利華超級三文治 Oliver's Super Sandwiches：平實無華

這日要到城大出席一啲活動，今晚屋企無飯開，食自已，最好順便晌又一城食埋先走。唔想晌頂層美食廣場食，一支公食嘢可以好「求其」，亦唔會「求其」到搵老麥，卒之就悠閒咁晌利華食番餐。

又一城搵食一向唔平，好食價位唔高嘅就一定排長龍，所以，好似奧利華依類有啲質素，中上價位「快餐店」就經常坐滿人。不過，嚟得依度嘅，快上快落，甚少客會晌度打長躉。

形式真喺跟快餐店無異，只喺排隊落單後有店員為客人奉上食物。一列餐牌4大類套餐：焗薯、三文治、意粉 / 沙律、至尊三重奏（即喺多少少特色，個湯又升級咗高檔少少）。前3者可以散叫，亦可以配餐飲成為套餐，又或配湯連餐飲成為超級套餐，至於最後者「三重奏」就一定喺湯、主菜、餐飲嘅既定組合。

睇完一輪，揀咗至尊三重奏嘅G4餐，星級是日精選餐湯、扁意粉、illy咖啡，都只喺賣$66。

忌廉龍蝦湯

是日嘅星級精選餐湯喺橙紅色嘅龍蝦湯，質感唔錯，稀杰度都差唔多，入口亦有龍蝦嘅香味，不過，咁嘅價錢又咁嘅組合，就咪期望有龍蝦肉，至少小弟依碗就唔見啦，或者好彩嘅有一舊半舊都未定。

挪威煙三文、蜆肉扁意粉配刁草忌廉汁

依個意粉可以散叫，$46一客，晌意粉套餐中加餐飲定價$54，加湯連餐飲則定價為$60。賣相就麻麻哋，「快餐店」質素，猶幸味道方面又令人覺得不俗，煙三文及蜆肉就唔太多，不過扁意粉份量不少，撈勻個刁草忌廉汁，扁意粉少少咬口，忌廉汁又幾香滑，合格有餘！

illy咖啡

話晒illy都喺出名嘅意大利咖啡品牌，無乜理由仲飲檸茶檸水，當然喜好問題就當為別論啦。雖然只喺杯普普通通嘅即磨咖啡，但咖啡香味嚟得幽香醇厚。

並非如大部份客人咁，匆匆食完就匆匆離開，今晚雖然只喺孤身一人，但全無孤單嘅感覺，反而讓自己可以獨處靜思。

個人評分
味道：7/10
環境：7/10
服務：7/10
抵食：7/10
平均每人消費：HK$66

餐廳資料：
利華超級三文治 Oliver's Super Sandwiches
九龍塘達之路80號又一城LG1-01A號舖
2265 7622