餐枱鋪上灰色絨布，枱上又放有不少精緻擺設，如蠟燭燈、鹽及糊椒盅，不過，枱櫈嘅編排較銅鑼灣店為逼。
跟銅鑼灣店一樣，餐廳已說明無任何時間嘅限制，基本上只做一輪生意，所以，客人可以慢慢品嚐，認真細味，唔單止喺廚師嘅心機，仲有店長、店員嘅誠意服務。況且，整個套餐一共9道菜，更加無理由狂風掃落葉咁掃落肚架。
歡迎小點、法國牛酒油包配自制特色醬先打頭陣喺精緻嘅歡迎小點及麵包碟。巴馬火腿捲成花形，灑點葱花伴上薯蓉，放晌「湯匙」用意就喺要一啖放入口，份量剛好，鹹香油潤嘅火腿配搭綿滑薯香嘅薯蓉，簡單好食。而麵包碟有兩款：法式牛油包及提子麥包，前者軟熟而煙韌，好有口感；後者當然唔喺港式嗰啲啦，較黏綿，有陣陣麥香，包內混有提子及合桃粒，同樣好食；此外，另一精彩之處，兩走伴醬：蜜糖甘筍醬及煙燻椰菜花醬，柔滑細膩，味道有個性，尤其後者，無諗過搵椰菜花做塗醬，甚具創意。
法國生蠔
上一次晌銅鑼灣試過佢啲生蠔已知道喺上好貨色，即場開夠新鮮，但佢哋定價唔平，不過難得原來今晚喺Oyster Night（逢星期二），有買一送一優惠，好划算。
左至右，亦喺淡至濃嘅排列：Isabella，Krystale、Gillardeau（每隻$88）。Isabella蠔味不俗，海水味較清，口感偏向綿滑；Krystale入口爽脆，海水味強，餘韻悠長；Gillardeau口感同以爽脆為主，蠔味濃，但相對海水味無咁搶，個性強！
美國穀飼牛肉他他配溫泉蛋
套餐嘅第一道菜式（前菜），賣相精緻，牛肉他他採用美國穀飼牛肉，做得好軟滑，食落唔似生肉咁，加上伴點黑醋汁，有種提鮮嘅效果。溫泉蛋喺鵪鶉蛋嚟，小巧可愛，做前菜好適合；裝飾用嘅蝦片，喺好童年時嗰隻成塊面咁大嗰款。
西班牙蕃茄凍湯
湯品有兩款，當然各點一款試試。依一款凍湯都好耐無飲過，色澤偏橙，初時都疑惑喺咪蕃茄凍湯，入口涼涼哋，但感覺下忌廉重手，所以，奶味比較強，蕃茄味唔算突出，但質感就好滑溜。
龍蝦忌廉濃湯
相對地，個龍蝦湯超水準，好正，簡單一句就喺香濃幼滑，龍蝦味果真十足，口感幼滑如絲。
蘋果木煙燻挪威藍鰭吞拿魚配香檳凍伴黑魚籽及三文魚籽
跟住上場喺一道特色嘅煙燻小主菜（Smoked Entree），以膠蓋冚住，廿蓋內白蒙蒙一片，一打開，煙霧四竄，有少少好似拜神嘅氣味。賣相好清新，牛油果刴得好蓉，配上藍鰭吞拿 嘅他他，柔和鮮味得很。中間一小粒喺香檳凍，酒香冰涼，玩味十足；三文魚籽轉咗蟹肉，撈一撈黑魚籽，鹹鮮味一湧而出。
輕煎法國鵝肝配杏仁撻、黑毛豬肉卷伴金巴利汁
第二道小主菜（Entree）有兩個選擇，小弟揀咗法國鵝肝，鵝肝煎得外脆內軟，油潤甘香，用料靚，以及師傅手勢好喺毋庸置疑，沾一點金巴利汁，微微酸中和一下，乜油膩感都無晒；不過，件杏仁撻雖然好有杏仁嘅堅果香，但撻殼有啲腍，而黑毛豬肉卷做成春卷形態，鹹香脆口，個人覺得未能突出黑毛豬嘅特性。
香煎北海道帶子配芬蘭雞油菌意大利雲吞伴意大利鹹肉蛋黃醬
老婆則揀咗北海道帶子，帶子既大粒，又厚肉，入口鮮甜彈牙，而以意大利雲吞皮包住，多添一份煙韌口感，配上雞油菌，淋上鹹肉蛋黃醬，令味道更富層次。
番石榴雪葩
