正斗粥麵專家 Tasty Congee & Noodle Wantun Shop：貴氣粉麵

正所謂平有平食，貴有貴食，正斗就喺粥麵店嘅後者，對上一次幫襯就晌中環國金店，同大佬東嘅午餐小聚；今次同朋友嚟到尖沙咀圓方店，原來已經相隔好幾年之後嘅事。

我哋嚟得早，所以客人唔多。既然開得晌圓方，就唔喺一般平常粥麵店，裝修一環就唔會太過失禮。當然，價錢方面亦又有番咁上下高消費額。

雖然正斗以粥麵專家自居，其實，除粥麵，佢仲有唔同嘅小食、點心、撚手小菜、精選炒粉麵、甜品……等等。

漂爽檳城海蜇皮 $75

唔知點檳城法，所以，好奇點一客，賣相無話好標奇立異，都喺好傳統個樣。雖然啲海蜇皮切得較粗身，但無損其口感清爽帶點柔韌，帶點麻油香。

香辣京都炸醬麵 $54

雖然賣到$54一客，但無論麵還是肉，份量都算足秤。麵條入口幾爽，而味道辛香而唔太辣，非常惹味，幾啖麵，一啖上湯，食完碟麵真喺幾飽。

瑤柱魚翅淨水餃 $60

友人非大食型，一碗淨水餃就夠晒數，依碗水餃貴氣在用料矜貴，既瑤柱，又魚翅 ，味道亦確喺唔錯，餃皮滑溜 ，而且，包得飽滿挺身。

椰汁紅豆糕 $30

本來喺打算叫椰汁桂花糕，點知啱啱賣晒，問我哋要唔要椰汁紅豆糕，照殺。椰汁糕部份有少少判，但幾香椰汁味，而紅豆大粒清甜，總算不過不失！

離開時正值晚市尖峰時間，雖然話開得晌圓方，定價就唔會好親民，唔可以當嚟食碗街坊粥麵，然而，幫襯嘅人亦唔少，大有捧場客，話晒附近都有唔少豪宅。

整體，服務及食物質素都屬中上，幾款食物都算交足晒貨。

個人評分
味道：7/10
環境：7/10
服務：7/10
抵食：6/10
平均每人消費：HK$126

餐廳資料：
正斗粥麵專家 Tasty Congee & Noodle Wantun Shop
尖沙咀柯士甸道西1號圓方1樓1080-82號舖
2327 2628