餐廳隱身晌旺角一幢商廈，跟上次嚟個環境變化唔大，裝修簡單，幾張梳化椅，矮櫈，陳設家常，周圍掛點富特色嘅彩布，貼滿客人嘅即影即有照片，播著輕悠音樂，甚為住家，較大變化就喺以前嘅木枱，變為依家枱面鋪上五顏六色嘅磁磚，繽紛富特色。
叫得私房菜，就梗喺唔使諗食啲乜，由大廚發辦，務求食出驚喜。咁收費又點？$150-$350，預訂時講低人數，俾個預算老細，佢就自有安排，當然，最好你就講聲有咩唔食，減少尷尬機會。
土耳其咖啡 依度飲品唔多，只有土耳其咖啡、紅石榴茶及蘋果茶，所以，我相信店主都唔介意你自携飲品。試試土耳其咖啡，原來會喺開爐即煮，煮完咖啡連渣直接倒入杯內，黝黑嘅「齋啡」味道較剛烈而帶苦澀，鮮奶咖啡還是小弟心水。反而，盛載咖啡嘅銀杯小巧高貴，雕花精緻，更引人注意。
紅石榴茶
朋友嘅紅石榴喺即沖飲品，店主更俾個包裝我哋睇睇。據介紹，紅石榴好有營養價值，而味道酸酸甜甜，友人反而將焦點放晌杯中嘅「紅寶石」茶匙之上。
田園沙律
簡單以青瓜、蕃茄、紫洋蔥、沙律菜伴點胡麻汁，入口鮮爽，但感覺較為和風。
炸茄子及薯仔薄片
炸嘢一向深受港人歡迎，茄子及薯仔切成薄片香炸，香味十足，但效果有點油膩，而且，預期口感會喺帶點脆，卻喺偏腍，伴上嘅茄醬而非原本嘅自製乳酪醬，讓人有少少失望。
土耳其乳酪芝士炸物拼盤
一客4件，各有唔同形狀，依道就喺較具特色嘅乳酪芝士炸物。講明自家製，所以外皮唔喺來貨，而喺自家搓製嘅麵粉皮， 外皮甘香，只喺略為厚身，帶些微煙韌口感，內裡填滿乳酪芝士，幾濃厚重味。
土耳其香草蕃茄烤雞
店中嘅招牌菜，亦喺店東嘅家鄉餸，鮮雞用10多種香料醃透，釀入蕃茄米飯。烤雞烘得金黃，香氣四溢，一剪開雞隻，熱氣上騰，非常新鮮熱辣；味道如何？皮脆肉嫩，又帶點焦香，雞肉醃得夠入味，略嫌飯粒未夠乾身，否則更好食。上次仲會附上一小兜微酸嘅酸乳酪醬作佐料，今次則只伴少少胡麻醬在碟旁。
土耳其西式椒釀香草乾果素菜飯
大大個紅椒及黃椒釀入乾果素菜飯，裡面又喺填得滿滿，極飽肚嘅菜式。一個椒面唧上茄醬，另一個唧上乳酪醬，其實感覺有啲迤。還好喺菜式幾清新，米飯又加上提子乾、紅蔥碎，增加口感，如再加少少合桃碎、瓜子仁，相信仲美妙。
招牌巴東牛肉
店主家人嘅另一家店賣印尼菜有道招牌巴東牛肉，不時也會放晌依邊俾客人試試。牛肉色澤深沉，入口香料味濃郁，非常惹味嘅菜式，唯可惜質感有啲韌同埋乾。
沙嗲雞肉串燒
亦喺印尼菜嗰邊嘅另一撚手菜式，雞肉烤得焦香，咪睇佢「烏捽捽」，皆因又喺用上多種醃料，香味有層次，雞肉亦好鬆軟，好食。
甜品（土耳其棉花糖、芒果雪糕、土耳其軟糖）
以大銀盤登場，已經夠晒特色，而甜品中嘅土耳其棉花糖及軟糖，更喺有壓軸、驚喜嘅感覺。
土耳其棉花糖
因為太想知佢喺點，所以，先試土耳其棉花糖，外貌有啲似龍鬚糖，不過質感完全喺兩回事，拎上手好輕飄飄，但入口即溶，有點蜜糖香，但唔太甜，極之特別。
以火龍果盛載芒果雪糕，趁未溶要快快食，雪糕嘅芒果味幾清甜，當然，甜度又唔會好誇，軟滑不俗。
土耳其軟糖
軟糖共有兩款，細細粒有唔同顏色嘅喺土耳其水果軟糖，而較大粒白濛濛嘅喺土耳其開心果軟糖，確實味道喺偏甜，但煙煙韌韌，又有唔同味道，後者更有少少果仁香，一邊嗒住當零食，一邊繼續同友人傾偈，幾好架！
店內各式土耳其軟糖亦設有零售，有興趣可以直接向店主查詢。
同店主傾談之間，佢仲話搞咗個「平10蚊」嘅促銷推廣平台apps，雖然未喺好知乜嘢，總之，都望佢成功！
其實，土耳其菜喺食啲咩呢？晌網上搜尋一下，會喺啲麵包、乳酪、烤肉（特別喺卡巴），又無醬不歡，好用香料做菜。今晚所食嘅菜式除乳酪芝士炸物、烤雞外，未喺好完全體現出土菜嘅特色。賣相比較家庭，來來去去都喺蕃茄及青瓜片，醬料亦一喺胡麻，一喺就乳酪，同埋太多飯類嘢，據店主講之前有客投訴食唔飽，故為怕待慢客人，菜式上加多少少米飯，依個都可以理解。作為嚐一嚐人哋嘅家鄉菜，見識吓又無妨。
個人評分
味道：7/10
環境：7/10
服務：8/10
抵食：6/10
平均每人消費：HK$250
環境：7/10
服務：8/10
抵食：6/10
平均每人消費：HK$250
餐廳資料：
我愛伊斯坦堡 I Love Istanbul
旺角西洋菜南街1A百寶利商業中心13樓4室
68007776
旺角西洋菜南街1A百寶利商業中心13樓4室
68007776
沒有留言:
發佈留言