經過前菜、兩道小主菜，都喺時候清清味蕾，準備細嚐主菜，作為間場喺番石榴雪葩，入口超重番石榴味，天然清新，酸香醒神。
套餐定價在乎所揀嘅主菜，一共5款選擇，分兩個價錢：$880 / $980，所以，晌度食餐飯其實一啲都唔平，不過，作為特別嘅日子嚟慶祝一下，感覺會喺唔一樣。
紅酒燴牛面肉 $880
早前晌agnès b. LE PAIN GRILLÉ試過一道燉牛臉頰，諗起都仲回味緊，既然今晚嘅主菜有牛面肉，都想再回味吓，亦比較兩者手勢。Amina嘅牛面肉咪睇佢成嚿炭咁，入口超腍，燴得極之鬆化，紅酒汁亦好入味；伴碟嘅露筍入口細嫩無渣，墊底嘅薯蓉又夠晒幼滑，整道菜都有水準。
香煎挪威黑鱈魚配蕃茄沙沙伴蕃茄清湯 $880
老婆一向愛食銀鱈魚，所以，想想黑鱈魚又會喺點！碟挪威黑鱈魚灑下少少香料、食用乾花作為裝飾，頗有美感。細細件嘅黑鱈魚，外皮煎得非常香脆，肉質口感嫩滑，又甚具彈性；底下嘅蕃茄清湯以鮮味取勝，味道清新！
食甜品之前，店員先詢品客人餐飲要啲乜，更捧嚟德國Ronnefeldt及英國Twinings茶包，讓客人自行慢慢挑選。店員唔單止講有咩口味，亦細心講解各花茶嘅特色。老婆揀咗洋甘菊，貪其可降低膽固醇、紓緩情緒；小弟照慣例嚟一杯鮮奶咖啡就可以嘞！
洋甘菊清澈嘅洋甘菊花草茶，以玻璃壺上，飲落微苦而有一份回甘。
鮮奶咖啡
杯咖啡伴有一小件蝴蝶酥，蝴蝶酥幾鬆脆，不過，咖啡就沖得普普通通咁啦。
朱古力布朗尼配紅酒燴梨伴瑞士冧酒雪糕
整道甜品嘅配襯及擺設都好有心思，布朗尼做得相當唔錯，濃香，質軟，而雪糕揀用Movenpic冧酒雪糕，味道好正，不過，紅酒燴梨就無咗，有番啲生果補足吓：士多啤梨、紅桑莓、藍莓及紅番石榴。
法式焦糖燉蛋配沙巴翁伴瑞士香草雪糕
焦糖燉蛋做得好柔滑，蛋香味中規中矩，Movenpic嘅雲呢拿雪糕，睇到雲呢拿籽就知真材實料；不過，個人唔太鍾意將雪糕球放晌燉蛋之上，因為雪糕球溶得快，會軟化咗燉蛋上面嘅焦糖。
自家制朱古力
甜唔後伴住咖啡嘅仲有店方自家製朱古力，就好似喺法國菜嘅法式小甜點（Petit Four）咁，Petit "Five"5粒朱古力（左至右）有榛子、杏仁、松露、士多啤梨及藍莓口味，士多啤梨口味以白朱古力配上果蓉，着實唔錯，杏仁及榛子口味喺老婆至愛，整體朱古力都做得好滑溜，為今餐有個完美終結。
上菜速度平均，一道菜接一道菜之間都有些微空間，讓人可稍作緩衝，等人慢慢細味每道菜之餘，更可記低味道嘅感覺。除用料精之外，配搭都睇出花咗唔少心思，城市人一向衝衝乜都趕，晌度你就會自自然放慢腳步，細吃，細嚐！
個人評分
味道：8/10
環境：8/10
服務：8/10
抵食：7/10
平均每人消費：HK$1,115
環境：8/10
服務：8/10
抵食：7/10
平均每人消費：HK$1,115
餐廳資料：
Amina Modern European
尖沙咀金馬倫道54-56號龍記大廈5樓A號舖
6018 0244 / 6386 1420
尖沙咀金馬倫道54-56號龍記大廈5樓A號舖
6018 0244 / 6386 1420
沒有留言:
發佈留言