兩年幾前去完雲南旅行，就去過一次佐敦Marco’s食飯兼分享旅行點滴，印象唔錯；今次又啱啱返完大陸做嘢，又可以一邊食飯，一邊跟食友分享山區點滴。環顧「橡木」個環境，真喺感覺比Marco's仲要輕鬆隨意，氣氛親切，加上地方闊落，感覺更加無咁拘緊，而切合番店名，一室都喺以木材作為裝修主材料及傢俱設備，頗想營造一個舒適自然，不失鄉村風情嘅意大利餐廳。如Marco's系列，註場菲律賓鬍鬚叔叔整晚不停獻唱，有英文有國語，久唔久幫人唱埋生日歌，真喺幾搞到氣氛。
近門口嘅半開放式烤爐
菲律賓鬍鬚叔叔整晚不停獻唱
翻一翻菜牌，跟Marco's都幾近似，除咗5道菜晚餐（$328，有生蠔、沙律、餐湯、主菜及甜品）外，散叫餐牌又喺有一系列嚟自唔同國家、地區嘅生蠔，此外各大分類：前菜、沙律、薄餅、意粉、意大利飯、烤肉、海鮮、甜品，以及多款紅白餐酒、雞尾酒、啤酒，但最估佢唔到喺竟然有4款其他地方菜，包括原個菠蘿海鮮焗飯、泰式皇宮蝦飯、泰式咖喱雞飯、新加坡海南雞飯。由於喺試食活動，所以，菜式早有安排，安坐等食，唔使傷腦筋。
部份餐牌（前菜）
最估佢唔竟然有其他地方菜
紅酒．白酒既然要好好享受一餐意大利寫意晚餐，餐酒總唔少得嘅，所以店方亦安排咗一枝Donna Rose紅酒及Vino Bianco白酒供大家享用，小弟較少接觸白酒，故此揀咗後者嚟試試。好老實，小弟絕對唔喺好酒之人，所以評酒更加見笑，只會班門弄斧，但可分享一下，隻酒色澤金黃剔透，入口幾順溜，味道唔會太複雜，又幾好飲喎！
新鮮生蠔（Oysters）
無論Marco's，抑或Oak Tree，生蠔都可以話喺店內重點之一，而且仲做緊半價推廣，今晚就有蘇格蘭及澳洲塔斯曼尼亞嘅新鮮生蠔作為頭盤打頭陣，實行壯壯聲威。兩款都好鮮味，前者體形較大，質感肥美，沾點蕃茄醬，晌酸香下蠔味似乎更突出；後者則細隻少少，入口海水味挺強，味道會較鹹，所以唧啲檸檬汁可以平衡一下。
意大利香草包（Focaccia）
意大利香草包算幾易做嘅一款意大利包，失敗指數低，但非常好啱香港人食，因為佢包身鬆軟，包面又灑滿雜香草及淋上橄欖油，所以份外油潤香口。記得以前晌美麗華商場嘅Focaccino，有款加入車厘茄版嘅意大利香草包，將香草包撳啲窿窿，釀入半粒車厘茄再焗，取名叫「蕃茄嘉茜包」，亦都好正。
黑松露野菌忌廉湯（Black Truffle and Porcini Mushrooms Cream Soup）
餐牌上野菌忌廉湯定價$58，唔知加入咗黑松露又賣幾多錢呢？個湯確實菌味濃郁，當中亦有唔少菌粒，可謂真材實料，而質感都打得柔滑，絕對實而不華！
意大利小食拼盤（Italian Antipasto Plate）$98
好豐富嘅一個小食拼盤，有巴馬火腿、莎樂美腸、凍肉腸、烤茄子、意大利蕃茄乾、吞拿魚釀車厘茄、雅枝竹、蕃茄配水牛芝士、黑橄欖及青橄欖，喺伴酒好拍檔。個人覺得莎樂美腸、烤茄子、意大利蕃茄乾及蕃茄配水牛芝士幾好食，尤其個蕃茄乾，充滿橄欖油香，蕃茄味夠濃縮；反而巴馬火腿有啲失色，感覺未夠油潤，有點乾身，而雅枝竹又浸醃得過於腍爛。
食完一輪頭盤、小食，以及餐湯、香草包，雖然都將個胃佔去一定空間，不過，跟住豐富嘅主菜當前，又豈能手停口停。
黑松露野菌薄餅（Mushroom and Truffle Pizza）$130
餐廳嘅烤爐刻意採用半開放式，一入餐廳就望到，正正對住大廳，等烤焗嘅香氣晌餐廳內瀰漫。薄餅底嘅厚度喺我哋常叫嘅厚批、薄批之間，除邊位香脆外，個薄餅底稍韌，而且有啲乾。幸而個「蕃茄汁底」，加埋野菌、黑松露醬、水牛芝士，令個批晌味道上幾正，芳香濃郁，希望個薄餅底有改善，唔好嘥咗其他材料啫。
白雪魚牛肝菌意大利飯（Risotto with Snow-white Fillet and Boletus）
白雪魚柳香煎後再以錫紙包埋檸檬烤焗，魚味較淡，但挺嫩滑。配以牛肝菌意大利飯，飯粒煙韌有咬口，混和菌香，真喺幾好食。餐版未見有依道菜蹤影，未知定價如何？
