Phoenix Sweets：無可鳳告的美味

有過一次品嚐Phoenix Sweets嘅杯子蛋糕嘅體驗，都喺今夏元創方搞咗個沖繩夏祭，多謝朋友送小弟兩個杯子蛋糕。但可是當被問及有關Phoenix Sweets時，真喺無可奉告，無乜嘢可以講，因為對佢哋嘅認識唔深。所以，今次「的」起心肝偷空過嚟元創方行吓，順道拜訪Phoenix Sweets。

第一人次嚟到，店內裝修真喺幾靚，好有童話中公主小屋嘅感覺，一室潔白亮麗。

上次已經聽朋友介紹過依間店，得知除杯子蛋糕外，仲有好多不同嘅產品。適逢聖誕，更見唔少產品化身成聖誕限定。

晌參觀期間，亦發現唔少嘢喺公平貿易、有機嘅產品！

一入門口就見到餅櫃，一個又一個的骰小巧、細緻漂亮嘅杯子蛋糕，排列整齊呈現眼前，多款唔同嘅口味都睇得人流口水。

如果有打算晌度嘆番個下午茶，不妨考慮佢個Sweet Afternoon Tea Set，$50就任揀一款杯子蛋糕，再加一樽Santa Vittoria意大利有汽果汁，相對很划算。

最後揀咗柚子（Yuzu）及玫瑰伯爵茶（Rose Earl Grey），放入精緻嘅小盒內，方便拎走。盒面更貼有溫馨提示，無需冷藏，牛油忌廉先有最好狀態。

Yuzu $35

以蜂蜜柚子蛋糕配100%熱情果牛油忌廉為組合，色澤金光，加上時值聖誕，多配上一小具聖誕裝飾，份外別緻。蛋糕內裡加入柚子肉及柚子皮，既有牛油香，又有柚子嘅香及蜂蜜嘅甜，而且，口感鬆軟且微微濕潤；至於啲牛油忌廉雖然以熱情果做，但無想像中咁酸，反而幾清新、軟滑、輕柔而不膩！

Rose Earl Grey $40

機玫伯爵茶杯子蛋糕比柚子杯子蛋糕做得更靚，粉紅色嘅牛油忌廉唧成玫瑰花形，已經襯到絕，再糝上少少玫瑰花瓣碎，主題就更突出。以公平貿易伯爵茶蛋糕伴上有機玫瑰牛油忌廉，蛋糕充滿伯爵茶茶香，同樣綿蜜鬆軟；玫瑰牛油忌廉以有機玫瑰水製作，可見其誠意及認真，而且，做得非常柔滑，富玫瑰幽香，又無死甜嘅弊病，實在出色。

前後兩次試過Phoenix Sweets嘅杯子蛋糕，都覺得水準無跌，而且，配搭有心思，晌節日更加添小道具都無額外加錢，佢哋對做杯子蛋糕嘅堅持及一絲不苟，依啲客人都睇在眼裡！

個人評分
味道：8/10
環境：8/10
服務：7/10
抵食：7/10
平均每人消費：HK$35

餐廳資料：
Phoenix Sweets
中環鴨巴甸街35PMQ元創方Staunton 1樓S103號舖
9864 9193