」，變相我哋嘅成品失敗極有個譜，最多喺做得無咁靚仔啫，但算喺好有成功感。

上面依塊喺雪咗一日嘅油皮

依啲就喺水皮喇，即高筋粉 + 低筋粉 +  水！

一塊片可以做到50-60件蝴蝶酥

小弟嘅出品做得都似模似樣，金兼有牛油香氣，脆到甩轆呀，有啲可以話大師傅嘅水準，有啲就爆開晒成個哈哈笑，而且因為自己糝沙糖，做出少甜版本；不過，高下立見除咗形狀，就喺大細唔一致，依啲就喺同真正大師傅功力上嘅分野。

有幾塊變咗「哈哈笑」蝴蝶酥

趁住啲製品又要蒸，又要焗嘅空檔時間，好好品嚐一下奇華嘅其他款賀年糕點，包括：賀年香芋糕，粒粒芋頭，絕無欺場，入口好有芋香，怪不得一陣間就被大家掃晒；

臘味蘿蔔糕，配自家品牌嘅珠姐XO醬，惹味好食，再者，糕內好多臘味、蝦米，非常足料；

亞嫲糖年糕及全新推出嘅紅棗糖年糕， 前者往年都試過，柔韌煙糯，清甜蔗糖香；後者新品嘅紅棗味十分突出，別有一番風味；

蓮子百合紅豆糕，內含好多百合同紅豆粒，冷熱食法都可以，不過，食咗幾樣煎嘢，似乎凍食受歡迎啲； 

與一眾朋友圍埋食吓糕點，飲啖熱茶，暢談軼事，提早感受一下新春嘅節日氣氛，蠻不熱鬧添。奇華嘅產品款式眾多，單喺幾款糕又點夠應節，加多幾款佢哋出眾嘅賀年小食：鬆化香酥角、家鄉炒米餅、歡樂笑口棗、歡趣滿堂蛋散、手製南瓜籽脆糖、手製椰絲花生軟糖、手製南棗合桃糕、熊貓曲奇……等等，繼續邊傾邊食，重重滋味，滿滿歡喜。

奇華自家品牌嘅茶葉

節目豈止於此，餘興喺深入廠房，參觀多款產品嘅製造過程。原來衛生要求好嚴格，既要載上口罩、頭套，穿上膠鞋套，仲要話過吹風機，整個生產過程都在密封式環境內進行，確保百分百安全衛生。產品有手製，有機製，真喺大開眼界。今次嘅工作坊好玩之餘，亦幫小弟解開咗整熊貓曲奇之謎，唯可惜廠內未能影相，唔可以跟大家分享。

個人評分
好玩指數：9/10
抵玩指數：- /10
實用指數：9/10

奇華餅家 Kee Wah Bakery
大埔工業邨大貴街 11-13號