星巴克咖啡 Starbucks Coffee：星包Duck

由於從Maison Eric Kayser半山堅道新店獲贈一小袋甜點禮品，包括Mini Financier（迷你金磚蛋糕）、Madeleine（瑪德蓮貝殼蛋糕）及Macaroon（馬卡龍），大師出品又豈可一人獨享，所以拉埋一對老友夫婦一同品嚐。淨食甜點有啲「寡」，所以就加啲沙律菜、三文治，老友就再拎啲芝士、水餅及私伙紅酒過嚟，當喺一餐輕怡晚餐，而三文治就順路晌星巴克買啲就可以。

晌凍櫃瞄一瞄，好快就決定到買咩，因為見到有啲新產品，當然想試吓啦！

醬燒豬脾酸菜烤包 $43

新產品之一，雖然話新產品，但有時啲嘢都喺萬變不離其中。漢堡包換上比得包，牛肉換上燒豬脾火腿，加入青瓜、芝士、燒烤醬，再多添一點酸菜，不過咁樣配搭埋又幾好味。尤其有青瓜同酸菜，食起嚟寧舍醒胃，當然緊記要烘番熱個包，仲要烘熔少少啲芝士咁先正！不過，塊燒豬脾跟火腿差唔多，但叫做肉感重啲。

醬烤鴨卷 $39

另一款新產品，以墨西哥卷包住烤鴨絲同青瓜，烤鴨絲堆得滿滿，拎起嚟好墜手，果真份量十足。鴨絲嘅獨有鴨味，令烤鴨卷好有個性，配以烤鴨醬，味道濃香，但加埋青瓜，多份清新爽脆，感覺平衡不膩，所以小弟鍾意依個烤鴨卷多過上面嘅燒豬脾烤包。

香酥肉卷 $20

同樣好墜手嘅香酥肉卷，都唔喺第一次食，貪佢平平哋。晌屋企以多士焗爐翻熱都OK，焗後外層都仍然夠酥香，不過卷內免治豬肉不過不失，但我都仲會選佢為屬抵食之選！

綜觀兩款新包，其實算唔上帶來好大驚喜，不過味道方面都算做得不俗。咪睇我哋4個人食3個包以為少，加埋其他嘢，原本諗住喺輕怡晚餐，最後都變咗飽餐一頓囉。

個人評分
味道：7/10
環境：7/10
服務：8/10
抵食：7/10
平均每人消費：HK$25

餐廳資料：
星巴克咖啡 Starbucks Coffee
荃灣楊屋道1號荃新天地上層UG06號舖
2941 0043