個套餐「龍蝦、冬瓜盅、海斑宴」屬全包宴（包茶位、加一及指定數量飲品），不過，又另外收番前菜錢，而且，我哋7個人點半席，大集團即喺大集團，當然收番足額外多出一個人嘅茶錢（$13）。用匯豐卡，就額外平多少少，85折，就以我哋平日半圍計，只喺$975，連甜品共9道菜，由於女多男少，都夠我哋7個人食。
環境方面，比以前高雅咗，多組大型水晶燈，但枱櫈排得有啲密，加上我哋被安排坐得較入，近廚房通道出口位，所以，靚景欠奉。
前菜 $15
依兜仔就喺要收番錢嘅炸魚仔花生，4人一兜，7個人就放低兩兜，等人打牙骹時嘅香脆零食。
一見鍾情 $26
全包宴半圍包一渣橙汁，不過，每人都喺分得半杯。其實同枱女生都唔好喜歡汽水、果汁之類凍飲，反而花茶啱佢哋多啲，從飲品餐牌中揀嚟依款「一見鍾情」，實際唔知喺乜，問個侍應佢都只喺話一球球嗰類花茶。透明玻璃壺內，一球綻放嘅花葉，外觀唔算好漂亮，但味道幾幽香。
芝士上湯焗龍蝦（伊麵底）
整個全包宴嘅菜式都幾平實，絕大部份菜式都無乜花巧嘢，就以第一道上場嘅菜式焗龍蝦，芝士上湯焗，加伊麵底，酒席常見菜式。半席，所以只有半隻龍蝦，蝦肉幾鮮爽，最鍾意佢個汁，稀杰度啱啱好，啲伊麵掛滿汁特別好食。
雲耳勝瓜炒魚崧
啲菜式唔只平實，有啲感覺仲好家常，雲耳勝瓜炒魚崧好多上一輩媽咪都識整，雲耳好爽脆，勝瓜煮得腍，但外層仲有少少脆口感，而魚崧好香鯪魚味，整體感覺就好似食緊屋企飯。
金衣花姿球
其實喺花姿丸，外皮沾滿碎腐皮，經油炸後，腐皮變得香香脆脆，花姿丸好濃墨魚味，一碟有10粒，唔會半圍得6粒咁小家。
錦繡冬瓜盅 / 海皇冬茸羹
湯羹有兩個選擇，我哋要咗後者，一窩冬茸羹夠分7碗，海皇就只有蝦仁，湯內除蛋花，仲有啲冬瓜茸，成個湯羹都比較清。
鮑螺腐卷伴翡翠
雖然唔喺鮑魚，但個螺片外觀及質感都做得幾似模似樣，加埋淋上嘅鮑汁，夠濃稠，真喺有七、八食鮑魚嘅感覺。而腐卷喺以魚腐炸成再切片炒，跟上面個魚崧勁似，味道OK咁啦。
清蒸花尾躉
食魚以清蒸最能體現魚嘅鮮味，由於條魚唔喺好大條，所以，較易蒸得全熟而唔過籠，確實魚肉幾鮮嫩，好新鮮清甜。
瑤柱杞子泡菜苗
主要都喺食啲翡翠苗，青綠嘅翡翠苗以上湯泡浸，入口脆嫩，之不過，瑤柱絲及杞子似喺少少點綴，對道菜個食味無乜大貢獻。
草菇醬油雞
最後一道熱盤，醬油雞不論賣相，抑或味道，都跟豉油雞極之相似，雖然無驚喜，唯功夫紮實，味道富醬油香，皮薄爽口，雞肉嫩滑。
魚形芒果布甸
合格，因為真喺做到基本，布甸挺身唔削，有芒果味，但唔喺超濃郁嗰隻，芒果肉亦唔多，如好彩會分到一、兩粒，外型都只不過搵模做，唔覺喺咩賣點。另外，附上一小壺牛奶，無錯，喺牛奶，唔喺花奶，總喺無咁夾。
以一向嘅美心中菜而言，今晚嘅招呼略為遜色啲，似喺唔夠人手，還是今日突然爆滿，簡單斟茶遞水都要等好耐，還好喺禮貌搭夠。總結一句，整個套餐嘅所有菜式俾人印象唔深刻，有種浮光掠影嘅感覺，但一般而言，份量足晒秤，好夠食，對食要求唔高，或者，無特別話要試吓新嘢、特色嘢，我覺得晌尖沙咀，又有個咁好環境，依個價位都算抵食嘅。
個人評分
味道：7/10
環境：8/10
服務：7/10
抵食：8/10
平均每人消費：HK$150
味道：7/10
環境：8/10
服務：7/10
抵食：8/10
平均每人消費：HK$150
餐廳資料：
映月樓 Serenade Chinese Restaurant
尖沙咀香港文化中心餐廳大樓2樓
2722 0932
映月樓 Serenade Chinese Restaurant
尖沙咀香港文化中心餐廳大樓2樓
2722 0932
沒有留言:
發佈留言