Marks & Spencer 食品專門店：公朱同好（十）

曲奇一直有唔少有心嘅食友送贈，令小弟作為下午茶輕食，讓我更可以晌度以「好友狂嚐曲」系列跟大家分享唔同店家曲奇嘅味道。但估唔到，朱古力小禮物收吓收吓亦收唔少，又讓小弟都可以寫吓，令「公朱同好」系列有幸捱到今次第10篇，而今次分享嘅喺馬莎產品。

依一款排裝「西西里海鹽牛奶朱古力」，以波浪海紋為包裝紙，甚具意思，雖然未去過依個意大利南部大島嶼，但亦知道佢嘅存在。如果有留意，包裝紙左上角有個「公平貿易」（FAIRTRADE）標誌，表示廠家晌製造朱古力時，對所有原材料均支付合理嘅價格予農民，唔會為利潤而克扣、壓榨佢哋，值得支持。

雖然馬莎喺英國品牌，其實排朱古力嚟自意大利，每排淨重100g，亦唔含化學色素之類，保質期都唔長，約2個月左右，感覺健康啲。

打開包裝，朱古力外觀無咩特色可言，平實3格3格一排排，但味道及口感實在唔錯，牛奶朱古力放入口中，慢慢溶化，柔滑無比；最有趣喺，慢慢嗒落，海鹽嘅鹹味漸漸散發，有種既甜又鹹嘅味道感。

以往都品嚐過海鹽所做嘅甜品，鹹 + 甜的確喺個幾有趣嘅體驗。而今次馬莎出品，值得公諸同好！

個人評分
味道：9/10
環境：- /10
服務：- /10
抵食：- /10
平均每人消費：HK$0（禮物）

餐廳資料：
Marks & Spencer 食品專門店
尖沙咀廣東道17號海港城海洋中心3樓320A號舖
2926 3331