好．廚房 Good Kitchen：不發一言

相信有唔少人都聽過「黑暗中對話」依間體驗館，連「開飯喇」都有佢嘅食評，睇番啲食評就知喺咩回事，小弟就唔多解釋。原來，佢仲開立咗另一個體驗館「無聲對話」，小弟同老婆及幾個朋友，就參加咗佢哋個工作坊，做咗半日失聰人士，體驗吓佢哋所面對嘅難處，感受吓溝通唔到時嘅焦慮，跟數個唔相識嘅組員合作完成多項活動，認真雞手鴨腳，有口難言。

咁「無聲對話」體驗館同「好．廚房」有咩關係？「無聲對話」體驗館位處長沙灣星匯居1/F，就喺完咗個體驗活動，順道晌樓下嘅「好．廚房」醫肚，因為嗰個位非常隔涉，晌嗰邊真喺無乜食肆，一喺行過去西九四小龍，一喺上返元州街、青山道，咁就多選擇啲。

其實，「好．廚房」喺間社企餐廳，正如店方餐牌嘅自我介紹：「創新社企中菜餐館」。更標榜不含味精、有營、原材料烹調製作、自製天然調味料、不時不食、少油、低碳、低排放，實屬一間良心社企，講求健康、環保概念嘅餐廳，理應支持，所以，就更加無謂再行去其他地方搵食啦！

整間店環境好闊落，樓底又夠高，湖水綠枱布，灰色絨面座椅，讓人望落倍感舒服。而且，近門一邊落地大玻璃，雖然喺行人路街景，但路人少無騷擾，感覺更感開揚。相信位置問題，嚟食晏嘅人唔多，三幾枱客而已，所以，剛才晌體驗館無機會講嘢，依家講番夠本都唔怕嘈到人。

逢星期一至五，都有健康午市套餐（$50），每日有四款餸菜可供選擇，都喺較家常嘅小炒，附送例湯、白飯、時菜，午市免茶芥，不過就要加一。今日喺星期六，可惜無得試，唯有散點菜式！

銅盤蒸雞 $98 / 例牌，$170 / 半隻

一份例牌查實唔喺好多，除咗雞件，仲有厚肉嘅冬菇，以及蟲草花，令整道蒸雞健康不少。「銅盤」都唔喺咩新鮮事物，如無記錯，銅盤蒸雞好似喺順德菜，搵銅盤蒸嘢勝在傳熱快，受熱均勻，短時間內蒸好，保持原汁原味。故此，雞肉都幾嫩滑，滿滿南乳香。

梅醬茄子豆腐 $78

單以賣相，你都推測到個做法唔太複雜，而重點亦在於個梅子醬身上。茄子、豆腐蒸好，打個梅子芡汁便成。睇啲豆腐外觀，似乎喺超市膠盒裝現成貨，如屬實則跟有營、原材料烹調嘅宗旨有啲違背；若以味道而言，梅子醬酸甜恰到好處，配以軟腍嘅茄子，嫩滑嘅豆腐，清新健康。

薑汁芥蘭 $78

講健康都喺多食點菜，所以，一道薑汁芥蘭啱晒佢哋。芥蘭頗翠綠，混有好多薑粒，但薑汁味都仲嫌未夠重，此外，份量上覺得有啲細，所以，以午市嚟講，佢個定價個人覺得有啲高。

健康紅米炒飯 $98

絕對無改錯名，真喺好健康。以粟米、素雞、冬菇、菜心、紅椒、蔥花、紅米所做嘅炒飯，再後加少少松子仁，並以竹筒盛載，無肉只有素，又少油，富口感，清而不寡，不過，小弟稍嫌太乾身，有時，要健康就要付出點點代價！

近門口有個小矮櫃，除咗有啲社企資訊外，仲有啲紀念品，有興趣不妨買啲支持下。

今餐唔喺叫咗好多嘢，3個小菜，1個炒飯，人均都要近一百，已經喺免咗茶芥，晌深水埗區食晏嚟講，應該屬中上價位。故此，覺得位置加埋個定價，多少影響午市嘅生意！

個人評分
味道：6/10
環境：8/10
服務：8/10
抵食：5/10
平均每人消費：HK$98

餐廳資料：
好．廚房 Good Kitchen
長沙灣通州街500號星匯居地下
2541 7031