The Pudding Nouveau：甜品新酒勢

早幾個月先嚟過The Pudding Nouveau，純粹喺帶表姨甥女試佢個英式全日早餐及順道一試新出嘅甜品「烏龍茶法式燉蛋」，其實當時個甜品已出了一段相當時間，不過，對我嚟講算喺新嘢，總之偶爾遇見就當然會試吓。之但喺今晚嚟到嘅目的就明顯啲，喺試試佢哋幾款甜品嘅新走勢。

自從佢哋加多幾款鹹食，依家見晚上嘅飯市都多咗客人嚟幫襯，唔使等到八、九點先旺場！

新出嘅就喺一系列以「雞尾酒 + 雪糕」而製作嘅創意甜品，共有3款，每一款都以一種雞尾酒融入雪糕裡面，而其餘食材配搭及賣相，都環繞番個雞尾酒嚟發揮，我哋就試咗其中兩款。

Strawberry Margarita with Strawberry Rum Ice Cream $78

以雞尾酒杯盛載整道甜品，高雅透徹，睇到裡面加入唔少材料，賣相讓人睇得賞心悅目、誘惑吸引。配搭方面，由下而上有鬆化嘅金寶碎 、朱古力脆粒，一層夾一層，杯面就喺一大球自家製嘅士多啤梨冧酒雪糕，再伴以乳酪、新鮮士多啤梨、藍莓，加隻威化紙蝴蝶做裝飾，最欣賞佢個細心位喺跟雞尾酒咁，將杯口邊黐上少少扮鹽花嘅士多啤梨糖粒。個雪糕球估唔到入口個酒味都幾重，不過，士多啤梨味就略為唔明確，但一羹過夾埋啲金寶碎 同朱古力粒，味道豐富，感覺幾得意。

Pina Colada with Coconut Rum Ice Cream $78

基本上個甜品底同個Strawberry Margarita一樣，都喺金寶碎 、朱古力脆粒、乳酪為基礎，生果改用菠蘿，裝飾則用上威化紙小花。主角嘅酒味雪糕球喺椰子冧酒雪糕，但又奇怪，個酒味較輕盈，無Strawberry Margarita咁搶，相反，椰子頗突出，感覺又幾清新。不過，賣到$78一客，期望菠蘿一環喺用上新鮮貨色，咁先喺佢哋出品嘅一貫品質。

Tiramisu $108

此外，仲有一款新品，就喺依一款意大利雞蛋Tiramisu，喺店家最新出嘅甜品，以意大利芝士餅嘅概念嚟創作，店員標榜話用上100%嘅意大利雞蛋，真喺要嗒真啲個蛋味先。既然喺要創新，賣相就自然唔喺見慣見熟個樣啦，底層以金寶碎墊底，跟住橙黃色嘅意大利雞蛋加馬卡風芝士做嘅芝士漿，柔滑富蛋香，雲呢嗱雪糕加上唂咕粉，濃香幼細，如果金寶碎改用番啲浸咗咖啡酒嘅手指餅，會唔會又再多番啲意大利芝士餅嘅神髓呢？另外，好味還好味，但確實覺得有點貴！

因為跟店主都有啲相熟，食到尾，捧咗個聖誕樹蛋糕出嚟俾我哋試試俾啲意見，意見就唔敢講，當喺交流一下。晌度再次多謝店主先！

噢．聖誕樹聖誕蛋糕 $248

依一款應節嘅蛋糕名為：「噢．聖誕樹聖誕蛋糕」（$248），之前有早烏優惠賣$208，不過，依家無咗。從訂單所見，蛋糕以朱古力蛋糕為基礎，再加有綠茶慕絲及白朱古力忌廉，老實講，外觀好殺食，夠晒吸引兼應節，單喺啲綠茶慕絲樹花逐個逐個唧已經喺一擔手工啦。

切開一睇，一層又一層嘅朱古力海綿蛋糕拼朱古力慕絲，內藏少少朱古力粒，香濃而充滿朱古力味，而外層喺綠茶慕絲，做得柔滑富綠茶香，不過，兩者拼埋個人就覺得有啲過甜，食少少唔覺，如果好似小弟咁一次過食1/4個，則有少少「漏」嘅感覺。佢哋之前都有用烏龍茶做法式燉蛋，咁搵烏龍茶味慕絲代替朱古力慕絲，唔知效果會唔會輕盈少少？入口無再咁重味呢？最後有一樣好奇要向店員查詢，就喺食完個蛋糕都唔知啲白朱古力忌廉晌邊，原來喺加入晌綠茶慕絲度，唔怪得有點過甜嘅感覺，可能唔加嘅效果仲好添！

雖然依家訂無咗個早鳥優惠，不過，賣相咁靚，聖誕節開派對買番個會喺好唔錯嘅選擇。

個人評分
味道：7/10
環境：7/10
服務：8/10
抵食：6/10
平均每人消費：HK$88

餐廳資料：
The Pudding Nouveau
大坑京街17A地下
3585 7325