前門飯莊主要賣上海菜，亦有少少京菜同川菜，由冷盤前菜、熱葷大菜、點心粉麵、甜點糖水，款式超過70、80，選擇多多，部份菜式有圖有相作參考，而且，睇落價錢亦唔算貴。除茶錢收每位$7、加一之外，都無其他雜費。
冷盤前菜多達23款，好多知名嘅滬式冷盤都有，如四喜烤夫、蔥油海蜇、雞絲粉皮……，而京式嘅北京水晶肉，川式嘅四川口水雞，均有供應。
醬香凍茄子 $45
凍茄子口感腍腍滑滑，冰涼清爽，所謂「醬香」，有點鹹鹹辣辣嘅味道，又滲出絲絲蒜香，食落都幾醒胃。
香糟醉雞 $70
醉雞晌滬式冷盤中一向都喺好受歡迎，而依道香糟醉雞亦喺冷盤嘅廚師推介之一。一客醉雞份量不少，酒糟香氣撲鼻，外皮好爽，雞肉頗滑，果然有水準。
京蔥醬汁牛肉 $53
牛肉喺用上牛展，滷煮後，配上京蔥及醬汁，都算一道簡單冷盤，但味道絕不簡單。牛展滷得軟腍，帶微微鹵水香，配京蔥嘅香爽，醬汁嘅濃香，食味不俗。
嚐過前菜，又喺到大菜嘅時候。家禽類點咗一個山東手撕雞，加多一客鴨崧配叉子燒餅，兩者都喺廚師推介；蔬菜類就揀嚟濃湯大白菜，熱葷主食應該都差不多。
山東手撕雞 $98
只賣$98有成隻手撕雞，大家都明白喺冰鮮貨色，尤其依家啲冰鮮貨色一啲都唔差，除非做白切雞，否則都唔喺咁易分得出喺新鮮定冰鮮。手撕雞以濃香醬油製作，再手撕而成，雞肉比想像中滑，而且十分惹味，抵食。
鴨崧配叉子燒餅 $80
除鴨崧，亦可揀雞崧，嫌一份叉子燒餅唔夠填晒咁多鴨崧，可以另外叫淨燒餅（$25）。鴨崧炒得幾香，又加入松子仁，叉子燒餅烤得薄薄脆脆，包面沾得滿滿芝麻，鴨崧配燒餅，夾埋一齊回味無窮。
濃湯大白菜 $58
大白菜改咗紹菜，不過咩菜都唔喺重點，大家都志在有啲蔬菜落肚。至於個濃湯，都算唔錯，不過，又唔會令你一飲難忘嘅程度。
一啲飽肚嘅粉麵及點心都喺唔少得，所以，點咗3客粉麵，2客點心。雖然我哋有成10個人，但女士、細路佔多，況且，仲有個蛋糕做甜品，所以夠晒食。
三鮮兩面黃 $68
個兩面黃認真失望，一向對兩面黃個印象都喺麵餅底面煎香金黃帶脆，中間柔軟。不過，眼前依碟似一般粵式嘅肉絲炒麵，只喺肉絲換嚟肉片、蝦仁，唔喺話佢個味道差，如當為一般中式炒麵，其實做得幾好食，材料又多，只喺欠缺咗應有風味啫。
四川擔擔麵 $35
雖然個兩面黃失望啲，但個四川擔擔麵又的確唔錯喎。擔擔麵麵質柔韌有嚼勁，配合濃濃湯汁，有些花生香，帶點點辣，真喺幾好食。
雪菜肉絲湯麵 $35
為顧及各人需要，一個辣嘅，就自然點一個唔辣嘅湯麵。雪菜肉絲本身味道溫和，如無咩太大失誤，都唔會難食得去邊。
灌湯小籠包 $45
小籠包外皮唔算薄，亦唔可以話佢厚，至少從外觀都透到內裡嘅湯汁，不過，湯汁就真喺幾爆，要小心食，免得濺到一身都喺；豬肉餡亦都鬆化，唯一要挑喺個收口摺位比較厚，影響個口感。
銀絲卷 $18件
依個應啲做媽媽嘅朋友要求，搵啲包俾阿囝囝食，正路就嗌1蒸1炸，各有所好。蒸嘅銀絲卷口感極之鬆軟，又唔黏牙；而炸嘅銀絲卷口感香脆，內裡軟綿。
餐廳本身有收切餅費嘅要求，不過，佢話只要點一客甜品就可以豁免。我哋帶咗個蛋糕去慶生，而個棗泥拉糕就因此只點咗一客，溫馨提示，個棗泥拉糕即叫即蒸，而又製作需時，所以有心試就記得預早少少落單。
棗泥拉糕 $34
以紅棗搓成棗泥，再做成富上海特式嘅拉糕，面頭再加滿瓜子仁，擺成花形，幽雅別緻。拉糕質感軟糯，黏黏綿綿，啖啖都滲出濃郁紅棗清香，甜度又啱啱，怪不得列為廚師推介嘅甜品之一。
由於我哋一早訂枱兼食6:00pm，早段客人唔多，服務都無問題，不過，後段開始多客，人手有啲緊，所以，有啲服務都怠慢咗。但喺，整體都令人滿意嘅，況且，菜式選擇多，收費亦合理，地點又方便，值得再幫襯嘅菜館。
個人評分
味道：8/10
環境：8/10
服務：7/10
抵食：7/10
平均每人消費：HK$110
味道：8/10
環境：8/10
服務：7/10
抵食：7/10
平均每人消費：HK$110
餐廳資料：
前門飯莊 The Door Northern Chinese Dining
青衣青敬路33號青衣城3樓322B號舖
2186 7733
前門飯莊 The Door Northern Chinese Dining
青衣青敬路33號青衣城3樓322B號舖
2186 7733
沒有留言:
發佈留言