不過，店主為顧及客人嘅私隱，全間餐廳都以活動屏風及布簾分隔，間成多個唔同大細嘅用餐區域，猶如私竇，有四人、六人……甚至十多人一同用餐都無問題，今次真喺一個私竇嘅新發現。而且，今晚唔算好滿，所以，見店員更刻意將客人再分隔開啲，私隱度就更高。
既然裝修得咁雅致，枱上擺設又點會馬馬虎虎，枱布、餐墊、餐巾、餐具、酒杯……等等都放置得一絲不苟。
菜式選擇方面，餐廳無套餐提供，主要就喺散叫。當然，由頭盤、湯品、主菜、甜品、飲品都基本一一都有。而餐牌見佢印住一，二月，相信每兩個月轉一次。
麵包籃 $25
一籃子麵包，份量可不少，但只配一般嘅牛油，款式亦未見有咩特別。麵包喺額外收費，可能有人覺得店方小家，但有時候又唔喺人人有興趣食，免費送嘅可能做成浪費，所以，都喺觀點與角度嘅問題。
頭盤一共有7款，單睇名字都幾特別，點選其中兩款較為中價嘅炸田雞腿及輕煎帶子！
Sautéed Frog Leg with Garlic Herb Butter in Crispy Basket $128
一客5件炸田雞腿，以炸春卷皮做成脆籃，伴少少沙律菜，賣相的確花咗啲心思。田雞腿頗大隻，炸完都無話縮晒水，而且，好香蒜蓉、牛油香味，味道挺似港式嘅避風塘，只喺略嫌有少少乾身。配點餐酒，可能別有一番風味！
Seared Scallops with Figs and Sesame Shiitake Mushroom Salad $160
兩粒燒帶子絕對有睇頭，燒得外層焦香，咬落卻彈牙爽滑，極具質素；而伴碟嘅無花果亦十分清甜，中間嘅花菇沙律配芝麻醬，花菇冰涼帶爽，又有芝麻嘅濃香，好食。
湯品共有3款，蘑菇湯相對較常飲，所以，我哋揀咗法式龍蝦湯及洋蔥湯。而前兩者可加酥皮，只需額外俾多$20。
Lobster Bisque with Cognac $75
由於燈光關係，色澤睇落唔喺咁橙紅，不過，味道就聞都聞到蝦香味，食友話入口龍蝦味爆發，但稍稍認為質感薄身咗少少。
Traditional French Onion Soup ‘Au Gratin’ $95
法式洋蔥湯，厚厚嘅焗芝士皮，差啲以為喺酥皮，故此，此湯唔接受加酥皮。篤開芝士皮，湯色深沉充滿洋蔥香，又加入咗麵包片，個湯變得幾飽肚；不過，個人真喺覺得層芝士太厚，感覺好「漏」吓。
青檸雪葩（免費）
飲完個咁重口味，感覺又有點「滯膩」嘅湯，細細一球青檸雪葩唔單止有清清味蕾嘅作用，又可以消消油膩之感。此時，店員亦會走過嚟問問我哋對菜式嘅意見。
頭盤、湯品、雪葩以後，喺主菜出場嘅時候，主菜類會再細分幾個類別：小主菜（Entree）、店家特色菜（Le Marron Favourites）、烤肉（On The Grill），8款選擇中，每款都要二、三百一道菜。
Glazed Honey Pepper Female Barbary Duck Breast with Spaetzle and Madeira Jus $220
我哋打趣咁講，眼前嘅主菜好似小炒皇咁，以法國菜而言，賣相我就覺得唔合格嘞。味道方面，又可唔可所逆轉？鴨胸紅潤柔軟，帶點蜜香及胡椒味，而個汁比較濃且杰身，初時以為燒汁味，嗒嗒吓越食越似家常嘅豉油煎雞翼朕味，好奇問問，店員話喺以一種葡萄牙紅酒煮製。反而，混晌菜式中嘅德國「蟲仔」麵（Spaetzle）幾得意，煙韌有咬口。
Baked Black Truffle Souffle Red Snapper Fillet with Ratatouille Sauce $260
講賣相，依一道紅鯛魚比較花心思，既以燜雜菜（Ratatouille）做個「醬」汁底，又以黑松露梳乎厘作為菜式嘅點綴。個梳乎厘做得有一手，入口輕綿，滲出淡淡松露幽香，不過，夾紅鯛又講唔到話好夾，比較似兩個個體，而肉魚鮮甜，但嫩滑度一般；最後，反而喜歡個燜雜菜，有一份清新感。
甜品及飲品另設有餐牌，8款甜品中，有常見經典嘅法式燉蛋、梳乎厘，而甜品定價為$50-$80。
Baked Egg Tart & Macaron with Strawberry Compoto $65
心想法式蛋撻唔知會喺點？原來只不過喺港式嘅迷你蛋撻，跟期望有啲落差，還好嘅喺兩件馬卡龍都做得有水準，咬落外脆而內裡煙韌，中間填滿士多啤梨及芒果果蓉。再食埋伴碟嘅士多啤梨果肉醬，大大中和番馬卡龍嘅甜膩。
Banana Caramel Cheese Cake Xangos $75
個焗蛋糕卷好好食，外層香脆，因為用上烤焗，而非油炸，健康不油膩，而中間捲入香蕉肉及忌廉芝士，又唧入焦糖漿，所以，味道既豐富，又有層次；而碟內嘅熱情果漿，唔單煮暖咗，酸度亦有所調校，令整個甜品都好平衡。
Camomile Tea $38
食友嘅洋甘菊茶，用上Twinings品牌，質素相對有保證，但味道如何？卻無細問食友嘅感覺。
Latte $38
小弟慣常甜品配鮮奶咖啡，雖然依度唔喺咖啡店，但杯鮮奶咖啡沖調不俗，拉花雖則唔夠細緻，但亦都似模似樣；入口醇香，細滑而平均，唔使加糖都已經OK！
環境及服務上，都唔多可挑剔嘅地方，因為，確實佈置上既古雅、又夠私隱，而店員貼心嘅招待、適切嘅跟進，都讓客人食得稱心愉快。而喺晌菜式上，整體而言未有帶嚟好多驚喜，無論賣相，抑或味道，未有預期中嘅效果。
個人評分
味道：6/10
環境：8/10
服務：8/10
抵食：6/10
平均每人消費：HK$630
味道：6/10
環境：8/10
服務：8/10
抵食：6/10
平均每人消費：HK$630
餐廳資料：
Le Marron
銅鑼灣怡和街2-6號英光大廈12/F
2881 6662
Le Marron
銅鑼灣怡和街2-6號英光大廈12/F
2881 6662
沒有留言:
發佈留言