Smile Yogurt & Dessert Bar：好友狂嚐曲（48）

好友共聚，晌佳節期間總會送上點小禮物，今篇嘅好友狂嚐曲主角就喺一份小聖誕禮物，嚟自Smile Yogurt & Dessert Bar嘅果香伯爵茶脆脆棒。嚴格嚟講，佢喺店家主打乳酪產品嘅裝飾零食，並非完全喺曲奇產品，不過，口感上都姑且可以拼入去依個系列嘅食評。

上過官網睇睇，可惜無詳細嘅介紹，只見有5款唔同顏色嘅包裝盒，相信喺代表5款唔同嘅口味。

橙色嘅包裝盒，非常搶眼醒目，亦都幾趁聖誕佳節，唔知佢有無啲大盒裝，當賀年禮盒都仲得添！不過，盒背嘅說明唔用金字就好啲，小弟雖無老花，但都睇到反眼。

單睇佢成份，有伯爵茶、開心果、橙皮、檸檬皮……等等，首先，脆脆棒做成酥條，入口確然好鬆脆，一咬一啪就斷，又有牛油香， 而且，開心果及果皮令人食落好有口感，即喺鬆脆中又有啲煙韌咬口，食到尾，朕伯爵茶味先滲晒出嚟，整體真喺幾好食，一盒5條，都唔使眨眼就食鬼晒。

有機會都親自走訪一下，睇睇仲有咩口味，晌度再次多謝朋友嘅餽贈，讓小弟試到佢嘅脆脆棒，亦知道佢哋唔單只乳酪出色。

個人評分
味道：7 /10
環境：- /10
服務：- /10
抵食：- /10
平均每人消費：HK$0（好友送贈）

餐廳資料：
Smile Yogurt & Dessert Bar
尖沙咀河內道18號K11購物藝術館地下G32-33號舖
2138 6210