奇華餅家 Kee Wah Bakery：芋頭臘鴨雙腸飯煲飯

食剩啲芋頭炆臘鴨唔夠當一餐飯，醒起屋企有啲臘腸、秋葵、金菇，而記得以前有間餐廳推出過啲「飯煲飯」，因為小弟屋企無瓦煲，所以，就照辦煮碗，整個芋頭臘鴨雙腸飯煲飯。材料有隔夜餸尾芋頭炆臘鴨，秋葵，金菇，臘腸及膶腸取自奇華嘅出品，大牌子，又老字號，較有信心。

無論臘腸定膶腸，同樣以真空包裝，前者一盒有10條，後者則有8條。盒內有張單張紙條，簡單介紹最佳食法，不過，小弟為人懶，索性一煲過咁整，當然，效果唔喺最理想。最理想喺臘腸跟米同時蒸煮，蝦眼水時再加膶腸，臨尾5分鐘先放秋葵，咁秋葵就唔會過熟。 

砌成碟頭飯，又整色整水，只喺為咗好睇啲。近期屋企煮開三色米（糙米、紅米溝白米，比例1:1:2），為咗糙米及紅米軟啲好食啲，更以熱水預先浸腍少許，此外，家中個樂聲牌飯煲更可以揀煮糙米模式，所以，個飯底出嚟個效果非常好，軟熟得嚟仍有少少咬口，吸收咗啲臘腸、膶腸嘅油香，份外甘腴。 

而啲臘腸、膶腸滲出玫瑰露嘅酒香，原先睇啲臘腸好似幾肥，蒸好後送入口，又唔喺肥得咁緊要，至於啲膶腸，的確好香，口感細緻蜜潤。當然，加埋啲芋頭、臘鴨，就香味無窮！ 

雖然，今次煮飯仔似介紹食譜多過食評，但大部份嘢都喺要有煮，先至有得食，煮食煮食，就是如此！

個人評分味道：7 /10
環境：- /10
服務：- /10
抵食：- /10
平均每人消費：HK$0（好友送贈）

餐廳資料：
奇華餅家 Kee Wah Bakery
中環港景街1號國際金融中心商場1樓1018B號舖
2536 0118