雖然御膳以私房菜為主打，不過，她就好似一般中菜館，散點菜式無任歡迎，自由度大，想點就點。當然，傳統觀念都會認為套餐抵啲，所以，2至12人套餐亦應市場需要，定價每位$300-$440之間，就以店主所介紹嘅推介套餐「芙蓉龍蝦餐」，4位用，每位$300，免加一，酒水當然另計，但8道菜已包冷盤、幾道海鮮菜式、兩個招牌小炒、炒麵和甜品，實屬相當豐富。
套餐嘅缺點就喺咩都定死晒，個人就覺得私房菜喺散點同套餐兩者之間，以套餐為基礎，但因應個別需求或偏好而稍作微調。就以今晚嘅菜式，有店方穩打嘅招牌，亦加插新推款式，增加新鮮感之餘，又切合客人口味，一共7道菜連巨型西瓜盅，每人都喺收$400實價。
香芒沙律大蝦球賣相絕對喺令人嘩嘩聲嘅感覺，以獨立「個人」份量做成，有別一貫中菜大堆頭製作，加上墊底沙律菜跟沙律色澤嘅對比，令造型更立體。鮮果沙律有芒果、蘋果、啤梨及士多啤梨，拌以微酸嘅沙律醬，入口味道酸爽，叫人清爽開胃，而且，大蝦球脆漿做得薄，質感帶爽，富蝦鮮味，真喺一道好睇又好食嘅開胃「頭盤」。
四川香辣炒蟹
再嚟就已經喺店中嘅招牌炒蟹，上次試過嘅避風塘炒大肉蟹，已經好令人回味，今次嘅四川香辣炒蟹，真喺萬分期待。隻大肉蟹據介紹有斤四重，齋睇對蟹鉗已非常有睇頭，雖然成碟蟹佈滿川椒，但無想像中咁辣，亦都少麻，不過，依然鮮辣惹味，而蟹肉肥美鮮甜，做得出色！
芙蓉蛋白蒸老虎斑
蛋白跟老虎斑同蒸，起初有啲擔心個「合拍」度，怕蛋白熟而老虎斑生，又或者老虎斑熟但蛋白蒸老晒，不過，估唔到出嚟個效果喺魚肉嫩滑，蛋白就更滑溜。成兩斤重嘅老虎斑，唔單肉滑，仲非常鮮美，而且，起晒骨開邊攤平咁蒸，食起嚟超方便。老虎斑下嘅蛋白，唔知吸收咗魚油鮮香，定心理作用，總覺得蛋白多一份鮮甜美味。
白胡椒香爆南非鮑魚
南非六頭鮑魚，個個有近檸檬咁大。最欣賞師傅將鮑魚鎅紋，令其更加入味，確實，每啖都滿滿洋蔥及胡椒香，帶少辣，肉質軟腍煙韌，不錯！
海皇豆腐大蜆湯
食咗幾道惹味嘅菜式，嚟個大蜆湯就最好不過。啲大蜆認真大隻，打開後有成隻碗咁大，而蜆肉鮮甜，唔喺大而無當；加埋冬菇、豆腐，配以魚湯底，非常之襯，入口又鮮香。
上湯浸白菜仔
白菜仔翠綠鮮嫩，食落清甜，而冬菇厚肉味濃，仲有少少冬菜絲及蒜子。另一焦點，喺個濃郁嘅上湯，雖然味道的確濃厚，之但喺有少少過鹹，未能再多飲兩啖。
蟹油銀芽炒麵
單尾以蟹油銀芽炒麵掛帥，晌其他店鋪都品嚐過依款菜式，加咗洋蔥、韮王、蟹油嚟做，御膳亦做得不俗，既惹味，又鮮香，麵條又帶有韌勁，唯一要改善下喺食落有少少油，未夠乾身，否則就更出色。對比起，小弟較鍾意上次碟招牌御膳炒飯喇！
大西瓜盅
最後喺一道非一般嘅生果盤，如果被我改名，就叫佢做「拳頭西瓜盅」，唔使多講，睇相就知，啲西瓜起肉「專燈」刮到成個拳頭咁大，食起嚟幾「駕勢」，幾咁豪氣呀，再者，啲西瓜起晒沙，又多汁！同埋，要將成個大西瓜起肉，又要保留個瓜殼做盛器，真喺要花唔少時間架，所以，想試依個西瓜盅就記得預訂。此外，內裡仲有青提子、藍莓同士多啤梨，整個西瓜盅放晌沙律菜之上，幾有田園氣色，幾咁繽紛燦爛呀！最後，西瓜盅實在太大份量，打包拎返去慰勞下樓下看更阿叔添。
御膳嘅水準果然無乜點令人失望，用料新鮮，做出嚟嘅味道紮實，個別菜式有特色，兼且賣相令人印象深刻，而且，量足無欺場，令人覺得物超所值，真喺可以一遇再遇！唔收開瓶費，亦無切餅費 ，啱晒一大棚人嚟搞慶生局高興一下！
個人評分
味道：9/10
環境：7/10
服務：8/10
抵食：8/10
平均每人消費：HK$400
味道：9/10
環境：7/10
服務：8/10
抵食：8/10
平均每人消費：HK$400
餐廳資料：
御膳 Imperial
觀塘敬業街65-67號敬運工業大廈12樓F室
3575 9567 / 9029 1530
御膳 Imperial
觀塘敬業街65-67號敬運工業大廈12樓F室
3575 9567 / 9029 1530
沒有留言:
發佈留言