何洪記 Ho Hung Kee：洪心壯志

希慎去得較多都應該喺誠品，不過，小弟自問唔喺文青，肚內半滴墨水都無，死剩把口，但講嘢唔叻無口才，淨喺識食。今晚嚟到何洪記，試試米芝蓮一星嘅麵檔喺點？

原來，何洪記都有成60年歷史，由街邊檔做到一星麵店，實在唔容易，所以，餐紙墊都特別描述番佢嘅歷史，印證佢哋兩代人雄心壯志嘅努力。

要做到一星，食物質素好故然重要，但環境一環亦無怠慢。一室潔白光猛，雲石餐枱，湖水藍燈籠吊燈，清雅柔和，打破麵檔傳統模樣。

雖然以雲吞麵起家，但到依家已經非簡單只賣碗麵，有粥粉麵飯、腸粉、點心、廚師推介（小食）、糖水……等！主餐牌印刷精美，中英日文對照，依家咁多韓國人嚟玩，唔知將來會唔會加埋韓文，部份菜式圖文並茂，順帶一提，晌度食嘢唔同出面普通麵檔啊，收茗茶每位$3，另加一服務費，但凡惠顧飲品，可免茗茶費。

沙嗲牛肉炒河 $105

好多人都會揀食乾牛河，因為算喺招牌之一，但少弟近排食得油膩嘢多，所以，大膽試試佢嘅沙嗲牛肉炒河。雖然喺「濕炒」，但一樣做得有水準，河粉唔會黐埋一炷，兼有炒嘢嘅鑊氣，沙爹味香濃而帶有辣勁，頗惹味，牛肉腍滑，卻無嗰種用鬆肉粉「瘌」到散嘅感覺。

滑蛋蝦仁炒河 $135

再嚟多碟炒河，真喺「河」去「河」從，同樣，河粉炒得夠晒鑊氣，個蛋漿茨做得既香且滑，而啲蝦仁又大隻，又鮮爽，用料絕無欺場。

清潤冬瓜蜜汁 $26

咪睇佢個樣好似杯清茶咁，查實真喺好清潤，充滿冬瓜蜜嘅香味，飲落非常潤喉。天氣乾燥嘅日子，就最啱喇！

南北杏清炖雪梨 $52

要再潤啲，又唔介意俾多啲啲，依碗南北杏清炖雪梨糖水就最好不過。清澈嘅冰糖糖水，滲出雪梨嘅自然清香，甜蜜滋潤，南北杏又有潤肺止渴、化痰止咳嘅功效。

晌何洪記食嘢無疑消費高，但除環境雅致，服務熨貼之外，用料嘅質素都可以晌每道菜式中反映出嚟，所以，都可以講喺物有所值！

個人評分
味道：8/10
環境：8/10
服務：8/10
抵食：7/10
平均每人消費：HK$120

餐廳資料：

何洪記 Ho Hung Kee
銅鑼灣軒尼詩道500號希慎廣場12樓1204-1205號舖
2577 6060