年初同表姐、表外甥入過嚟一次「薄荷葉」，印象唔錯，當時嘅總結喺：「整體而言，菜式選擇多，價位唔高，用料又幾新鮮，尤其肉類及魚類頗出色，只喺個咖喱未符期望，有待改善。」今趟再入嚟唔使表外甥帶路都知掟，西鐵轉輕鐵，豐年路站落，行多5分鍾，話咁快就由市區嚟到，唔知啲水準保持到定，定會升跌呢？
雖然喺閒日，但正值食晚飯黃金時段，估唔到近乎坐滿人喎。但入座時發生段小插曲，事緣小弟早已訂好位，抵達店面時表達我哋一共3位，並已訂好位，但當時有個比較「黑面」嘅女侍應態度好麻麻話裡面無位，只得外面（但我明明見仲有），但外面啲位真喺唔多好，一來昏昏暗暗，二來喺半露天，好多人食煙，真喺受唔到成晚被煙味侵襲。所以，再搵另一位男侍應問問，並再次表明一早已訂好位，好快佢就安排好一張室內枱俾我哋，態度友善又禮貌，若非多得依個男侍應「補飛」，恐怕服務一欄都得好低分嘞！
環境方面，一如上次所描述，店方周圍商鋪都喺車房、機器廠，好難此情此景會有咩泰國風情，不過，入夜後，店方都刻意營造氣氛，門外欄杆圍上木棚架，又加添唔少熱帶植物，繞上小燈飾，又再加啲光效，擺放幾枱半露天位，加上店舖面向嘅唔喺大街，幽靜得嚟又叫人感覺舒服。店內全放上原木木枱木櫈，有啲原始味道，一室綠色牆身，裝修簡約，店中央後牆位置架起100吋投射銀幕，不斷播放泰文歌，都幾搞鬼。
冬蔭公湯 $68（小）/ $128（大）小陶泥壺載住冬蔭公，感覺幾別緻，湯色色澤對板，都幾多料，我哋要壺細嘅，可以分到4碗左右。呷一啖，湯味鮮濃，香茅味非常突出，帶微辣，而湯內蝦隻鮮甜，真喺睇唔到個湯幾得！
泰式煙三文魚木瓜沙律 $88
個冬蔭公湯唔喺點辣，但就估唔到個沙律就幾辣吓，入口頗刺激。另一估唔到喺啲煙三文魚唔喺得幾片仔，而喺幾大片，仲冚實晒成份沙律，再者，啲煙三文魚有幾有煙燻香添。沙律方面，木瓜絲挺爽口，酸酸香香，又加入咗花生粒，至於個沙律嘅辣源就喺裡面加咗唔少紅辣椒，不過奇怪嘅喺餐牌上又無標示「辣椒」公仔，實在頗有誤導性。如果唔食得辣嘅人就唔好點依個沙律，反正沙律類有成9款選擇之多，當中有數款喺唔辣嘅，不過，落單前都喺問清楚好。
椒絲炒通菜 $48
原打算叫椒絲泰式炒芥蘭苗（$68），可惜無晒芥蘭苗，退而求其之就要通菜，啲通菜甜甜哋，幾爽脆，椒絲吊起嘅微辣，食嚟頗惹味。
泰式燒羊架 $108
上次嚟賣$98，依家稍稍加到$108。燒羊架一客4件，燒得唔錯，有炭火香，肉嫩多汁，羶味唔重，羊架預先醃過再燒，食到有朕朕沙嗲香。墊底嘅沙律菜，鮮甜清爽，食番多啲去去油膩！
泰式燒雞 $138
個燒雞幾有賣點，侍應將燒雞奉上，淋酒點火，一時成隻雞火光熊熊，花巧得嚟甚養眼。待火光熄滅，侍應會即場將雞隻剪件，等客人食得方便。估唔到隻雞入口都幾滑喎，而且食落好多香料味，伴以酸醬，微甜醒胃，值得一試嘅燒雞。
臨走去一去洗手間，原來鋪後有個私人廂房，最啱人多搞派對，分上層、下層，上層可容納30人，而下層亦可容納18人，最低消息要$3,000，計落都OK喎！
跟上一次嚟，水準依然，幾樣菜式都啱食又好味！
個人評分
味道：8/10
環境：8/10
服務：7/10
抵食：8/10
平均每人消費：HK$0（試食邀請）
味道：8/10
環境：8/10
服務：7/10
抵食：8/10
平均每人消費：HK$0（試食邀請）
餐廳資料：
薄荷葉泰國菜 Mint Thai House
元朗安康路怡康大廈地下12-13號舖
2475 5872
薄荷葉泰國菜 Mint Thai House
元朗安康路怡康大廈地下12-13號舖
2475 5872
沒有留言:
發佈留言