葡萄緣位處商廈內，格局如一般貿易公司，但角位一處化身成吧位，陳列多款外觀精美嘅日本酒，睇到我都嘩嘩聲，但店主話依堆只喺一小部份，其實佢哋有成過百款，而且，不時有新品，因為日本酒商好興推出啲季節限定、新奇口味嘅產品。
雖然以往都有小酌一杯半杯，只不過都喺紅酒、白酒或香檳，果酒極少接觸，印象中唯一飲過就喺梅酒。不過，今晚大大話話都淺嚐咗近10款，各有各精彩，果真大開眼界。其中數款印象較深，就獻醜分享兩句。順帶一提，啲果酒絕大部分嘅酒精度都唔高，大概9%左右，又帶點果香，入口又有份清爽香甜，所以，好易不自覺飲大咗。
梅仙人香蕉梅酒（720ml）
啲果酒好得意，聞一下會有好濃嘅果香味，好似之前試嘅稻田本店二十世紀梨のお酒同宮下白桃のお酒，都好香梨及白桃味，而想分享依個香蕉梅酒，又確喺聞到一陣蕉味，非常有趣。我哋先淨飲，入口先一陣陣香甜味，感覺帶少少清新，之後，酒香徐徐散發。
北海道牧場牛乳乳酪酒（720ml）
奶白色嘅乳酪酒喺第一次試，先試淨飲，味道酸酸甜甜，喺益力多嘅酒精版，入口柔順幼滑。依隻酒都幾百搭，可以配唔同嘅果酒，所以，又試試混入香蕉梅酒度，酸甜度好平衡，感覺唔錯，更易入口，好啱女生或唔多飲酒嘅人飲用。
梅仙人柚子胡椒果酒（720ml）
不得不佩服日本人嘅創意同心思，早段試嘅稻田本店紫蘇葉果酒，已經覺得嘖嘖稱奇，再試依一樽柚子胡椒果酒，間直抵死過癮。先喺一陣陣柚子清甜味，跟住滲出唔多辣但濃郁嘅青椒味，喺非常得意嘅果酒。
宮下梅酒‧早春（720ml）
跟住試一試啲梅酒，先上場喺依一樽包裝精美嘅「早春」，酒標嘅紅梅下舞妓，令樽酒多添一份藝術氣息。據介紹，採用岡山特產嘅大梅，所以，梅味特別清爽酸香，梅甘酒醇，真喺唔錯。
國盛玫瑰梅酒（300ml）
包裝較為時尚，又以對健康和美容有益為賣點嘅玫瑰梅酒，味道又會點呢？聞一聞，真喺散發出玫瑰嘅幽幽香氣，加冰淨飲可嗒出梅嘅清香，店主話不妨加啲烏龍茶，效果又會特別啲！
國盛紅茶梅酒（300ml）
咪以為梅酒溝茶喺古靈精怪亂咁嚟試，其實，本身真喺有紅茶梅酒依樣嘢，國盛除玫瑰梅酒，就有一款叫紅茶梅酒。唔試唔知，一試真喺幾過癮，呷一啖，先喺梅酒嘅甘酸味，之後紅茶嘅茶味慢慢滲出，似飲梅酒，又似飲紅茶。
鏡頭之下：好友怕我哋空肚飲酒唔多好，特意買嚟Mrs. Field鬆餅，鬆餅夾日本果酒，幾趣致嘅組合，超多謝友人嘅細心。
「葡萄緣」作為一家日本酒嘅供應商，客人自不然都喺啲餐廳、酒店，亦有啲商業機構客，因為有啲日本酒細細樽，設計又精緻，極具和風，作為送俾客嘅紀念品就最好不過，以下就喺其中一款：上撰原酒浮世繪德利入（紅、黃、綠，180ml）。當然，你上到嚟想買番一樽半樽都無任歡迎。
今日嚟到品酒，小弟頓時變咗劉姥姥，「葡萄緣」就成為日本酒大觀園！見識咗好多果酒、梅酒，真喺讓小弟依隻井底蛙大開眼界。店主透露，稍後時間會搬去荔枝角更大嘅寫字樓，預祝佢哋生意更上一層樓。
店舖資料：
D'Angelo Wine Cellar 葡萄「緣」
九龍尖沙咀山林道 23 號 12 樓 1201 室
（註：新地址：九龍荔枝角永康街29-33號兆威工業中心6樓605室）
2730 3890
沒有留言:
發佈留言