世華餐廳 See Fah Restaurant：世估唔到

一向都喺由小弟帶老婆搵食，唔喺因為小弟喺咩鬼「食家」，只喺佢甚少留意飲食行情，對食亦唔會太講究。不過，偶爾佢同事有啲好介紹，都會轉告我知，就好似依間樓上鋪「世華餐廳」（始於1936？），就喺其中一例。

上到3樓一出電梯就喺餐廳，環境、風格都類似花園餐廳一類港式西餐廳，卡位，皮梳化，簡單裝修，乾淨企理。

一出電梯左邊竟然有個酒櫃，之後再細看餐牌，真喺有紅酒、白酒、拔蘭地、威士忌、啤酒……等等供應，非一般港式西餐廳，真喺勢估唔到呀！此外，更刻意將餐牌中嘅「精美小食」翻印做成小掛牌，明顯想晌夜市俾人飲吓酒、食吓小食。

除咗一張A5大細嘅晚餐卡，翻開餐牌，食物款式包羅萬有，晚市套餐唔在講，有西式，亦有中式小菜套餐，以及自選雙拼晚餐、餐酒扒餐、馬來咖喱、喇沙、泰式翅骨魚上湯金邊粉、焗飯、意粉、炒燴飯、炒粉麵、精美小菜、煲仔菜……等等。西餐格局，茶記模式。

晚市套餐有十數款，定價$66-$78，配白飯、意粉、薯菜都得，奉送餐包、餐湯及熱飲，仲可以加多$30變為升級優惠，多一份小食，餐湯加配酥皮，餐飲轉為特飲。小弟揀咗個蒜蓉汁燒原切豬扒伴鹽燒元貝配白飯（$70），老婆就話唔晏晝食咗啲嘢，唔喺好餓，反而想食多點菜，所以，只點個焗芝士西蘭花（$38）就夠喇。

餐包．羅宋湯．咖啡

小藤籃，方形餐包，安佳牛油，有種好懷舊嘅組合。羅宋湯一貫港式風格，大量雜菜，酸酸辣辣，唔喺咩特別出色，只不過有種感情味道，細個跟老豆去食豉油西餐嘅老味道，不過崩咗嘅餐湯碗，可以報銷就盡量唔好再用，免得意外鎅傷食客。

蒜蓉汁燒原切豬扒伴鹽燒元貝配白飯

個名睇落好「架勢」，查實只喺炸元貝、炸豬扒碟頭飯跟蒜蓉汁。兩塊連骨豬扒厚就一定稱唔得上厚啦，就算唔喺炸，都喺煎，睇同食都唔覺喺燒，還好嘅味道唔錯，又幾鬆軟；而粒元貝應毫無疑問唔喺鹽燒嘞啩，處理上認真求其，炸一炸亦令到粒元貝肉質緊咗；伴碟嘅白烚甘筍仔及椰菜花，喺無味又唔多討好嘅伴菜。

焗芝士西蘭花 $38

雖然只喺賣$38，估唔到都唔太細份，賣相都似模似樣，可惜味道好淡口，芝士味淡薄，西蘭花亦都有啲焗過籠（或者拖水耐咗），入口過腍，所以，味道、口感都令人皆失望。

雖未至於好難食，但七十幾蚊一個晚餐，另收加一服務費，可以晌同區搵到啲有質素又好食嘅茶記。之不過，依度個環境及舒適度又好過茶記嘅。

個人評分
味道：5/10
環境：7/10
服務：6/10
抵食：6/10
平均每人消費：HK$60

餐廳資料：
世華餐廳 See Fah Restaurant
尖沙咀北京道71-77號誠信大廈3樓
3102 1380