梨滿園韓國料理 Lee Moon Yuen Korea Restaurant：薄梨多銷

新年前都各有各忙，卒之，趁新一年伊始，同幾位老友聚一聚，談談近況之餘，更暢談美食之事，是夜聚脚地就晌女人街內嘅梨滿園，少蒲旺角嘅友人覺得餐廳有少少難搵。

店內以沉實嘅啡色為主系，配上石磚牆，再加上仿木窗嘅配襯，讓環境帶出點點傳統韓國色彩，平實簡約；然而，梳化椅選用紅色、黃色，令人覺得唔會過於死板，有種跳脫嘅活力。

小弟是晚遲到，所以，一切食物都由友人們發辦，嚟到就有得食，唔使操心。然而，餐牌內除咗分門別類，更圖文並茂，非常清晰。類別方面，有烤肉（共6大版34樣選擇）、廚師精選、煎類、魚類、鍋類、湯類、麵類、飯類、配菜、飲品和酒類，單講食物，大大話話近百款，認真選擇多多。

此外，午市特價餐、下午茶特價餐、以及二、四、六人嘅超值晚市套餐，都喺慳錢之選，就好似超值晚市套餐，為起嚟都喺百鬆啲蚊一個人，經濟實惠，好附合蒲開旺角嘅年青人清消費水平。

晚上嚟到，如果本身唔好烤肉，但又想食韓國嘢，大可考慮佢哋嘅特價晚餐，配埋白飯、兩款配菜、例湯，最平$42就都有交易，抵到爛呀。

前菜

韓式嘅前菜小碟已經喺一餐韓菜不可或缺嘅部分。薯仔絲、豆角、白蘿蔔絲、大豆芽、南瓜同泡菜，各有特色，各領風騷，個人較喜歡粉綿嘅南瓜，以及爽脆嘅薯仔絲。

濟洲島黑毛豬五花腩 $138 / 150g

食友嘅極力推介，話佢油香十足，加上無醃過，所以有肉味。睇睇賣相，比想像中少脂肪，不過，烤熟後果真甘香油潤，但又唔覺話好肥膩，肉味濃之餘，口感充滿嚼勁 。想食得清新少少，可以夾生菜食，想惹味少少，又可以夾辣菜絲，悉隨後尊便。

鮮帶子 $128

是晚喺燒烤之夜，所以，再嚟喺燒吓鮮帶子，帶子既大粒，睇落都好新鮮，一客有8大隻。簡單鹽同黑椒調味，烤好即食，份外鮮甜，口感彈牙，以咁嘅質素，賣咁嘅價錢，實在抵食。順帶一提，店內嘅烤爐採用下抽風式，所以，煙霧唔大。

鮮大蝦 $128 / 4隻

越南虎蝦成隻手掌咁大，夠晒有睇頭，全部半開邊，方便易啲烤熟。啖啖蝦肉放入口，雖然唔喺話爽到彈起，但質感不俗，烤完之後唔會死死實實，又無話霉霉爛爛，蝦味都唔差；此外，蝦頭亦唔好嘥，店員話再燒耐少少，有唔少甘腴嘅蝦膏。百零蚊有成4大隻，另一抵食之選。

水冷麵 $70

食咁多烤肉，嚟一客凍涼嘅水冷麵會唔會覺得好爽呢？水冷麵嘅賣相頗精緻，麵條本身已經夠晒爽口，加埋酸酸爽爽嘅白蘿蔔片，「韓」氣透心，真喺涼快醒神。

海藻湯 $68

加多一客海藻湯，緩和一下太冷涼嘅感覺，諗落又喺咪好有趣呢！海藻湯以韓式瓦缽盛載，非常滾熱辣，而且份量不少，撈一撈，發覺湯料十足，有海藻、大蔥、細蜆及牛肉，湯頭挺清香而帶鮮味，比預期嘅好！

雖然有好多真露、燒酌、啤酒……等等，不過，同枱老友對酒都無興趣，而其他啱心水嘅嘢飲都喺啲汽水，所以，就唔多講。梨滿園食物嘅質素比預期中好，但收費卻幾大眾化，真喺幾啱一大班後生仔嚟韓燒吓。

個人評分
味道：7/10
環境：8/10
服務：8/10
抵食：8/10
平均每人消費：HK$200

餐廳資料：
梨滿園韓國料理 Lee Moon Yuen Korea Restaurant
旺角通菜街1A-1L號威達商業大廈Deli2 1樓
2660 7368