早已訂好個秋冬滋補宴，都只喺等齊腳就開餐。而個滋補宴連湯連蛇羹一共9道菜，全包宴，實價$2,680。
個餐包一支紅酒、兩支大啤及6罐汽水。我哋大部份人唔好酒，有啲又要揸車，所以，只留一支啤酒，其他換埋汽水。當喺參考，一支紅酒換3罐汽水，一支啤酒則換到兩罐，咁換法抵就唔抵架喇，不過，汽水大家都覺得啱飲啲。
以下出菜先後喺當晚實際嘅次序：
蒜子瑤柱甫
第一道菜就嚟碟瑤柱甫，以生菜、髮菜墊底，雖然啲瑤柱唔算好大粒，但味道都濃香，略嫌個茨汁勁杰身。
淮杞烏雞響螺燉三蛇湯
留意咗成晚，負責我哋附近嘅阿姐主要有兩個，幫我哋上湯嘅盡責醒目，拎兜湯嚟仲醒目到滔起少少渣俾我哋相機先食，反觀另一位阿姐成晚同熟客打牙骹，成日扮斟茶，懶到咁明顯都無經理理佢。呻完不滿，講番個湯，燉三蛇湯好足料，睇阿姐撈碟渣出嚟就知，味道都幾醇和。
蛇湯浸時蔬
上依道菜又喺好搞笑，無啦啦嚟個白灼時蔬，隔咗好耐先上埋個蛇湯，佢哋啲服務，尤其出菜真喺亂到不得了，我哋唔喺要求5星酒店嘅水準，只不過喺間正正常常嘅酒樓服務啫。
紅棗香栗扣全鴨
鴨內釀咗好多紅棗及栗子，味道非常之香，不過，唔明點解上枱前鴨殼已經鎅開咗，而且，食落離奇地鴨肉唔多，講明全鴨，而且睇落都唔細隻，好似好少肉。人哋仙鶴神針，我哋就鮮鴨神「針」，封番鴨肚嘅鋼針仲跟埋上碟，好彩支針又粗又大，近視嘅都睇到，如果喺細針就大家鑊。即時向一位男經理反映，佢除道歉外，即時答允送隻燒鵝補償，咁我哋又唔喺要搞大件事，但求食飯開心啫，不過，希望佢哋啲廚房大佬做菜用心啲囉。
鮮竹五蛇卷
明明喺一圍預12人，因為佢都講明包12人茶芥，但出奇地五蛇卷及瑤桂甫都有14件，當喺賣大包。啲五蛇卷不過不失咁啦，外皮都炸得酥化唔油，但蛇肉好少。
陳皮豉汁蒸大鱔
碟蒸大鱔算得上成晚無咩好投訴嘅菜式，因為鱔肉蒸出嚟滑溜，啖啖豆豉及果皮香。
太史五蛇羹（3窩）
可能有3窩嘅關係，啲蛇羹原先喺外邊枱分好先送嚟，所以，我哋要求另外嗰兩窩擺上枱自己搞掂，可驗明喺咪3大窩嘛。雖然足3大窩，但感覺料少，質感都可以，只喺似食普通嘅碗仔翅，而且，勁重胡椒味，得個辣字。
燒鵝
因為「鮮鴨神針」事件，後上嘅燒鵝喺補償菜式。佢哋嘅燒鵝確喺唔錯，雖然，未至於即燒即食咁熱辣辣，但都皮脆肉嫩充滿油香，皮下脂肪卻唔喺多。
支竹羊腩煲（麻辣雞煲）
我無打錯，你亦無睇錯，以下依道菜原本喺支竹羊腩煲，但開始上菜無耐有個女經理走埋嚟話無草羊返，做唔到個支竹羊腩煲，唔喺話？你無羊腩唔喺依一刻先知啩，朝早打嚟再確認張枱時你哋又唔講。雖然佢都好有禮貌講唔好意思，提議話換個麻辣雞煲俾我哋，仲俾夠隻半雞，就算你換夠兩隻雞都唔喺嗰會事，擾攘咗一大輪，最後，我哋都喺求求其其勉強接受就算。不過，個雞煲或許有隻半雞嘅份量，但就肯定喺「雜件」，因為我哋專登數住佢，竟有5隻翼尖，而且無人話食過脾位，根本就喺一般做小菜雞球啲雜件位，真喺好無誠意。
臘味糯米飯
除咗個陳皮豉汁蒸大鱔之外，大家都稍為讚吓嘅喺最尾上枱嘅臘味糯米飯，因為飯粒黏糯有咬口，夠乾身唔太濕，好有臘味香味。
杞子桂花糕
原本個餐唔包甜品，再問問之前個男經理可唔可以送啲甜品嚟，佢都好大方，整碟桂花糕涼一涼降下大家心中「怒火」。桂花糕味道唔差，幾有桂花香，不過，夾起嚟比較易散。
最後負責收錢個小姐，要求打多張單，都黑面「咀妙妙」，態度超唔掂！自從晌網上分享吓飲飲食食之事，又有機會同啲店主文流，知道搞一盤飲食生意唔容易，人工高、鋪租貴、食材又花錢；自已有時都煮開嘢，更知道真喺好花心機，所以，出去食餐飯，都會好用心品嚐，出食評亦唔會好隨意俾個劣評。晌千多篇食評當中，被評為劣評為數好有限，要小弟出手嘅，真喺要食物差、服務又差、無誠意、做菜唔用心……先俾個劣評佢，「富臨」你得咗喇！順便晌度向各位大佬致歉，搵咗間掃興到甩褲嘅酒樓食我哋一年一度嘅蛇宴！個人評分
味道：6/10
環境：7/10
服務：3/10
抵食：5/10
平均每人消費：HK$225
餐廳資料：
富臨皇宮 Foo Lum Palace
美孚美孚新村百老匯街85號C地下
2368 3738
富臨皇宮 Foo Lum Palace
美孚美孚新村百老匯街85號C地下
2368 3738
沒有留言:
發佈留言