最特色喺牆上掛咗唔餐具、廚具、器皿、甚至廚櫃把手……等等，感覺令到用餐都多咗份趣味。
餐牌好精簡，就喺幾張A4呎吋餐牌交待晒。有沙律、意大利粉、意大利飯、小食、湯品、廚師推介、全日早餐、輕食、漢堡……等等，飲品方面就有多款咖啡、朱古力，以及多種特色咖啡及沙冰。點餐、送餐都有店員招呼，但就無需加一服務費！
蜜糖燒南瓜沙律 $78
諗住喺Cafe啫，估唔到隻沙律碟咁精緻，雖然喺食沙律唔喺食隻碟，不過，賣相靚靚感覺自然會愉快啲，再者，啲沙律又無話擺放得雜亂無章，印象大大加分。
檸香帶子意大利粉 $118
餐牌所見，有3款意大利粉及1款意大利飯，其實，意大利粉或意大利飯嘅好壞最能直接睇到廚師嘅手勢，不過，點意粉定點飯，都猶豫咗一陣，最後揀咗一客檸香帶子意大利粉，因為見佢英文喺寫住in cream sauce and lemon，好想知喺點樣。
意大利粉中加入少少煙肉碎、三色燈籠椒絲作點綴，讓雪白嘅忌廉汁睇嚟無咁乏味，而個忌廉汁做得好香好細滑，無起粉粒，仲令到個意粉好掛汁；至於粒帶子大粒又厚肉，好有睇頭，略煎過保持刺身嘅柔軟口感，味道好鮮甜，足證用上靚貨。不過，檸檬香味似乎隱若，事後有機會同廚師交流，原來佢話個刨啱啱壞咗，原意喺出菜前再刨啲檸檬菁（即喺檸檬皮皮屑）落去，讓意粉嘅熱力逼出檸檬香味，而又唔會有種酸味嘅感覺，依家改用檸檬汁就似乎未達預期嘅效果。
漢堡亦喺店家嘅招牌菜式，所以，我哋亦揀一客睇睇有幾招牌。漢堡共有3款：香辣車打漢堡（$128）、意式磨菇漢堡（$128）及美式三重芝士漢堡（$138），每一款漢堡都配上薯條及沙律菜。最後，同親友商議好一陣，決定揀意式磨菇漢堡，喺因為用上大磨菇（Portobello）外，又以松露蛋黃醬做汁醬，睇嚟會幾特別。
意式磨菇漢堡 $128
個漢堡份量頗大，單睇件漢堡牛肉就已經有成吋厚，最好就兩三個朋友分嚐。牛肉採用美國貨色，自家手製，食得出鬆化唔死實，又夠肉味，而最欣賞喺佢煎件漢堡牛肉恰到好處，表面有少少焦脆，裡面好似牛扒五乘熟咁，帶少少粉紅，並且極富肉汁。而大磨菇切成絲，炒香放在牛肉之上，配搭上熱溶嘅車打芝士，軟熟嘅包身，的確好好味。唯一挑剔，個松露蛋黃醬嘅松露味欠突出，唔夠個性，另外，雖然食得出有質素，媲美啲大店，但以依區嚟講，加上喺咖啡小店，定價相對進取！
飲品方面，一系列咖啡就唔少得，亦有數款特色咖啡，好似Ginger Latte、Tiramisu Latte……等等，本來都想貪得意試新嘢，不過，由於之前晌Doux飲過杯Rose Latte，覺得好好飲，所以，就想重溫多一次，並想將兩者比較一下。
Rose Latte $36
杯玫瑰鮮奶咖啡雖然唔知個拉花喺乜，猶如外星烙印，不過，睇到紋理細緻；入口好順滑平衡，既有咖啡醇香，又有奶泡嘅綿密感，更唔少得玫瑰嘅幽香，明顯玫瑰糖漿唔會落得太重手，以保持各方平衡。而且，唔使攪，更唔使落糖，每啖都味道及口感都一致，確喺一杯沖調手勢上乘嘅鮮奶咖啡。
Milk Chocolate $48
親友要咗一杯Milk Chocolate，初時覺得收成$48感覺有啲貴，不過，飲完又發覺喺另一回事。佢哋連杯朱古力都會打奶泡、拉花，花形圖案拉得漂亮，但依個都喺其次，朱古力採用60%朱古力製作，喺真正朱古力，並非搵粉開沖，怪唔得親友話個朱古力味感覺特別醇厚。點知佢用60%朱古力？就喺問店員Milk Chocolate同Deluxe Chocolate有咩分別時所講，聽完佢講咪有興趣試吓喺點，最可惜喺後者暫未有供應！
因為食得飽飽就無試佢啲甜點，有機會先再嚟試吓，相信都有一定水準。由於星期日嘅食晏時段，客人都唔算多，所以，服務都好到位。期間咖啡師及廚師都有走出嚟問問客人嘅意見，睇嚟都好有心去改善食物嘅質素及多了解客人口味，小弟都分享咗幾句愚見。同親友傾吓家事之餘，仲研究吓飲飲食食，我哋輕輕鬆鬆、好悠閒舒服咁渡過咗一個周日中午！
個人評分
味道：9/10
環境：8/10
服務：8/10
抵食：7/10
平均每人消費：HK$205
味道：9/10
環境：8/10
服務：8/10
抵食：7/10
平均每人消費：HK$205
餐廳資料：
Coffee Jobs
旺角廣華街3號百利達廣場地下3號舖
Coffee Jobs
旺角廣華街3號百利達廣場地下3號舖
沒有留言:
發佈留言