回味茶餐廳：我的星期六美孚早餐 ~ 回味乏力

「回味茶餐廳」嘅前身喺隔離鋪位嘅「回味小館」，以為佢執咗，之後原來頂在現鋪（前身喺賣日本菜嘅磯陣）重整旗鼓再做過。之前嘅回味小館曾幫襯過，可惜印象麻麻，今回見佢翻新搞過，應該俾多次機會試試有無改進到，就拉老婆落嚟食番個「回味」早餐。

鋪內環境跟舊鋪舒適好多，左右兩排梳化椅全卡位，牆上掛有大電視機，中間拍咗多張6人長枱，時下典型茶記格局。不過，裡面冷氣極之強勁，難得先搵到個近廚房位無咁凍。

「精美早餐」選擇A-J共有10款，都喺晌茶記經常見到嘅組合，作風平實，就現場所現，客人大多都喺較多上年紀一輩，晌度刨報紙、嘆咖啡，甚少後生仔、年輕人。

F. 皮蛋瘦肉粥餐 $25

粥餐配家鄉炒米粉或豉油皇炒麵，老婆揀咗後者。碗皮蛋瘦肉粥綿得嚟，又好似加咗啲米粒咁，總之，啲米粒唔喺完全爆成米花，但勝在料多；炒麵唔油，但炒出嚟，麵質有啲腍，感覺好似啲麵煮過籠，然後再兜一兜就算，而且，無乜豉油香味！

G. 健康牛奶麥皮餐 $25

麥皮餐除有一碗牛奶麥皮之外，仲有牛油方包配煎蛋 / 炒蛋 / 烚蛋（任擇1款）及火腿 / 餐肉 / 腸仔 / 煙肉（任擇1款）。個牛奶麥皮好淡，事後同個店主反映，佢先話佢啲麥皮喺無糖，要自行加糖，或可要求落煉奶，咁喺咪應該晌餐牌標明好啲呢，免被人誤會；而個麥皮質感OK啦，但真喺未夠滑，感覺牛奶可加多少少。件牛油方包絕對hea做，牛油搽得極之求其，炒蛋最能睇出師傅功夫，不過，個炒蛋確實炒得麻麻，唔嚡，但一定唔喺滑囉，唯一最好喺件餐肉，用上火腿餐肉點都加番少少分。

熱檸水、熱奶茶

檸水唔多講啦，除非縮皮俾得好少檸檬或先有啲嘢講吓啫，但啲檸檬眼見又實在幾厚皮；而奶茶有啲失望，見佢哋都喺用黑白奶，可惜既唔滑，茶底未夠芳香。

其實美孚茶記真喺有唔少，而美孚依個小社區人口亦好多，理論上絕對養得起咁多間茶記，不過，正正因為茶記多，你做得唔好食，客人自然識選擇。一向都好支持小店、港式茶記，但試過今次，依然從無回味嘅感覺，俾個OK都喺勉強！

個人評分
味道：6/10
環境：6/10
服務：6/10
抵食：7/10
平均每人消費：HK$25

餐廳資料：
回味茶餐廳
美孚美孚新邨3期百老匯街吉利徑23A號舖
2370 0516