奇華餅家 Kee Wah Bakery：好友狂嚐曲（45）

一到聖誕、新年，朋友間就會送贈吓小禮物，以表心意。今個聖誕都幾有食神，美味曲奇停不了，皆因又收到友好送贈嘅曲奇，喺奇華嘅聖誕限量版熊貓曲奇。

熊貓曲奇

奇華一向都有做曲奇，以往都試過佢唔少款式，例如：朱古力粒朱古力曲奇、提子燕麥曲奇。至於今次嘅限量版，其實應叫季節限定，因為嬌紅嘅包裝盒印有戴上聖誕帽嘅熊貓，啜住手指，趣緻可愛，不過，內會嘅熊貓形曲奇就跟以前嘅一樣。

一盒有18片，片片獨立包裝，衛生方便。件曲奇最大賣點就自然喺個熊貓造型，可愛夠萌，喺牛油曲奇夾朱古力曲奇，入口頗為鬆化，既有牛油香，又有朱古力味，睇得又食得。

聖誕蝴蝶酥糖果盒

另外，趁着聖誕佳節，仲有多一盒聖誕蝴蝶酥糖果盒，純白冬日嘅聖誕村做盒面圖案，夠晒應景。內有3款零食，包括：原味手製鳥結糖（10件）、手製杏仁小紅莓鳥結糖（10件）及玉桂蝴蝶酥（2包，每包3件）。

原味手製鳥結糖

幾香牛奶味，味道清甜，唔會過份死甜，入口質感煙煙韌韌，又混和唔少花生粒增添咬口，感覺比以前做得好咗。

手製杏仁小紅莓鳥結糖

真喺進步咗，以前得好少小紅莓，今次食幾粒都交足貨，落得夠多杏仁粒及小紅莓，味道甜甜酸酸，又帶點奶香，味道更有層次。

玉桂蝴蝶酥

屬全新產品嘅玉桂蝴蝶酥一打開個包裝，玉桂嘅香味非常突出，相反，入口牛油味就被玉桂味冚得七七八八，然而，酥脆度就依然十足，睇佢啲一層一層嘅酥皮層就知唔喺流。

平時喺朋友請我食曲奇多，但咁大盒曲奇無理由獨享嘅，梗喺要分甘同味啦，所以，今次變咗好友共嚐曲。

個人評分
味道：7 /10
環境：- /10
服務：- /10
抵食：- /10
平均每人消費：HK$0（好友送贈）

餐廳資料：
奇華餅家 Kee Wah Bakery
尖沙咀麼地道66號尖沙咀中心UG54-57A號舖
2311 0939