真成海鮮火鍋 Tsang Shing Seafood Restaurant：真饈百味

珍饈百味唔使小弟多講，都知形容喺食盡好嘢，唔單止好，仲喺珍貴美味；餐餐食好嘢唔喺人人都俾得起，有幸有份穩定嘅工作，讓我間唔時都可以食餐好，享受一下。借用「百味」一詞，除咗茶記，就令我諗起大牌檔，小炒、煲仔菜……乜都有，豈止百味，總之今晚嚟到「真成」，雖然唔喺咩珍饈百味貴價嘢，但絕對喺好懷念嘅港式風味。

晌個熟食市場內，其實有唔少鋪位，不過，真正有租用做生意嘅都只不過喺三、五、七檔，就連早前嚟過幫襯食晏嘅「813」都執埋。故此，中心嘅空間都成為一、兩檔大排檔嘅地盤。

所有菜式由友人發辦，小弟無乜太多意見。菜牌印到五顏六色非常搶眼，除散嗌嘅菜式，亦有啲抵食孖寶。

小炒以外，更做埋火鍋，有多款湯底選擇，新鮮海鮮及多種配料，一應俱全。

因為同行嘅友人唔喺太知小弟有寫食評，唔多方便擺晌面前慢慢影，所以，小弟都低調行事，碟碟菜都快拍一、兩張就算，故好多菜都喺長距離拍攝，效果未必理想。

黑椒牛仔骨 $78

黑椒做得惹味，辣度適中又啱細路仔食，而牛仔骨都夠軟腍，又入晒味，剩番少少汁撈飯都好食。

菠蘿咕嚕肉 $60

啲咕嚕肉裁得好大件，成件扒咁，粉漿有少許厚，但個汁調得唔錯，入口唔搶喉，不過，洋蔥、燈籠椒就多，菠蘿得幾粒！

荔芋豬頸肉煲 $65

晌大牌檔食煲仔菜寧舍有風味，以瓦煲盛載，有歲月嘅痕跡。芋頭又腍又粉，豬頸肉質感咬落爽口，個汁似乎落唔少椰奶，帶點椰香。

豆腐炆斑腩煲 $60

另一道煲仔菜都好食，雖然，預計都唔會好咩靚魚，但啲斑腩都好嫩滑，而豆腐亦不相伯仲，同樣入口嫩滑有豆香。

蒜蓉炒什菜 $48

只要夠鑊氣，手勢唔太差，依道菜都應該唔差得去邊，什菜喺白菜仔溝菜芯，充滿蒜香。

魚湯浸菌蔬 $60

以為淨喺得啲菜，原來仲加入魚腐，個魚湯不俗，嗒到有少少鮮味，加埋其他什菌、時蔬，大堆頭嘅菜式，夠大路人人啱食。

揀咗一份孖寶（B）， 豉椒炒蜆搭馬蹄蒸肉餅或京都汁豬扒，每份賣$108，一向依類組合都會比散嗌平十元八塊，但事後寫食評再翻睇先知：豉椒炒蜆散叫$55，馬蹄蒸肉餅就$48，京都汁豬扒則賣$60，我哋點咀前兩者，夾埋只喺$103，蝕咗$5俾佢！

豉椒炒蜆

炒蜆確然惹味，啲汁用嚟撈飯更喺一流，至於啲蜆，養得夠無乜沙，亦好少空殼無肉，所以，就算散點都抵食。

馬蹄蒸肉餅

肉餅打得鬆化，仲混入好多馬蹄，所以，食落多一份爽口感，只喺略嫌加咗唔少肥豬肉，雖然脂香，但感覺有少少膩。

肉絲炒麵 $50

個炒麵唔錯喎，炒得外層嘅麵條脆口，而肉絲、菇菌又落得唔少，碟頭夠大，抵食。

鹹魚雞粒炒飯 $50

鹹魚配雞粒不嬲都喺好拍檔，炒飯夠乾身，食到尾都唔油，鹹香惹味，大牌檔嘅一貫水準，同樣，份量夠多。

都好一段日子無嚟大牌檔食飯，平均每碟餸菜都只喺六、七十，夠經濟，碟頭大，小菜夠鑊氣，煲仔滾熱辣，環境可能地踎少少，但勝在唔拘束，無茶芥，無加一，服務有時仲好過啲酒樓，難怪咁多街坊、食客支持。政府搞埋咁多美食車，不如將啲熟食市場發大嚟搞，好似台灣夜市、新加坡啲熟食中心仲好啦！

個人評分
味道：8/10
環境：7/10
服務：7/10
抵食：9/10
平均每人消費：HK$70

餐廳資料：
真成海鮮火鍋 Tsang Shing Seafood Restaurant
葵涌和宜合道24號熟食市場C1鋪
2481 7728