黑松露龍蝦米多（Lobster in Wine Sauce topped with Black Truffle Shaving）
今晚主菜嘅亮點，首推依碟黑松露龍蝦米多，同樣餐牌未有依款菜式，不過另一款相類似嘅龍蝦米多伴意大粉（Lobster Termidor & Spaghetti）就盛惠$328。龍蝦夠晒大隻，賣相份外有睇頭，肉身都幾爽，淋上紅酒汁及刨點黑松露，焗一焗已令味道富層次而幽香。
美國頂級雪花黑牛安格斯肉眼（US Prime Black Angus Rib Eye Steak, 12oz) $278，美國厚切極黑豬扒（US Pork Chop）$220香草燒紐西蘭羊架 (NZ Lamb Rack, 4 bones) $260為咗讓我哋一次過試晒3款扒類，又唔好成枱都喺碟，所以就唯有犧牲「色相」一碟過上晒，餐廳本身喺無「雜扒」依回事。當中以羊架最得小弟歡心，以芥末及香草醃過再燒，羊唔羶，但羊味唔重，不過肉質好幼嫩，富肉汁，又燒得香口。其次個肉眼都不俗，油份唔太多，但勝在肉味濃郁，幾啱我依個食肉獸。但極黑豬則有啲落差！
意大利蕃茄肉醬薯稞（Gnocchi alla Romana）$110
第一次接觸「Gnocchi」喺晌中環嘅Pasta Mio，所以對Gnocchi都有少少皮毛認識，Gnocchi喺用麵粉或馬鈴薯做嘅丸子，如果上網摷摷，就會出到好多唔同嘅中文譯名，多數都喺意譯，例如：意式馬鈴薯丸子、意式土豆球、意大利薯波……，而橡木譯佢為「薯稞」，都OK喎。口感喺點？成舊波波都喺實心，好似食緊未烚透嘅薯仔蛋咁，感覺會實在而煙煙韌韌。配以蕃茄肉醬，都喺大路嘅配搭。
前菜、主菜過後，甜品喺今晚晚飯嘅尾程。大廚又為我哋預備咗3款甜品，相信都滿足到一眾食友嘅期望。
朱古力心太軟伴雪糕（Volcano & Ice Cream）$48
心太軟又算喺Marco’s嘅名物，都好多人喜歡點佢個心太軟，因為佢哋做嘅心太軟有一定水準，流心效果又絕無甩拖。朱古力心太軟伴上一球朱古力雪糕，輕輕切開，朱古力漿從蛋糕澎湃流出，而蛋糕朱古力幾香濃，伴著雪糕一齊食，又凍又熱，爽呀！
意大利芝士餅（Classic Tiramisu）$48
意大利芝士餅以小杯形式見面，淡味嘅馬卡風芝士打得頗柔滑，但手指餅部份所蘸咖啡酒唔多，風味稍欠。
拿破崙蛋糕（Napoleon Cake）$48
拿破崙嘅賣相唔算好討好，但酥皮做得都還算鬆化香脆，只喺略嫌吉士做得唔夠滑溜，加埋生果，整體感覺屬中規中矩。
Snow Ball $58
既然餐廳有咁多款紅白餐酒、雞尾酒，小弟都試番杯「輕量級」嘅「雪球」，以蛋酒（Advocaat）溝雪碧，酒精度低，味道帶少少甜甜哋，極之易入口。
整餐飯食得輕鬆寫意，除咗因為餐單一早已擬定好，亦因為跟多位相熟食友相聚，講飲講食，談天說地，何其樂事。最開心莫過於又收到食友所贈嘅零食小禮物，而且更有去完旅行由韓國帶嚟嘅小手信，真喺又食又拎，滿載而歸！
打分方面，以今晚嘅頭盤、餐湯、香草包計，都深得我心，所以值得俾個笑面佢！然而，無論主菜及甜品，有好，亦有唔好，仍有好些改善嘅地方，所以整體評分真喺介乎笑與OK之間，姑且俾住個OK先，希望店方繼續努力，期望製作出更多匠心獨運、精巧創意嘅菜式！
個人評分
味道：7/10
環境：7/10
服務：8/10
抵食：8/10
平均每人消費：HK$0（試食邀請）
味道：7/10
環境：7/10
服務：8/10
抵食：8/10
平均每人消費：HK$0（試食邀請）
餐廳資料：
橡木意大利餐廳Oak Tree Ristorante
佐敦西貢街23號彩鴻酒店1樓
2893 4442
橡木意大利餐廳Oak Tree Ristorante
佐敦西貢街23號彩鴻酒店1樓
2893 4442
沒有留言:
發佈留言